Inicio Carballo ao día Hemeroteca Mulleres de Carballo xa están...

Mulleres de Carballo xa están “Camiñando pola igualdade” nos obradoiros de participación social organizados polo Concello

O grupo de homes comezará as xuntanzas o 1 de decembro e para o obradoiro de hip-hop para a mocidade comunicarase nova data

Xoves 22 de novembro do 2018 Carballo ao día

Os obradoiros

Os obradoiros "Camiñando pola igualdade" comezaron hoxe na Biblioteca Rego da Balsa

Con algúns cambios sobre o programa previsto, ás 19 horas arrancaron as actividades incluídas no programa organizado pola Concellaría de Igualdade e Benestar arredor do Día Internacional da Eliminación da Violencia contra as Mulleres e as Nenas. O obradoiro de mulleres “Camiñando pola igualdade” xa está en marcha, e aínda que se trata dun grupo reducido, a participación nesta primeira sesión resultou moi activa e proveitosa, ata o punto de que case dúas horas despois continuaba o debate.

Agora só falta que arranque tamén o obradoiro para homes, co obxectivo de que nun determinado momento os dous cheguen a unirse para traballar en conxunto pola igualdade. A sesión prevista para este sábado trasládase ao seguinte, 1 de decembro, polo que os interesados en participar aínda están a tempo de anotarse. Poden facelo por teléfono, no 981 700 688; a través do correo electrónico carballoennegro@gmail.com ou aquí.

Tamén mantemos aberto o prazo para o taller de hip-hop dirixido á mocidade, do que se comunicará tan pronto como sexa posible a nova data de celebración, e para o obradoiro de xoguete non sexista que celebraremos o 14 de decembro na Biblioteca Rego da Balsa.

Ademais de convidarvos a participar en todas estas actividades, dende a Concellaría de Igualdade e Benestar facemos un chamamento a toda a veciñanza a participar na concentración que celebraremos este domingo 25 ás 12.30 horas na Praza do Concello, un acto co que queremos que todo Carballo se manifeste contra as violencias.

Compartir: