O aumento da participación veciñal e a mellora da seguridade viaria, principais obxectivos do Consello Parroquial de Oza

A veciñanza presentará tamén unha proposta para adecuar as marquesiñas que son utilizadas máis coma punto de encontro veciñal que como paradas de autobús

Xoves 19 de abril do 2018 Participación veciñal

O Consello Parroquial de Oza reuniuse o mércores

O Consello Parroquial de Oza é o menos numeroso do concello, e os representantes veciñais queren que deixe de ser así. Na xuntanza deste mércores analizaron as posibles causas desta situación e apuntaron algunhas das medidas que consideran que poderían adoptarse para que o consello sexa a canle que utilicen os veciños e veciñas para comunicarse co Concello de Carballo. 

Pero ademais desta cuestión organizativa, e de reflexións sobre aspectos como o aproveitamento máis axeitado e sostible dos recursos hídricos, os representantes veciñais presentes na reunión fixeron un repaso a algunhas das necesidades da parroquia. Unha vez que están en marcha proxectos tan importantes como o abastecemento de auga, que tamén chegará a Razo; a pavimentación do núcleo do Rodo con cemento ou o aglomerado da pista que vai desde a parroquia ata Bértoa, a veciñanza considera que hai que seguir pelexando pola mellora da seguridade viaria na estrada provincial. Os veciños e veciñas consideran insuficientes os sinais colocados a raíz dunha petición anterior e pediron que o Concello siga insistindo ante a Deputación na instalación de bandas redutoras da velocidade e na construción de beirarrúas ata a ponte da autoestrada.

Da xuntanza, na que participaron o alcalde, Evencio Ferrero; a concelleira do BNG Mari Carmen Regueira, o popular Héctor García e o representante de TeGa José Bello, tamén saíu unha iniciativa encamiñada a adaptar as marquesiñas que son máis usadas coma punto de encontro veciñal que coma paradas de autobús. Os representantes veciñais elaborarán unha proposta de actuación neste sentido.