Raquel Queizás protagoniza un contacontos infantil sobre a igualdade de xénero
Martes 17 de marzo do 2020 18.00 horas - Biblioteca Rego da Balsa
A programación elaborada pola Concellería de Igualdade arredor do Día da Muller chega esta semana aos máis cativos e cativas da casa para promover a igualdade de xénero desde a infancia e previr todo tipo de violencia mediante novos modelos de feminidade e masculinidade capaces de rachar cos roles asignados.
A través dos contos de Raquel Queizás desmontaremos eses estereotipos que dificultan a convivencia pacífica entre nenas e nenos. Descubriremos historias de nenas decididas e nenos sensibles. Identificaremos situacións ás que nos temos que enfrontar día a día na escola, na casa, cos amigos, …onde a violencia ou a agresividade física e verbal pode ter solución grazas á palabra e, por suposto, gozaremos brincando coa imaxinación.
Sinopse: Queliña quere ser aviadora, gústalle vivir aventuras e contar historias. De pequena estaba farta de escoitar contos de princesas rosas e apoucadas e de príncipes azuis e insensibles e un día dixo BASTA XA!!! Puxo o gorro e os anteollos de pilota e foi buscar contos para demostrar que nenas e nenos "Somos iguais". Sí, igual de valentes e igual de sensibles.
Público: Nenos e nenas de 4 a 8 anos de idade
Entrada: Libre e de balde ata completar aforo
Organiza: Concellería de Igualdade