Inicio Carballo ao día Hemeroteca


Formulario de busca
O Quinteto Cimarrón pecha o Programa das Letras 2012 presentando o seu traballo "Vinte cordas"

XOVES 31 DE MAIO ÁS 20.30 HORAS

O Quinteto Cimarrón pecha o Programa das Letras 2012 presentando o seu traballo "Vinte cordas"

Luns 28 de maio do 2012

O Programa das Letras 2012 que organiza a Concellaría de Cultura, remata esta semana cun concerto do Quinteto Cimarrón que ademais, aproveitará a ocasión para presentar o seu traballo discográfico "Vinte Cordas". O Quinteto de cordas Cimarrón, que naceu en 2008, está integrado na súa totalidade por músicos cubanos graduados no Instituto Superior de Música de La Habana e que na actualidade residen en Galicia dedicándose á docencia, e a traballar en orquestras como a Sinfónica de Galicia ou en agrupacións tan coñecidas e exitosas como Luar na Lubre. O concerto deste xoves realizará un percorrido pola música clásica e popular cubana do século XIX e principios do XX. Poderemos escoitar os xéneros máis importantes da música cubana como son a contradanza, o danzón, o son ou a guarija. As obras escollidas mesturan, maxistralmente, tradición e modernidade, unha combinación máxica que se percibe gracias ao tratamento armónico que, o arranxista Eduardo Cana, acadou para cada un deles. Un concerto moi recomendable para todos os públicos que gusten da embelesadora música cubana e, para todos os públicos que queiran descubrir unha nova forma de sentir a música do país que un día foi a nosa segunda patria. Está previsto que o concerto teña lugar no Pazo da Cultura o xoves 31 de maio ás 20.30 horas. A entrada é libre ata completar aforo.

Máis de 80 alumnos e alumnas do CEIP Fogar coñecen de primeira man o funcionamento do Concello e da corporación carballesa

PERCORRERON A CASA CONSISTORIAL E FALARON CO ALCALDE

Máis de 80 alumnos e alumnas do CEIP Fogar coñecen de primeira man o funcionamento do Concello e da corporación carballesa

Venres 25 de maio do 2012

Máis de 80 alumnos e alumnas de 2º de Primaria do CEIP Fogar da capital carballesa veñen de visitar a Casa do Concello e de coñecer in situ o funcionamento do pleno da corporación e dos principais servizos municipais. O Alcalde de Carballo, Evencio Ferrero, solucionou as principais dúbidas dos nenos e nenas durante preto dunha hora no salón de plenos e despois, en grupos, o alumnado visitou o Rexistro Municipal, a comisaría da Policía Local e as dependencias de Servizos Sociais acompañados dos concelleiros de Obras, Servizos e Medio Rural, Luís Lamas; Medio Ambiente, Deporte, Formación e Emprego, Marcos Trigo; Igualdade e Benestar, Silvana Castro; e de Planificación e Desenvolvemento Urbano e Contratación, Milagros Lantes. O Alcalde contestou a moitas preguntas e curiosidades, moitas delas relacionadas coa súa persoa e referentes á súa idade, ao tempo que leva exercendo de rexedor e nomeadamente referidas á súa laboura como profesor de matemáticas. Especialmente sorprendidos quedaron os rapaces e rapazas ao saber datos como que o Concello carballés conta con 31.500 habitantes, ou que na administración local traballan máis de 200 persoas. Ferrero tamén tivo tempo para darlles algún pequeno consello. "Estudiade ben e sede responsables", recomendou, e "portádeos ben que estades todos fichados", rematou entre risas.

