Inicio Carballo ao día Hemeroteca


Formulario de busca
Carballo acollerá a celebración dun Curso de Panadería-Bolería incluído nas propostas da Rede Xiana

INSCRICIÓNS ATÉ O 30 DE ABRIL

Carballo acollerá a celebración dun Curso de Panadería-Bolería incluído nas propostas da Rede Xiana

Xoves 22 de abril do 2010

A Concelleira de Formación, Emprego e Participación Veciñal, María Manso, informa de que o Concello de Carballo participa, un ano máis, no proxecto Rede Xiana, promovido pola Deputación da Coruña e cofinanciado con cargo ao Fondo Social Europeo. Un total de 90 concellos de toda a provincia forman parte do proxecto co obxectivo de fomentar o emprego, mellorando a formación e a capacitación profesional das persoas desempregadas. A Deputación da Coruña seleccionou a Carballo para impartir o curso de Panadería-Bolería que contará con 18 alumnos/as desempregados/as pertencentes aos sectores con maior taxa de desemprego e que se desenvolverá na parroquia carballesa da Brea no segundo semestre do ano 2010. O prazo para inscribirse neste curso remata o venres 30 de abril. Para máis información, os interesados e interesadas poden acudir ao Centro Municipal de Formación, ao teléfono 981 755 211 ou tamén á páxina web <www.redexiana.org>.

A compañía madrileña Aracaladanza presenta o espectáculo infantil 'Pequeños paraísos' en Primavera enDanza

VENRES 23 DE ABRIL ÁS 20.00 HORAS

A compañía madrileña Aracaladanza presenta o espectáculo infantil 'Pequeños paraísos' en Primavera enDanza

Martes 20 de abril do 2010

Os máis cativos e cativas tamén teñen espazo no programa de Primavera enDanza 2010. Nesta ocasión trátase da compañía madrileña Aracaladanza, especializada en espectáculos dirixidos ao público infantil e que é un grande referente en toda España. Na súa proposta 'Pequeños paraísos' reducen o mundo a un xardín. Hai cereixas, e bambáns e trapecistas, peixes voadores, e paxarracos, flores e xoias espléndidas pechadas en caixas. Todo aparece e desaparece polo escenario sen aparente orde nin concerto. As bailarinas, inmersas nun ritmo trepidante, son un único organismo que baila e interpreta e no que moven bonecos e monicreques. A representación, dunha duración de 50 minutos, é o venres 23 de abril ás 20.00 horas no Pazo da Cultura e o prezo da entrada é de 3,5 €, de 2,5 € con desconto. As entradas poden reservarse nas oficinas situadas no primeiro andar do Pazo da Cultura ou mercarse dende dúas horas antes do inicio do espectáculo no despacho de billetes do Pazo. Máis información no 981 704 300.

A Policía Local de Carballo conta cun novo vehículo de control de tráfico con etilómetro

O OBXECTIVO É INDUCIR AOS CONDUTORES A EVITAR O ALCOL

A Policía Local de Carballo conta cun novo vehículo de control de tráfico con etilómetro

Luns 19 de abril do 2010

O Alcalde de Carballo, Evencio Ferrero, vén de recibir de mans do Subdelegado do Goberno, José Manuel Pose Mesura, e do Xefe Provincial de Tráfico, Pedro Pastor, un novo vehículo de control de tráfico equipado cun etilómetro que permitirá realizar controis de alcolemia nas estradas da comarca. Este coche substitúe a outro que xa ten cumprido co seu período de servizo, e que viña sendo utilizado até o de agora. O equipo terá a súa base permanente na Xefatura da Policía Local de Carballo, aínda que está previsto establecer colaboracións coas forzas de seguridade doutros concellos de Bergantiños e da Costa da Morte para poder realizar controis en momentos puntuais, como por exemplo nalgunhas festas ou romarías. No acto de entrega do novo vehículo tamén estiveron presentes o Xefe da Policía Local, Constantino Vázquez; o Tenente de Alcalde, José Antonio Viña; o Concelleiro de Seguridade e Tráfico, Benedito Viña; e a Concelleira de Facenda e Patrimonio, María Jesús Vázquez.

Uxía P. Vaello presenta o espectáculo 'Assemblage' no marco do programa Primavera enDanza

SÁBADO 27 DE ABRIL ÁS 21.00 HORAS

Uxía P. Vaello presenta o espectáculo 'Assemblage' no marco do programa Primavera enDanza

Venres 16 de abril do 2010

A primeira fin de semana de Primavera enDanza complétase, ademais de co espectáculo de Quique Peón, 'Ovay', con 'Assemblage', unha proposta de 'danza teatro' de Uxía P. Vaello. Esta bailarina e coreógrafa galega, xunto con Laura Lizcano (Andalucía) e Rafaela Salvador (Portugal), crea un proxecto no que o tema central é a imaxinación, entendida como a sucesión de imaxes. 'Assemblage' é un lugar e dúas persoas, dúas imaxes físicas, reais. As dúas bailarinas no escenario transitan polo espazo a modo dunha viaxe que as enfronta continuamente a unha terceira presenza, a unha imaxe mental que, a través da palabra, comeza a influír na imaxinación das dúas imaxes reais. O espectáculo, dunha duración prevista de 60 minutos, é o sábado 17 de abril ás 21.00 horas e o prezo da entrada é de 3,5 €, de 2,5 € con desconto. As entradas poden reservarse nas oficinas do Pazo da Cultura ou mercarse dende dúas horas antes do inicio do espectáculo no despacho de billetes do Pazo.

O Concello informa da realización de catro cursos formativos no marco do proxecto Fórum Carballo

INSCRICIÓNS ATÉ O 5 DE MAIO

O Concello informa da realización de catro cursos formativos no marco do proxecto Fórum Carballo

Venres 16 de abril do 2010

O Concello informa da realización de catro accións formativas gratuítas incluídas no proxecto Fórum Carballo, o Centro de Dinamización Socioeconómico Sostible do municipio situado no barrio da Milagrosa. Estas actividades están financiadas nun 70 por cento a través do Fondo Europeo de Desenvolvemento Rexional (FEDER) e están dirixidas a persoas entre 16 e 65 anos, tanto desempregados como en activo. Os cursos son os seguintes: Soldadura TIG; Carpintaría de madeira; Colocador de prefabricados lixeiros; e Instalador electricista. Está previsto que as prácticas se realicen no propio edificio Fórum Carballo para que os participantes nos cursos colaboren na construción do complexo. Os interesados e interesadas poden inscribirse até o 5 de maio no Centro de Formación de Carballo, situado na Avenida da Cristina, s/n. Máis información no 981 755 211.

O proxecto da nova Escola Obradoiro carballesa persegue a mellora do entorno do Bosque do Añón

O CONCELLO SOLICITA FINACIAMENTO DA XUNTA POR 1.002.552 EUROS

O proxecto da nova Escola Obradoiro carballesa persegue a mellora do entorno do Bosque do Añón

Venres 16 de abril do 2010

O Concello de Carballo vén de entregar o mércores 14 de abril ante a Consellería de Traballo e Benestar a solicitude para poñer en marcha unha nova Escola Obradoiro titulada 'Bosque animado', que ten como obxectivo a recuperación e mellora do entorno dos terreos municipais situados no Bosque do Añón para o aproveitamento de todos os veciños e veciñas, así como a creación dunha nave no polígono de Bértoa para uso da Brigada de Obras. A proposta, elaborada polo Centro de Formación, está dirixida a menores de 25 anos e a candidatura inclúe cinco especialidades formativas: carpinteiro/a metálico e de PVC; canteiro/a; electricista de edificios; instalador/a de elementos de carpintería de madeira; e fábricas de albanelería. Está pensada para acoller a 48 alumnos e alumnas durante un período formativo de 18 meses. A solicitude de financiamento ante a Consellería ascende a 1.002.552 euros, mentres que o importe global do proxecto é de 1.291.284 euros.

