Asinado o contrato para a execución das obras de mellora integral da rede viaria secundaria de Entrecruces e Aldemunde

Os traballos, que serán executados pola empresa Construciones López Cao, comezarán nos vindeiros días

Mércores 9 de agosto do 2017

O alcalde de Carballo, Evencio Ferrero, asinou hoxe coa empresa Construcciones López Cao o contrato para a mellora integral da rede viaria secundaria das parroquias de Entrecruces e Aldemunde. O proxecto, que ten un orzamento de 103.000 euros, permitirá actuar nun total de  28.955 metros lineais de pistas en Entrecruces e de 5.601 metros en Aldemunde. As obras, que inclúen a limpeza integral de cunetas e a pavimentación con dobre rego asfáltico de todos os treitos deteriorados, comezarán nos vindeiros días.

Nestes momentos están rematados, en execución ou pendentes de inicio as obras de mellora integral da rede viaria en todas as parroquias agás Berdillo e Ardaña, aínda que o pleno da corporación xa aprobou na súa última sesión o investimento preciso para levalas a cabo este mesmo ano.