O pleno aborda a aprobación dun Plan Económico Financeiro para o Concello vixente durante o período 2013-2015

CRÉANSE 64 NOVAS PRAZAS DE ZONA AZUL

O pleno aborda a aprobación dun Plan Económico Financeiro para o Concello vixente durante o período 2013-2015

Venres 25 de maio do 2012

A sesión plenaria ordinaria do mes de maio que se celebra o luns 28 inclúe como un dos principais asuntos a aprobación do Plan Económico Financeiro do Concello de Carballo para o período 2013-2015. Trátase dunha medida que marca a Lei para corrixir o resultado da liquidación orzamentaria do ano 2011, que achega un remanente de tesourería negativo de 349.501,10 euros e un remanente de tesourería negativo para gastos xerais de 1.801.326,58 euros, o que incumpre o obxectivo de estabilidade. Este importe xorde porque o Concello está pendente de ingresos de elevada contía por parte doutras administracións, entre os que hai que subliñar preto de dous millóns de euros de fondos FEDER (Fondo Europeo de Desenvolvemento Rexional) correspondentes aos traballos do Fórum Carballo, xa rematados e abonados polo Concello. Para corrixir a situación debe elaborarse un plan cunha vixencia de tres anos que servirá de marco referencial e que recolle como única condición que neses tres exercicios o Concello debe contar con 982.131 euros máis de ingresos que de gastos non financeiros no balance orzamentario e recolle a posibilidade de recorrer a un crédito para manter a estabilidade. O Alcalde, Evencio Ferrero, explica que esta medida non é un plan de axuste dado que o Concello está ao día co pago cos provedores e subliña que a administración local espera consignar o ingreso dos fondos Feder en 2012 e así mellorar as finanzas. A previsión de ingresos do Concello para 2013 é de 19,5 millóns de euros.

O Festival Sereas e Piratas cumpre sete anos mesturando deporte, música e diversión durante dous días na praia de Razo

VENRES 20 E SÁBADO 21 DE XULLO

O Festival Sereas e Piratas cumpre sete anos mesturando deporte, música e diversión durante dous días na praia de Razo

Venres 25 de maio do 2012

O Festival Sereas e Piratas colle novos pulos no seu sétimo aniversario e coa incorporación de novos membros na organización, que recae na asociación 13 Lagartos, desafía á crise ampliando a dous días a súa duración, engadindo un festival diúrno e actividades deportivas e incrementando as actuacións nunha aposta pola promoción da praia de Razo e a súa contorna. A cita é os días 20 e 21 de xullo e conta no cartel con grupos de renome como Triángulo de Amor Bizarro, que actuaron na primeira edición do Sereas e Piratas sendo uns descoñecidos e que agora están na primeira liña da música nacional. O Festival de día terá lugar nunha Terraza-Bar a pé de praia de acceso gratuíto situada a carón do recinto dos concertos nocturnos. O programa recolle a actuación de dj's e de bandas seleccionadas no I Festival online Sereas e Piratas, a primeira edición dun concurso que quere darlle a oportunidade a grupos emerxentes que queiran tocar no festival e que serán elixidos a través de votacións en Facebook. Tamén estarán nesta terraza Perrito Diablo y Los Cadáveras, os carballeses Tínperis ou Dj Teresa da Praia. No caso dos concertos nocturnos, mestúranse grupos galegos con madrileños ou andaluces, buscando a calidade. O venres 20 tocan: Lobishome, Fantasmage, Tora! Tora! Tora!, La Débil e Joe Crepúsculo co peche de Lagartija Dj. O domingo 21 é a quenda de: Los Árboles, Pastillas Mamut, Pony Bravo e Triángulo de Amor Bizarro. Pecha Yo+Yo Dj.

O Trofeo Ciclista Concello de Carballo regresa ás rúas da vila e contará coa participación de 150 corredores

SÁBADO 26 DE MAIO A PARTIRES DAS 15.30 HORAS

O Trofeo Ciclista Concello de Carballo regresa ás rúas da vila e contará coa participación de 150 corredores

Xoves 24 de maio do 2012

O Club Ciclista Carballo Placasa, co patrocinio da administración local, organiza un ano máis o Trofeo Ciclista Concello de Carballo, que se celebra o sábado 26 de maio a partires das 15.30 horas. Está previsto que arredor de 150 corredores chegados de toda Galicia participen nesta cita que este ano regresa ás rúas do centro da capital municipal. Así, e segundo explicaron o Concelleiro de Deporte, Marcos Trigo, e a presidenta do Club Ciclista, Vanessa Loureiro, decidiuse adiantar a proba e sacala do programa das Festas de San Xoán precisamente para poder desenvolver a proba nas rúas da vila -que nas datas do patrón están ocupadas polos festexos- e para evitar que "quedara diluída no medio das festas", en verbas de Trigo. Loureiro subliña que dende a organización "estamos moi contentos de que a carreira volva a ser no centro do pobo, como hai moitos anos" e desexou que esta circunstancia mobilice a moito público. A cita está dirixida a categorías escolas, cadetes, femias e júnior, sendo o Club Ciclista Carballo Placasa un dos dous únicos clubs de Galicia (xunto con Porriño) que conta con sección feminina. Precisamente o Alcalde, Evencio Ferrero, manifestou a importancia de "apoiar e primar" as iniciativas deportivas para mulleres e agradeceu o labor do Club organizando o trofeo e creando "novos valores do deporte da bicicleta".

O Programa das Letras entra na súa recta final con música de violíns, contacontos e encontros culturais

MÉRCORES 23, VENRES 25 E SÁBADO 26 DE MAIO

O Programa das Letras entra na súa recta final con música de violíns, contacontos e encontros culturais

Mércores 23 de maio do 2012

O Programa das Letras 2012 ofrece, na recta final da súa andaina, varias actividades relacionadas coa música, os libros o teatro e o baile tradicional. A primeira delas é o concerto "Violíns de remate" o mércores 23 de maio. A cita percence ao ciclo de Novos Intérpretes do Conservatorio Profesional de Música de Carballo e ten como finalidade presentar unha mostra de violín de tres rapazas que remataron o sexto curso de Grao Profesional, é dicir, os seus estudos neste centro. No recital interpretarán un variado repertorio de temas e obras que foron aprendendo ao longo destes anos, aínda que se centrarán máis nas dos últimos cursos. As concertistas son Julia Arca, Patricia Fuentes e Nerea Lema, alumnas todas elas de Eduardo Coma, o profesor titular de violín deste centro e violinista de Luar na Lubre. Acompañará a estas tres alumnas a pianista Liutmila Scheviakova. O concerto celébrase no Salón de Actos do segundo andar do Pazo da Cultura a partir das 19.00 horas (non das 20.00 horas como figura no programa de man). A entrada é libre ata completar aforo. A outra cita musical destes días é o sábado 26 cos Encontros Culturais Arume, un festival de música e baile tradicional no Local Social de Berdillo ás 18.30 horas. Organiza a Asociación Xuvenil Arume e a entrada tamén é libre.

O Concello e a Consellería de Traballo continúan cos contactos para axilizar a posta en marcha do Fórum Carballo

TRAMITACIÓN PARA HOMOLOGAR 15 NOVAS ESPECIALIDADES

O Concello e a Consellería de Traballo continúan cos contactos para axilizar a posta en marcha do Fórum Carballo

Mércores 23 de maio do 2012

O Concello de Carballo e a Consellería de Traballo seguen a manter conversacións para materializar o traslado das oficinas do Servizo Galego de Colocación á nave 2 do complexo Fórum Carballo no barrio da Milagrosa, así como para a homologación das especialidades formativas que se impartirán no recinto, para centralizar todos os servizos relacionados coa formación e o emprego nas novas instalacións e iniciar a actividade o antes posible. O Alcalde de Carballo, Evencio Ferrero, acompañado do Concelleiro de Formación e Emprego, Marcos Trigo, vén de manter unha entrevista coa Directora Xeral de Formación e Colocación, Ana María Díaz Lopez, na que tamén estivo presente a Subdirectora xeral de Formación para o Emprego, María Jesús Budiño, na que se avanzou de cara á consecución deste obxectivo. Nestes momentos o Concello está tramitando a homologación de 15 especialidades formativas para o Fórum, ademais das oito xa concedidas hai dúas semanas, e durante a entrevista, de preto dunha hora de duración, tamén se falou dos detalles deste proceso e dos requisitos que se precisan. Concello e Consellería comparten a idea de que é necesario crear grandes centros de referencia, polo que o goberno carballés seguirá traballando e colaborando coas institucións autonómicas para converter o Fórum nun gran centro formativo.

O Descenso do Anllóns e o Concurso de Cachelas 2012 reparten máis de 3.000 euros entre premios e subvencións

INSCRICIÓNS: ATÉ O 20 DE XUÑO NO MUSEO DE BERGANTIÑOS

O Descenso do Anllóns e o Concurso de Cachelas 2012 reparten máis de 3.000 euros entre premios e subvencións

Martes 22 de maio do 2012

O Concello de Carballo, a través da Concellaría de Cultura que dirixe Mar Eirís, informa de que está aberto o prazo para anotarse na XXV edición do Concurso de Cachelas de San Xoán 2012. Poderán concorrer todos os grupos que o desexen, que deberán inscribirse no Museo de Bergantiños (Rúa Martín Herrera, 981 702 077) antes das 13.00 horas do mércores 20 de xuño de 2012. Así mesmo, está aberto o prazo para inscribirse no XV Descenso do Anllóns de San Xoán 2012. Poderán concorrer os equipos compostos por 3 ou máis membros que se inscriban no Museo de Bergantiños tamén antes das 13.00 horas do día 20 de xuño. Coa inscrición, cada equipo deberá entregar unha declaración na que farán constar que coñecen o percorrido, que aceptan as bases deste concurso e que eximen de responsabilidades á organización polos accidentes ou danos que puideran ocasionar e/ou sufrir os membros da embarcación. Os menores de idade entregarán tamén unha declaración asinada polo pai, nai, titor/a, autorizándolles a participar. Estes impresos facilítanse coa inscrición. Os interesados e interesadas en consultar as bases ao completo, poden facelo nesta mesma nova en sendos documentos en pdf.

Formación, innovación e venta online: os retos do sector turístico en Carballo e comarca segundo a Cámara de Comercio

O TURISMO ACTIVO: A ÁREA CON MAIOR POTENCIALIDADE

Formación, innovación e venta online: os retos do sector turístico en Carballo e comarca segundo a Cámara de Comercio

Martes 22 de maio do 2012

A formación, a mellora dos procesos de innovación e a aposta polos canais de comercialización online son algúns dos retos que deberá afrontar o sector turístico da Costa da Morte nos próximos anos para adaptarse ao novo modelo económico e aos cambios nos hábitos de consumo. Estas son algunhas das conclusións do estudo "Aproximación dos produtos turísticos emerxentes en Carballo e a súa área de influencia" elaborado en 2011 pola Cámara de Comercio da Coruña a través da Antena Local de Carballo (que conta coa colaboración do Concello) e a través do Observatorio Económico Local. Esta análise vén de ser presentada no Viveiro de Empresas do Polígono Industrial de Bértoa polo presidente da Cámara da Coruña, Marcelo Castro-Rial Schuler; o Alcalde de Carballo, Evencio Ferrero; e Ángel Noguerol Urrutia, técnico da Antena Local. A presentación tivo lugar despois da reunión mensual do Comité Executivo da Cámara, que por vez primeira se celebrou en Carballo. Durante o acto, Ferrero agradeceu a colaboración da institución cameral e desexou que, coa colaboración de traballadores, empresarios e institucións, "superemos estas circunstancias adversas" e se constitúa, a través do porto exterior, o eixo industrial Arteixo-A Laracha-Carballo, porque "só con proxectos comúns seremos quen de remontar".

A Xunta de Goberno adxudica a redacción do Proxecto Anllóns-Bardoso de mellora do subministro de auga potable

LUZ VERDE A CONVENIOS PARA A REALIZACIÓN DE PRÁCTICAS LABORAIS

A Xunta de Goberno adxudica a redacción do Proxecto Anllóns-Bardoso de mellora do subministro de auga potable

Luns 21 de maio do 2012

A Xunta de Goberno Local reunida en sesión ordinaria vén de aprobar fóra da orde do día a adxudicación da "Redacción do proxecto de mellora do sistema xeral de abastecemento a Carballo (Anllóns-Bardoso)" cofinanciado polo Fondo Europeo de Desenvolvemento Rexional (Feder). Será elaborado pola empresa Egis Eyser por un importe total de 73.573,78 euros, cunha baixa de máis de 20.000 euros sobre o prezo de licitación (de 94.362,24 euros). O "Proxecto Anllóns-Bardoso. Posta en valor dos ríos" ten un orzamento global de 4.145.796,5 euros, dos cales 2.902.057,59 euros serán achegados polos fondos europeos. Supón o desenvolvemento de actuacións para repartir a presión da auga entre os ríos Anllóns e Bardoso, facendo a captación dende dúas canles. Estaría prevista a creación dunha nova ETAP (Estación de Tratamento de Auga Potable) no río Bardoso e a construción dun depósito regulador intermedio entre o actual depósito do Paraíso (en Berdillo) e o situado na rúa Vila de Corcubión da capital municipal. Esta iniciativa mellorará considerablemente o subministro e a calidade das augas na capital carballesa, ademais da protección do Anllóns en situacións de seca. O seguinte paso, unha vez redactado o proxecto, será a licitación dos traballos, que deben comezar no ano 2012.

