Os cursos de manexo do teléfono móbil comezarán este xoves 7 na parroquia de Vilela

Os talleres serán impartidos pola Cruz Vermella todos os martes e os xoves ata completar o percorrido polas 11 parroquias nas que houbo un mínimo de solicitudes

Luns 4 de febreiro do 2019

Xa están formados os primeiros grupos dos cursos de manexo do teléfono móbil organizados polo Concello de Carballo, que conta coa colaboración da Asemblea Local da Cruz Vermella para impartilos. O primeiro empezará este xoves no centro social de Vilela, onde hai 16 persoas inscritas.

Cada curso constará de tres sesións prácticas, que se celebrarán os martes e os xoves, de dúas horas de duración. En Vilela, polo tanto, o curso realizarase os días 7, 12 e 14. Neste caso o horario será de tarde, concretamente de 16.00 a 18.00, xa que foi a quenda elixida pola maioría das persoas inscritas. No resto das parroquias utilizouse ese mesmo criterio para establecer os horarios.

Os seguintes cursos celebraranse en Carballo os días 19, 21 e 26 de febreiro, neste caso en dúas quendas de mañá: de 09.30 a 11.30 e de 11.30 a 13.30 horas, xa que hai 30 persoas inscritas. Os seguintes, os días 7, 12 e 14 de marzo, serán en Sofán, tamén en dous grupos (de 09.30 a 11.30 e de 11.30 a 13.30) para poder atender ás 27 persoas anotadas. En todos os casos comunicaranse datas e horarios persoalmente por vía telefónica. As seguintes datas iranse fixando nas vindeiras semanas, pero a orde será a seguinte: Carballo (dous grupos de tarde), Sísamo, A Brea, Rus, Noicela, Lema, Entrecruces, Cances, Artes e Ardaña.

O obxectivo dos cursos é familiarizar coas novas tecnoloxías de uso cotiá ás persoas maiores e dotalas de ferramentas necesarias para a vida diaria.