MEDIO AMBIENTE
Mércores 1 de outubro do 2008
O Concello carballés pon o punto e final esta fin de semana -en concreto o sábado 4 de outubro- aos ciclos de obradoiros e circuítos de 'Ciencia Divertida', que tiveron como obxectivo educar na sustentabilidade e no coidado da natureza a toda a cidadanía. Esta actividade, organizada pola Concellaría de Medio Ambiente que dirixe José Antonio Viña, contou cunha grande afluencia, sobre todo por parte dos máis cativos, que puideron reflexionar sobre temas como a prevención da seca, o cambio climático, a reciclaxe, as enerxías renovables ou o desenvolvemento sostible.
SERVIZOS
Martes 30 de setembro do 2008
O Concello de Carballo, a través da Concellaría de Servizos que dirixe Luís Lamas, informa das limitacións para o depósito de lixo nos colectores municipais de residuos. Así, dende este departamento lémbrase aos cidadáns que os residuos orgánicos só deben depositarse no colector entre as 19:00 e as 22:00 horas da tarde, sempre nunha bolsa pechada, e de luns a sábado. Deste xeito, o Concello recorda aos veciños e veciñas que a ordenanza prohíbe baixar o lixo en domingo.
SESIÓN PLENARIA
Martes 30 de setembro do 2008
A corporación de Carballo celebrou o luns 29 de setembro unha sesión plenaria ordinaria na que os concelleiros deron o visto bo por unanimidade á cesión de terreos para a creación dunha terceira Galescola na capital municipal, que se situaría no entorno dos polígonos urbanos que se están desenvolvendo arredor da rúa Perú -entre as rúas Bos Aires e Pontevedra. Este novo servizo contará con seis módulos de ensino e o recinto edificarase nuns terreos de 2.300 metros cadrados. O goberno local espera con esta nova obra, que se une ao centro 'As Landras' -que este ano se ten incorporado á rede de Galescolas do Consorcio Galego- e á futura Galescola do entorno da estrada de Razo, completar a rede pública de escolas infantís do Concello.
OUTONO DE TEATRO
Martes 30 de setembro do 2008
O Concello de Carballo, a través da Concellaría de Cultura que dirixe Belén Lendoiro, informa das condicións e prezos para a compra de bonos, minibonos e entradas para as representacións incluídas no Festival Internacional Outono de Teatro (FIOT) de 2008. Como noutras ocasións, poñeránse á venda a través da taquilla do Pazo da Cultura. No caso dos bonos (a 43 euros), a venda principia hoxe -martes 30 de setembo-, mentres que os minibonos (a 26 e 21 euros) e as entradas (todas a 5 euros excepto para as obras 'Don Juan Tenorio' e 'Brokers', que serán a 10 euros) estarán a disposición do público a partir do próximo luns 6 de outubro. Non se admiten reservas nin de bonos nin de minibonos.
NOVAS TECNOLOXÍAS
Luns 29 de setembro do 2008
Os rapaces dos colexios 'A Cristina' de Carballo e 'San Vincenzo' de Vimianzo foron os protagonistas da inauguración oficial, a través dunha multitudinaria videoconferencia, do novo Telecentro e Aula de Informática do Concello carballés. A cita estivo presidida nas instalacións do Pazo da Cultura polo Subdirector Xeral de Telecomunicacións e Audiovisual da Xunta de Galicia, Manuel Conde Mouzo, así como polo Alcalde de Carballo, Evencio Ferrero. Tamén estivo presente -xunto cos alumnos do seu Concello- o rexedor de Vimianzo, Alejandro Rodríguez, a través das pantallas deste novo centro tecnolóxico que xa está a disposición dos veciños e veciñas.
XUNTA DE GOBERNO LOCAL
Luns 29 de setembro do 2008
A Xunta de Goberno Local do Concello de Carballo aprobou hoxe -luns 29 de setembro- na súa sesión ordinaria o proxecto das obras de 'Derrubo dun edificio de 10 vivendas e locales' situado na rúa do Sol e que ten un orzamento base de contrata que supera os 100.000 euros. Mediante a execución destes traballos, o Concello carballés pretende ampliar o aproveitamento da zona da ribeira do río Anllóns, que nalgúns puntos da capital municipal está invadida por varios bens inmobles.
CARBALLO CEDE OS TERREOS PARA UNHA TERCEIRA GALESCOLA
Sábado 27 de setembro do 2008
A corporación carballesa celebra o luns 29 de setembro unha sesión plenaria ordinaria na que un dos principais asuntos da orde do día é a creación dunha comisión con representantes de todos os grupos políticos, técnicos e tamén veciños das parroquias afectadas para poder emprender o deslinde entre os concellos de Carballo e A Laracha. O obxectivo é definir claramente as fronteiras entre os dous municipios, que transcorren polas parroquias de Sofán, Berdillo, Bértoa, Vilela, Noicela e Rebordelos.
CARBALLO SAUDABLE
Venres 26 de setembro do 2008
O sábado 27 de setembro principian na parroquia de Cances os primeiros obradoiros de hábitos saudables das ‘Xornadas de Saúde para Mulleres’, un programa específico destinado a coidar a condición física e mental das veciñas de Carballo. A través de varios cursiños e charlas, e dentro do programa ‘Carballo Saudable’, as beneficiarias poderán reflexionar sobre os prexuízos para o seu benestar e tentar atopar os mecanismos para combater estas situacións que minan a súa saúde.
FORMACIÓN
Venres 26 de setembro do 2008
Os emprendedores de Carballo contarán nos próximos días cun apoio para poder elaborar un plan de empresa e solicitar un microcrédito que lles permita levar adiante a súa idea de negocio. Así, o Concello e a Obra Social de Caixa Galicia organizan o cursiño gratuíto 'Cómo elaborar un plan de empresa para solicitar un microcrédito', unha iniciativa na que poderán participar un total de 20 persoas e que pretende apoiar aos emprendedores "nunha situación económica difícil na que interesa o desenvolvemento deste tipo de cursos", en verbas do Concelleiro de Promoción Económica, Xosé Manuel García Guillín.
FIOT
Venres 26 de setembro do 2008
A XVII edición do Festival Internacional Outono de Teatro (FIOT) arrinca asumindo riscos e novidades, afrontando a súa faciana máis internacional, lembrando o pasado e mirando cara ao futuro coa intención de ser "o festival de referencia en Galicia", segundo explicou o presidente da Asociación Cultural Telón e Aparte, Alberto Sueiro, e tamén co reto de "darlle unha estabilidade ao teatro" e "situar a Carballo no panorama cultural de Galicia", en verbas do Alcalde da vila, Evencio Ferrero. Así o subliñaron na presentación que tivo lugar o venres 26 de setembro no Pazo da Cultura e que contou coa presenza do 'rei da comedia', o humorista carballés Rober Bodegas.
ENTREVISTA EN SANTIAGO
Mércores 24 de setembro do 2008
O Alcalde de Carballo, Evencio Ferrero, acompañado pola Concelleira de Educación, Mar Eirís, expuxo onte -martes 23 de setembro- ante o Secretario Xeral de Educación, Benito Fernández Rodríguez, e ante a subdirectora de Ordenación Educativa, Paz Filloy, as principais necesidades dos centros escolares do municipio e as deficiencias que existen no Concello en materia educativa. A pesares de que en principio estaba prevista a presencia da Conselleira, Laura Elena Sánchez Piñón, finalmente non puido asistir á reunión. Os representantes municipais subliñaron, entre outras cousas, a necesidade de ampliar o número de aulas nos colexios de cara ao próximo curso 2009-2010, sobre todo polo aumento de nenos e nenas en idade de escolarización que se ten producido nos últimos tempos.
FACENDA
Luns 22 de setembro do 2008
O Concello de Carballo emprende a campaña de cobro dos padróns fiscais de setembro de 2008. Por resolucións da Alcaldía do pasado 27 de agosto, a administración local aprobou as cantidades relativas ao Imposto sobre Actividades Económicas (IAE) de 2008, ao Imposto sobre Bens Inmobles Urbanos e ao Imposto sobre Bens Rústicos. No primeiro caso, a recadación é de 245.542,87 euros; no segundo, de 3.036.473,61 euros; e por último, a taxa sobre bens rústicos supón 34.134,81 euros. O período de cobro dos ditos tributos abrangue desde o día 15 de setembro ate o 20 de novembro, ambos os dous inclusive.
.jpg)
