CONVOCATORIA
Martes 3 de xullo do 2007
O alcalde de Carballo, Evencio Ferrero, e os portavoces das diferentes formacións políticas do Concello, Benedico Viña polo BNG, José Antonio Viña polo PSOE, Alberto Sueiro polo PP e Manuel Andrade por TEGA, mantiveron esta mañá unha xuntanza para analizar os temas a abordar na sesión plenaria extraordinaria a celebrar o vindeiro xoves, ás 20,30 horas, na Casa do Concello. Será o primeiro pleno da lexislatura e contará con nove puntos na orde do día, entre os que destacan as propostas de comisións informativas permanentes, representación da corporación en órganos colexiados ou os cargos da corporación en réxime de dedicación exclusiva e retribucións.
MULLER
Luns 2 de xullo do 2007
Dúas mulleres e os seus fillos, do concello de Carballo, están a disfrutar dunha estancia de dez días na costa mediterránea con todos os gastos pagados. Ambas fixeron a solicitude no Centro de Información á Muller para participar dun programa que requería que tiveran fillos e fillas , de entre 2 e 12 anos, exclusivamente ao seu cargo.
SAN XOÁN 2007
Luns 2 de xullo do 2007
Un grande número de carballeses e carballesas despediron o San Xoán coa celebración da Festa do Bosque, que organizou un ano máis a Peña Gastronómica Os larpeiros. As bombas de palenque anunciaron ao medio día o inicio dunha festa que se está a converter nun punto de obrigada referencia, recuperando a forza que tiña hai tempo e da que poderon disfrutar nenos e maiores. A Festa do Bosque foi todo un éxito tanto a nivel organizativo como de participación.
OBRAS
Luns 2 de xullo do 2007
O alcalde de Carballo, Evencio Ferrero, asinou esta mañá tres contratos para a realización de diferentes obras no concello. Son os relativos á Ampliación do paseo fluvial no parque do Anllóns e polígonos 45 e 46, o Acondicionamento da praza de Ramil, en Sísamo e a Apertura de camiños en Baldaio.
SAN XOÁN 2007
Venres 29 de xuño do 2007
A tradicional Festa do Bosque porá o punto e final ás festas de San Xoán o vindeiro domingo. O Bosque do Añón convertirase, a partir das 12,00 horas, no punto de encontro entre a tradición e o lecer, unha mestura da que serán partícipes moitos carballeses. Baixo a organización da Peña Gastronómica Os larpeiros, desenvolverase ao longo do día un amplo programa de actividades para todas as idades, que comezará co lanzamento das bombas de palenque ás 12,00 horas. A sesión vermú, prevista para as 14,00 horas, correrá a cargo do Dúo Época.
INDUSTRIA
Venres 29 de xuño do 2007
O vindeiro 17 de xullo procederase á adxudicación das obras do polígono industrial de Bértoa, segundo manifestou o alcalde de Carballo, Evencio Ferrero, logo de participar no Consello de Administración e Xunta Xeral de Xestur no día de onte. Un total de 31 empresas presentaron ofertas, até agora, para asumir uns traballos que superan os 13 millóns de euros de orzamento. Estes afectan á unha primeira fase da actuación do ámbito de 730.000 metros cadrados.
GALARDÓN
Venres 29 de xuño do 2007
Cruz Vermella Española fixo entrega esta mañá ao Concello de Carballo, a través da súa Asamblea Local, dun Diploma de Honra pola colaboración prestada ao longo dos últimos anos. A presidenta da Asamblea Local, Matilde Anido, fixo entrega do diploma ao alcalde de Carballo, Evencio Ferrero, nun acto no que tamén participaron o vicepresidente da Cruz Vermella en Carballo, Juan Cancela, e a súa coordinadora, Jessica Pérez. Carballo pasa a ser así un dos poucos concellos de Galicia que conta con esta distinción.
CULTURA
Xoves 28 de xuño do 2007
O alcalde de Carballo, Evencio Ferrero, recibiu na Alcaldía do Concello ao Grupo de Teatro Nueva Vida, do Centro Penitenciario de Teixeiro, que esta tarde actúa no Pazo da Cultura. O grupo está composto por quince persoas que representarán, a partir das 19,00 horas, a obra Unha comedia de vida. Na recepción tamén estivo presente a concelleira de Cultura, Belén Lendoiro.
ENSINO
Xoves 28 de xuño do 2007
A Escola Oficial de Idiomas de Carballo ven de abrir o prazo de acceso e matrícula para o curso 2007/2008 en idiomas sen preinscrición. Poderán formalizar a matrícula os aptos presenciais en xuño de 2007, a alumnado do plan de potenciación de idiomas en IES (que supere ciclo en xuño de 2007) e o alumnado de That´s English! que supero ciclo en xuño de 2007. O prazo estará aberto até o 13 de xullo. No mes de setembro abriranse outros prazos de inscrición para outros supostos.
LITORAL
Xoves 28 de xuño do 2007
O alcalde de Carballo, Evencio Ferrero, acudiu no día de onte a Santiago para participar no acto de entrega de bandeiras azuis aos concellos galegos que contarán con este distintivo na época estival. A praia de Razo contará, un ano máis, con este distintivo que recoñece o cumprimento de requisitos de calidade de augas, servizos e realización de actividades de información, educación e xestión ambiental.
ECONOMÍA
Mércores 27 de xuño do 2007
A concellaría de Promoción Económica do Concello de Carballo iniciará en breve unha rolda de contactos cos principais sectores empresariais da localidade. O obxectivo das reunións será o de coñecer de primeira man as necesidades e propostas dos empresarios de cara ao desenvolvemento do concello.
CULTURA
Mércores 27 de xuño do 2007
O Concello de Carballo, o Café Valle Inclán e a Marcha Mundial das Mulleres de Bergantiños organizan este mércores, 27 de xuño, a conversa con María Reimóndez, autora de O club da calceta, dentro do proxecto Literactúa. O acto terá lugar no Café Valle Inclán, a partir das 20,30 horas, e a autora será presentada por Fina Bastón, da Marcha Mundial das Mulleres. O club da calceta conta a historia de seis mulleres moi diferentes entre si que acoden a clases de calceta, un lugar onde converxen as súas frustracións pero, tamén, un lugar onde toman conciencia da súa situación e da necesidade de superala. Inspiradas na figura liberadora da tía Davina, Matilde, Anxos, Rebeca, Elvira, Luz e Fernanda van facendo ás lectoras e lectores partícipes da súa historia desde un multiperspectivismo que desfai os fíos dunha sociedade machista.
.jpg)