Os cativos e cativas do CEIP Fogar abren a semana de actividades do 25 aniversario dos Voluntarios de Protección Civil

AS XORNADAS CONTINÚAN ATÉ O SÁBADO 26 DE MAIO

Os cativos e cativas do CEIP Fogar abren a semana de actividades do 25 aniversario dos Voluntarios de Protección Civil

Luns 21 de maio do 2012

Arredor dun centenar de cativos e cativas do CEIP Fogar de Carballo abriron hoxe a semana de actividades que a Agrupación de Voluntarios de Protección Civil ten organizado para celebrar o seu 25 aniversario. Despois de ver un vídeo no que se resume a historia da agrupación, os nenos e nenas recibiron unha breve clase teórica no auditorio da nave 1 do Fórum Carballo, para logo percorrer unha exposición na que se exhiben imaxes, vídeos e, sobre todo, grande parte do material que emprega Protección Civil nos seus labores de rescate. Así, hai dende unha zodiac e unha moto de auga, ata material para apagar lumes no monte ou para axudar en toda clase de accidentes. Por último, en grupos de 15, o alumnado asistiu a obradoiros prácticos sobre cómo enfrontarse a lumes en situacións cotiás, dende un incendio nunha tixola ata nun ordenador. Neste último caso, moitos dos rapaces e rapazas tiveron a oportunidade de empregar un extintor para apagar un pequeno incendio. Así mesmo, aprenderon as claves da RCP (reanimación cardio pulmonar) ou as precaucións que deben tomar para non provocar un lume. Este programa repetirase ao longo da semana non só con alumnado doutros centros, senón tamén con colectivos como os maiores dos centros da terceira idade carballeses, a Asociación de Amas de Casa ou Aspaber.

A maioría das demandas de veciños e veciñas nos catro primeiros meses de 2012 refírense a actuacións de Carballo Limpo

REXISTRÁRONSE PRETO DE 500 AVISOS NO CONCELLO

A maioría das demandas de veciños e veciñas nos catro primeiros meses de 2012 refírense a actuacións de Carballo Limpo

Venres 18 de maio do 2012

As Brigadas de Obras e Medio Ambiente do Concello de Carballo teñen atendido e solucionado un total de 485 demandas realizadas por veciños e veciñas do municipio durante os catro primeiros meses do ano 2012. Por primeira vez nos últimos anos a maioría destas peticións non se refiren a arranxos no alumeado público, senón que están centradas nas actuacións incluídas dentro do programa Carballo Limpo, con 217 peticións fronte ás 214 de puntos de luz. Carballo Limpo comprende diversas accións destinadas a conservar o medio ambiente grazas á colaboración da veciñanza, e dentro das súas funcións inclúense, por exemplo, os labores de desratización ou os de mantemento dos colectores de recollida de lixo e de recollida selectiva. Inclúe, así mesmo, os servizos do Punto Limpo e o Punto Limpo Móbil, ademais da recollida de cartón pregado a pé de porta. Outras peticións dos veciños e veciñas durante o primeiro cuadrimestre de 2012 céntranse en arranxos e melloras nos sinais informativos e de tráfico (2 avisos), nos servizos de auga, luz ou teléfono (38), no deterioro de equipamentos e mobiliario urbano municipal (5) e en arranxos no sistema viario (9). Os veciños e veciñas poden denunciar as deficiencias ou demandar os arranxos que consideren oportunos a través do número de teléfono 981 704 700 ou ben no correo electrónico <infocarballo@carballo.org>.

Compartir: