Lingua

Lingua

Servizo de Normalización Lingüística 
[Pazo da Cultura]
Rúa do Pan, s/n 
15100 - Carballo
Teléfono: 981 704 304 
Fax: 981 704 302 
nelvidal@carballo.gal

A mellora da calidade da lingua, a análise en Carballo

O mércores 18 e o xoves 19 de xullo terá lugar no Fórum o curso de verán Traballando na Calidade da Lingua, no que participarán arredor de 50 persoas

Martes 17 de xullo do 2018

Polo Fórum Carballo pasarán estes días numerosas persoas expertas en lingua para reflexionar e facer propostas de mellora arredor da calidade do idioma. Así, intervirán expertos como o catedrático carballés Xosé Ramón Freixeiro Mato, o director do Instituto da Lingua Galega (ILG) Xosé Luís Regueira, as profesoras e profesores Mercedes Queixas, Bieito Silva, Xoán Costa, Valentina Formoso, Susana Devesa, Xesús Ferro Ruibal, Neal Baxter, Alba Cid, Carlos Biscaiño, Xavier Gómez Guinovart ou Xosé Manuel Sánchez Rei, e as/os lingüistas Anxos Sobriño, Xermán García Cancela, Luz Méndez, Xusto Rodríguez Río ou Nel Vidal, ademais de persoas significativas de diversos ámbitos de interese para o idioma, como poden ser o director teatral e contador Quico Cadaval, as actrices Isabel Risco e Esther Carrodeguas, os actores César Cambeiro e Luís Iglesia, a xornalista da TVG Susana Suárez Recouso e o humorista audiovisual Iván Capón (Paramo Pictures).

O curso de verán que cada ano organiza a Universidade da Coruña en Carballo este ano non se centrará, como todos os anteriores, na dinamización da lingua galega, senón que enfocará o seu traballo na calidade da lingua. Terá lugar durante dous días, o mércores 18 e o xoves 19 de xullo, no Fórum Carballo, e reunirá arredor de 75 expertos/as na materia, entre 25 que intervirán ao longo dos dous días e os arredor de 50 anotados no curso.

Durante as dúas xornadas traballarase sobre a necesidade e sentido do uso dunha lingua de calidade, a fonética e a autenticidade lingüística, o compromiso coa calidade da lingua no ensino, na pantalla ou nos escenarios, a fraseoloxía, o sexismo lingüístico, a responsabilidade dos entes públicos, as novas tecnoloxías como ferramenta para o coidado da lingua ou a calidade do idioma no humor.

Inauguración

O curso, que ten horario de mañá e tarde, será inaugurado o mércores 18 ás 9.30 h polo alcalde de Carballo, Evencio Ferrero; o reitor da Universidade da Coruña, Julio Abalde; a presidenta da Coordinadora de Traballadores/as de Normalización da Lingua (CTNL); Anxos Sobriño; o secretario xeral de Política Lingüística da Xunta de Galicia, Valentín García Gómez; e o director do curso, Xosé Manuel Sánchez Rei.

Esta actividade formativa está organizada pola Universidade da Coruña, dentro do seu programa oficial de cursos de verán, e conta coa colaboración co Concello de Carballo, a Xunta de Galicia e a CTNL.

Descargas

Compartir: