Inicio Carballo ao día Novas A Concellería de Terceira Idade retoma a...

A Concellería de Terceira Idade retoma a temporada de bailes

Rocío Pérez e Sintonía da Cruña actuarán no primeiro trimestre en varias das sesións para maiores que se celebran todos os domingos no Pazo da Cultura

Venres 20 de xaneiro do 2017

O baile é unha actividade física moi completa e moi recomendable para os maiores, porque, ademais de mellorar a súa saúde física e mental, axúdaos a aumentar a autoestima, a relacionarse e a desinhibirse, a aumentar a súa autonomía e, sobre todo, a divertirse. Pensando en todos estes beneficios, a Concellería de Terceira Idade de Carballo organiza sesións de baile todos os domingos, de 18.00 a 21.00 horas, tanto con música “enlatada” coma con actuacións en directo.

A estrela das últimas sesións foi a carballesa Rocío Pérez, que xa conseguiu meter ao público no peto coa súa voz e o seu espectáculo. Dado o seu éxito que acadou entre os maiores, para comezar esta nova temporada de bailes a concelleira de Terceira Idade, Carmen Regueira, pechou xa as próximas actuacións de Rocío, que se celebrarán este domingo, día 22, así coma o 12 e o 28 de febreiro. Este último baile coincidirá coa tradicional Festa de Entroido. E o 5 de marzo haberá unha novidade, xa que actuará por primeira vez en Carballo o conxunto Sintonía da Cruña.

Compartir: