A brigada de xardíns recoloca os abetos dos decorados de Nadal en distintos espazos públicos

Os seis exemplares de menor tamaño foron distribuídos por diferentes barrios, aos que iremos estendendo a decoración festiva

Venres 7 de febreiro do 2020

Os abetos grandes plantáronse no Parque Rego da Balsa

Despois de trasladar ao Parque do Rego da Balsa os enormes abetos que adornaron a rúa Barcelona durante as festas de Nadal, hoxe completouse tamén a recolocación das árbores de menor porte que formaron parte dos decorados instalados na zona urbana. A Brigada Municipal de Xardíns plantounas en espazos axardinados de distintos barrios co obxectivo de seguir estendendo, de cara aos anos vindeiros, a decoración de Nadal por toda a vila.

Un dos abetos pequenos está na Praza do Outeiro

Os pequenos abetos forman parte xa dos parques do Chorís, A Milagrosa, O Anllóns, Praza do Outeiro (Xulgados), Alfredo Brañas e Campo da Matea (A Brea). A Brigada Municipal de Xardíns buscou os emprazamentos máis axeitados tendo en conta a envergadura que poden chegar a acadar estas árbores, aínda que a intención do Concello de Carballo é chegar a todos os barrios. Nestes momentos contamos xa con 10 novos abetos distribuídos pola parroquia de San Xoán Bautista.