Últimos días de prazo para presentar series ao 8º Carballo Interplay

Mércores 9 de xuño do 2021

O día 15 de xuño pecha o prazo para participar na sección oficial da oitava edición do Festival de Contidos Dixitais Carballo Interplay, que se celebrará do 8 ao 11 de setembro. Todas aquelas persoas que o desexen participar na sección oficial, que repartirá 6.600 euros en premios, deben inscribir as súas series antes dese día de xeito gratuíto a través da web carballointerplay.com.

Para participar na Sección Oficial a concurso, as series deben ser producidas entre os anos 2017 e 2020 e ter un mínimo de 3 capítulos emitidos no momento de inscrición, pero poden ser de calquera duración, temática, xénero, de imaxe real ou de animación, nacionais ou internacionais. Entre as propostas recibidas, un xurado composto por profesionais do sector audiovisual e da cultura premiará a mellor serie estatal, a mellor serie internacional e a mellor serie en versión orixinal en galego con 800 euros e trofeo, para cada categoría. As escollas do xurado novo e máis do público levarán 400 euros e trofeo, cada unha.

O Carballo Interplay conserva ademais, na súa oitava edición, a dotación económica de 3000 euros para o premio a proxecto de webserie en galego. A data límite para presentarse é o 31 de xullo de 2021 e os proxectos deben ser creacións audiovisuais propias e orixinais, pensadas para seren publicadas e difundidas a través de internet e mediante capítulos, episodios ou partes (como mínimo tres), pero poden ser de imaxe real, animación, stop motion ou técnica combinada.