Inicio Carballo ao día Novas Retirado da Furna Furada de Rebordelos un vertido...

Retirado da Furna Furada de Rebordelos un vertido de planchas de fibrocemento

Persoal de Protección Civil tivo que traballar con medidas especiais de seguridade polo escarpado do lugar e o tipo de residuo

Luns 1 de marzo do 2021

Non sen certa dificultade, porque o acceso á Furna Furada non é doado, persoal de Proteccion Civil Carballo, co apoio dun tractor, conseguiu acceder ao lugar no que hai unhas semanas alguén tirou planchas vellas de fibrocemento e retiralas con todas as medidas de seguridade. Un xestor autorizado encargarase agora de que os residuos reciban o tratamento axeitado.

No Concello de Carballo estamos moi orgullosos do noso litoral en xeral, e deste singular enclave da parroquia de Rebordelos en particular. Polo que se ve, alguén pretende convertelo nun vertedoiro, e pedimos a vosa colaboración para tratar de localizar ás persoas responsables e formular a denuncia correspondente.

A este respecto queremos lembrar que a nova Lei de residuos e solos contaminados de Galicia, aprobada a semana pasada polo Parlamento galego, define como unha sanción moi grave "o abandono, vertido ou eliminación incontrolada de residuos perigosos" e establece sancións económicas de 45.001 a 1.750.000 euros.

Compartir: