Inicio Carballo ao día Hemeroteca Carballo entra no mes de Nadal coa...

O ALUMEADO DE NADAL ACENDERASE MAÑÁ XOVES

Carballo entra no mes de Nadal coa colocación de adornos nas rúas e o acendido anticipado do alumeado

Hoxe quedou instalado no Xardín Municipal un conxunto decorativo que inclúe dous renos, un trineo e unha caixa de correos e que foi elaborado artesanalmente

Mércores 2 de decembro do 2020 Carballo ao día

Fabián Lage, autor do conxunto navideño que pode verse xa no Xardín Municipal

Fabián Lage, autor do conxunto navideño que pode verse xa no Xardín Municipal

O mes de Nadal comezou en Carballo con duras restricións pero coa sociedade involucrada cos sectores máis castigados pola crise provocada pola COVID-19. Coincidindo coa decisión da Xunta de Galicia de relaxar, aínda que timidamente, as medidas que afectan á hostalaría, dende o Concello de Carballo tamén queremos contribuír á dinamización de dous sectores económicos fundamentais para a economía local, como son o comercio e a hostalaría, anticipando as accións de promoción propias desta época do ano.

Hoxe mesmo quedaron instaladas na Praza do Concello as primeiras pezas dos elementos decorativos que poderán verse a partir de mañá por distintas rúas. Despois do éxito acadado o ano pasado, volven os renos e o trineo ao Xardín Municipal. Nesta ocasión apostamos por pezas artesanais elaboradas polo carballés Fabián Lage, e incluímos ademais unha caixa de correos para que os nenos e as nenas poidan depositar as súas cartas para Papá Noel, o Apalpador ou os Reis Magos. Este ano teremos sinalizada, tamén a partir de mañá, unha zona para fotografía, co obxectivo de evitar contactos cos renos e o trineo, tanto para evitar desperfectos como, sobre todo, dada a situación epidemiolóxica na que nos atopamos, por seguridade sanitaria.

O fermoso conxunto que loce xa no Xardín complementarase coa colocación dun total de 30 bastóns decorativos nos postes das luminarias de distintas rúas urbanas.

Dende o Concello de Carballo agradecemos a colaboración das empresas Dixardín e Ferroser. A esta última corresponderalle tamén mañá, un día antes da data prevista inicialmente, o acendido do alumeado de Nadal. Ao longo do día quedarán instalados os elementos decorativos pendentes nas rotondas, e ao anoitecer acenderase o alumeado. Este ano, por seguridade, non se celebrará o tradicional acto público.

Compartir: