Inicio Carballo ao día Hemeroteca A incidencia do coronavirus continúa...

A CIFRA DE CONTAXIOS NOS CENTROS EDUCATIVOS É DE 67

A incidencia do coronavirus continúa aumentando no noso concello, no que acadamos este xoves os 190 casos activos

A comisión municipal de seguimento da COVID-19, que se reuniu hoxe pola mañá, decidiu manter pechados os parques infantís

Xoves 19 de novembro do 2020 Carballo ao día

A comisión de seguimento reuniuse hoxe

A comisión de seguimento reuniuse hoxe

A comisión municipal de seguimento da COVID-19 reuniuse hoxe para analizar os datos ofrecidos onte polo conselleiro de Educación, Julio García Comesaña, aos alcaldes dos 6 concellos de Bergantiños perimetrados conxuntamente e á alcaldesa de Vimianzo. Na xuntanza, na que participaron membros do goberno municipal e representantes da Garda Civil, a Policía Local e Protección Civil, amosouse a preocupación compartida polo incremento do número de casos na zona en xeral e no noso concello en particular. Segundo os datos ofrecidos nesta xornada pola Xerencia da Área Sanitaria A Coruña-Cee, en Carballo acádanse os 190 casos activos.

A incidencia continúa sendo moi elevada tamén nos centros educativos. Segundo os datos difundidos hoxe pola Consellería de Educación, as cifras son as seguintes:

  • CEIP Bergantiños: 4
  • CEIP Gándara-Sofán: 2
  • CEIP Fogar: 40 (9 aulas pechadas)
  • CPR Plurilingüe Artai: 4
  • CRA Ponte da Pedra: 3
  • IES Alfredo Brañas: 6
  • IES Isidro Parga Pondal: 1
  • IES Monte Neme: 5   
  • Escola Infantil As Landras: 2 (1 aula pechada)

Hoxe realizáronse probas no centro de saúde a traballadores/as de sectores especialmente expostos

Hoxe realizáronse probas no centro de saúde a traballadores/as de sectores especialmente expostos

Á vista da situación, e á espera do cribado xeral que se vai realizar nos vindeiros días ao alumnado do CEIP Fogar (hoxe fixéronse probas no centro de saúde a traballadores/as de colectivos especialmente expostos/as), que foi convocado hoxe a través do sistema de notificacións Abalar, a comisión municipal de seguimento da COVID-19 acordou manter pechados os parques infantís.

Hoxe celebrouse con normalidade o mercado semanal, aínda que con menos postos e menos público do habitual. Este domingo haberá feira tanto na Praza do Concello coma na Milagrosa, en ámbolos dous casos coas medidas de distanciamento e prevención necesarias. Dende o Concello de Carballo pedimos a toda a cidadanía que cumpra escrupulosamente as normas en todas as actividades permitidas neste momento.

Compartir: