Concello de Carballo

Carballo foi dende tempos inmemoriais punto de encontro para os viaxeiros que dende a Costa de Morte se dirixían ata A Coruña e Compostela. Polo municipio transcorreu a vía romana Per Loca Marítima, que comunicaba A Coruña con Fisterra. Xa a comezos do século XX parte deste traxecto era cuberta por unha das liñas de trolebuses máis longas de Europa.

Por estrada

Hoxe en día destacan as excelentes comunicacións da zona. A autoestrada AP-55, Carballo - A Coruña, sitúanos a pouco máis de 20 minutos da capital de provincia. A estrada comarcal C-552 enlaza Fisterra coa Coruña, mentres que a provincial CP-1914 une o municipio con Santiago de Compostela.

As estradas LC-412 e LC-413 constitúen os principais accesos dende a comarca de Ordes. Carballo dispón ademais dunha ampla rede viaria municipal, que comunica as parroquias do Concello.

Para quen prefira o transporte público, existen rotas regulares de autobús entre Carballo, a Coruña e Santiago de Compostela.

Distancias quilométricas

A Coruña - Carballo	34,7 km.
Santiago de Compostela - Carballo	46,6 km.
Pontevedra - Carballo	107,7 km.
Lugo - Carballo	128,1 km.
Ourense - Carballo	149,4 km.

Se o desexas podes calcular outras distancias quilométricas e consultar rotas alternativas na Guía Interactiva Repsol.

En avión

A mellor opción para visitar Carballo dende fóra de Galicia pasa por chegar primeiro ata A Coruña -aeroporto de Alvedro- ou Santiago -aeroporto de Lavacolla-, para achegarse despois ata o municipio por autoestrada ou estrada.

En tren

Carballo non conta con camiño de ferro. De feito, as liñas de tren que quedan máis próximas son as de FEVE -percorre o norte galego con cabo en Ferrol- e a de RENFE que forma o eixo A Coruña-Santiago-Vigo. Desta maneira, o único xeito de achegarse a Carballo en ferrocarril é elixir as conexións que nos deixen en Santiago ou A Coruña e a partir de aí tomar algunha das múltiples liñas de autobús que unen estas cidades coa comarca de Bergantiños varias veces no día.

Ligazóns relacionadas