O Concello ten recibido no primeiro trimestre de 2010 un total de 445 avisos de veciños e veciñas

A MAIORÍA, 248, REFÍRENSE AO ALUMEADO PÚBLICO

O Concello ten recibido no primeiro trimestre de 2010 un total de 445 avisos de veciños e veciñas

Xoves 15 de abril do 2010

No primeiro trimestre do ano 2010 o Concello, a través da Alcaldía, ten recibido un total de 445 avisos de veciños e veciñas para realizar servizos de mantemento e arranxos en todo o territorio municipal, unha cifra que supón un incremento dun 15 por cento respecto do mesmo período de 2009, e dun 38 por cento respecto de 2008. A Brigada de Obras é a encargada de xestionar estas peticións, que na súa maioría (con 248 chamadas e un 55,7 por cento do total) refírense a substitucións e reparacións no alumeado público. Dende o ano 2008 este servizo non ten deixado de medrar, pasándose de 188 avisos no primeiro trimestre dese ano, a 200 en 2009 e aos 248 de 2010. As demandas veciñais tamén se centran nos sinais de tráfico; nos servizos básicos; en Carballo Limpo; nos equipamentos dos edificios municipais; na limpeza de espazos públicos ou na mellora da rede viaria. Os veciños e veciñas poden realizar as súas peticións ou demandas no teléfono 981 704 700.

Aberto o período de cobro voluntario dos Padróns fiscais do Concello de Carballo até o 14 de xuño

AS DOMICILIACIÓNS CÓBRANSE A PARTIRES DO 12 DE MAIO

Aberto o período de cobro voluntario dos Padróns fiscais do Concello de Carballo até o 14 de xuño

Mércores 14 de abril do 2010

O Concello de Carballo informa aos contribuíntes de que está aberto o período voluntario de cobro das liquidacións resultantes dos Padróns Fiscais das Taxas de Lixo Vivenda, Lixo Comercial, Reserva espacio estacionamento e vaos, e o Imposto de Vehículos de Tracción Mecánica correspondentes todos eles ó período impositivo de 2010. O prazo de pago abrangue dende o día 12 de abril até o día 14 de xuño de 2010. Durante este período, os contribuíntes poderán facer efectivo o pago das correspondentes débedas nas oficinas da Recadación Municipal, situadas na rúa Camiño Novo nº 7 entreplanta Galerías Comerciais, en horario de luns a venres, de 09:00 a 13.30 horas, e de 16:00 a 18:30 horas. Os recibos domiciliados pasaranse ao cobro a partires do día 12 de maio de 2010.

A Policía Local e os servizos de emerxencias teñen atendido un total de 16 accidentes e 7 incendios no mes de marzo

HOUBO UN TOTAL DE CINCO FERIDOS

A Policía Local e os servizos de emerxencias teñen atendido un total de 16 accidentes e 7 incendios no mes de marzo

Mércores 14 de abril do 2010

O informe mensual da Policía Local carballesa indica que en marzo de 2010 téñense rexistrado un total de 16 accidentes de tráfico -tres máis que en febreiro deste mesmo ano, aínda que un menos que en xaneiro-, mentres que o número de feridos pasa a 5 fronte aos 2 de febreiro e os 7 de xaneiro. Hai que mencionar a presenza dun peón ferido durante o pasado mes, mentres que, dos feridos en vehículos, un é un condutor dun turismo e outros tres, ocupantes. No que respecta ao apartado de delictos, furtos, danos e outros, téñense producido un total de 16 incidencias deste tipo, das que catro son roubos con forza (a mesma cifra que en febreiro); tres son roubos de vehículos e un caso refírese á violencia de xénero, ademais dun roubo no interior dun vehículo, entre outros. Hai que subliñar que no mes de marzo non se ten rexistrado ningunha denuncia no municipio por roubos polo método do 'tirón'.

A Compañía Quique Peón abre o programa de Primavera enDanza co espectáculo 'Ovay'

VENRES 16 DE ABRIL ÁS 21.00 HORAS

A Compañía Quique Peón abre o programa de Primavera enDanza co espectáculo 'Ovay'

Mércores 14 de abril do 2010

O director, bailarín e intérprete Henrique Peón Mosteiro, coñecido como Quique Peón, é o responsable de 'Ovay', o espectáculo que abre o programa de actividades do programa Primavera enDanza, que encherá o Pazo da Cultura de baile as fins de semana do mes de abril. 'Ovay' é a viaxe interior dun bailarín, o percorrido polos estadios da súa evolución persoal, coas preguntas e respostas do que foi, do que é e do que está por ser. Un bailarín enfróntase con valentía para reivindicar unha identidade cultural renovada, para procurar un equilibrio maduro entre o enxebre e o depurado. Esta produción conta co respaldo do Centro Coreográfico Galego e ten unha duración prevista duns 50 minutos. A cita é o venres 16 de abril ás 21.00 horas e o prezo da entrada é de 3,5 €, de 2,5 € con desconto. As entradas poden reservarse nas oficinas do Pazo da Cultura ou mercarse dende dúas horas antes do inicio do espectáculo no despacho de billetes do Pazo.

Principian os traballos de reforma integral do mercado carballés coa sinatura da acta de replantexamento

O PRAZO DE EXECUCIÓN PREVISTO É DE 10 MESES

Principian os traballos de reforma integral do mercado carballés coa sinatura da acta de replantexamento

Martes 13 de abril do 2010

O Alcalde de Carballo, Evencio Ferrero, así como responsables da empresa carballesa adxudicataria dos traballos, Decoraciones J. Bello, e varios técnicos veñen de asinar hoxe, martes 13 de abril, a acta de replantexamento que marca o inicio das obras do proxecto de 'Execución da remodelación do Mercado Municipal'. A sinatura tivo lugar no propio edificio do mercado, que xa conta co valado de seguridade, coas casetas de obra e co material necesario para emprender a reforma integral. Así mesmo, xa se ten realizado ao completo o traslado provisional dos postos afectados polas melloras nos locais exteriores -as primeiras no plan de obra-, que polo momento exercen a súa actividade no primeiro andar do edificio, aínda que tamén serán os primeiros en ocupar os novos postos. O prazo de execución estipulado para a finalización da reforma é de 10 meses dende o día de hoxe, nunha actuación cun orzamento de 1.881.446,32 euros.

O Concello solicita a concesión dunha nova Escola Obradoiro para formar a menores de 25 anos

XUNTA DE GOBERNO LOCAL

O Concello solicita a concesión dunha nova Escola Obradoiro para formar a menores de 25 anos

Luns 12 de abril do 2010

A Xunta de Goberno Local, reunida en sesión ordinaria o luns 12 de abril, vén de aprobar a solicitude á Consellería de Traballo e Benestar da Xunta, ao abeiro da Orde do 18 de marzo de 2010, do desenvolvemento dunha nova Escola Obradoiro no municipio. Baixo o título de 'Bosque animado', esta proposta, elaborada polo Centro de Formación, está dirixida a menores de 25 anos. A candidatura inclúe cinco especialidades formativas: carpinteiro/a metálico e de PVC; canteiro/a; electricista de edificios; instalador/a de elementos de carpintería de madeira; e fábricas de albanelería. Está pensada para acoller a 48 alumnos e alumnas durante un período formativo de 18 meses. O financiamento previsto ascende a un millón de euros, dividido en tres fases: unha primeira de 283.017,60 euros; unha segunda de 357.002,88 euros; e unha terceira de 362.532,48 euros.

Compartir: