Inicio Carballo ao día Novas A Xunta de Goberno aprobou proxectos empresariais...

A Xunta de Goberno aprobou proxectos empresariais no polígono de Bértoa que superan 1,7 millóns de investimento

Autorizado o pago de 311 facturas por un importe total de 125.269 euros

Luns 21 de maio do 2018

Na Xunta de Goberno Local foron aprobados tres proxectos empresariais

Na Xunta de Goberno Local foron aprobados tres proxectos empresariais

A Xunta de Goberno Local de hoxe volveu a reflectir a intensa actividade que está a desenvolverse no polígono de Bértoa. Nesta ocasión foron aprobados tres novos proxectos de naves industriais, dous de construción e outro de ampliación, que superan 1,7 millóns de euros de investimento. De feito, a ampliación dunha empresa de fabricación de vivendas modulares xa supón case 1,2 millóns, e o resto corresponde á construción dun almacén para unha empresa instaladora e outro para unha envasadora de legumes, que modifica outro proxecto presentado e aprobado con anterioridade. En materia urbanística tamén foron aprobadas outras licenzas e varios vaos permanentes.

A xuntanza de hoxe foi un exemplo tamén de que a normalidade vai volvendo aos servizos económicos despois da demora no pago de facturas que supuxo a implantación dunha nova aplicación informática contable. O goberno local autorizou o pago de 311 facturas por un importe total de 125.269,88 euros.

A Xunta de Goberno Local aprobou, ademais, a adxudicación da dirección e coordinación da Banda Municipal de Bandas a Jesús Moreira Castro por un período de 4 anos, prorrogable ata un máximo e 6. Así mesmo, autorizou os convenios de colaboración coa ADC Voleipraia Costa da Morte para o desenvolvemento das Escolas Deportivas de Voleipraia, por 4.500 euros, e coa Escola Basket Xiria para o Pequebasket, por 6.000 euros.

Por outra banda, foron aprobadas as solicitudes presentadas pola empresa Hydracorte dentro do programa Carballo Activa pola contratación de dous traballadores formados no centro municipal do Fórum.

Compartir: