Presentado o novo sistema de xestión do ciclo integral da auga, que garante a calidade do servizo e da atención ao usuario

A empresa concesionaria, Gestagua, vén de implantar un conxunto de aplicacións que sitúan a Carballo como líder na xestión tecnolóxica da auga

Venres 13 de setembro do 2019

Persoal de Gestagua e do Concello de Carballo, na ETAP do Carral

A partir de agora será moito máis doado manter en perfectas condicións de funcionamento os centos de instalacións, redes e equipos que conforman o ciclo integral da auga no noso concello. Carballo convértese en líder en xestión tecnolóxica da auga grazas á implantación dun conxunto de aplicacións de tecnoloxías intelixentes, interconectadas entre si, que conforman un sistema orientado ao big data que asegura unha xestión transparente, fiable e eficiente das infraestruturas, ademais dunha excelente atención aos 13.995 usuarios/as do noso concello.

A nivel práctico isto tradúcese nunha serie de vantaxes á hora de xestionar os complexos sistemas de abastecemento e saneamento, cada vez máis estendidos polo territorio municipal, e de atender calquera incidencia no menor tempo posible, cando non anticiparse a ela. Un pequeno exemplo: grazas aos sistemas implantados é posible detectar un consumo excesivo derivado dunha fuga de auga e alertar ao cliente antes de que se dispare a súa factura.

Reunión de traballo nas oficinas de Gestagua

De todo iso deuse conta hoxe nunha reunión de traballo na que participaron, en representación do Concello, o alcalde, Evencio Ferrero; o concelleiro de Obras e Servizos, Luis Lamas; a concelleira de Contratación e Planificación, Milagros Lantes, e o enxeñeiro municipal, José Facal, e, por parte de Gestagua, o director de operacións, Gonzalo Murillo; o director de comunicación, Julio Fernández; o responsable dos sistemas informáticos, Alberto Provencio; o delegado da empresa en Galicia, José Rey, e o xefe de servizo de Carballo, Benigno López.

No encontro fíxose balance das actuacións realizadas nestes primeiros anos de concesión e da situación actual do servizo, pero sobre todo expuxéronse as melloras que levan aparelladas as novas aplicacións tecnolóxicas.

• Azul: Sistema de xestión de clientes onde se supervisa todo o ciclo comercial para ofrecer, cada día e en tempo real, un servizo excelente aos usuarios/as. O sistema coñece o conxunto de incidentes, que poden afectar ao servizo, tanto imprevistos como de mantemento, o que permite manter actualizada a información ó usuario. Os veciños e veciñas de Carballo poden rexistrarse en  https://carballo.gestagua.es/ para ter acceso a toda a información relativa á súa instalación e o seu contrato, ou tamén utilizar a APP para teléfonos móbiles
• Hermes: Este sistema permite o coñecemento do estado das instalacións do servizo en tempo real. O control de proceso está permanentemente actualizado mediante a medición de parámetros de funcionamento, alarmas dos sistemas de tratamento, distribución e depuración de agua.
• Gea: A xestión de instalacións e redes, así como o inventario dos equipos,  administrase a través do sistema denominado GEA, o que permite programar as accións de mantemento.
• Neo: É o centro de recepción das actuacións detectadas e proxectadas polo resto de aplicacións, ordenadas de maneira que é o responsable da planificación que dispón dun listado intelixente que fai posible a coordinación dos traballos. Neo rexistra os traballos realizados e os recursos utilizados en tempo real, a través de tabletas deseñadas para o traballo en campo.
• Aquael: Aplicación de xestión de recursos naturais, auga e enerxía, cuxo propósito é básico para lograr a eficiencia medioambiental da xestión.
• Argos: Todos os indicadores das nosas actuación están permanentemente actualizados na aplicación denominada Argos, permitindo á empresa e ao Concello de Carballo seguir a evolución da xestión e a mellora continua do traballo.

Representantes do Concello e da empresa

Despois da exposición das novas aplicacións na sede de Gestagua, situada na rúa Río Ulla, nº 2, os representantes municipais e da empresa achegáronse ata a captación do río Bardoso, no Carral, onde se realizou a presentación do persoal, o parque móbil, a maquinaria e os equipos cos que conta a concesión.

Vídeos