A comisión de festas incrementa a contía dos premios do Concurso de Cachelas e do Descenso do Anllóns
O prazo para participar nos certames do San Xoán remata o 20 de xuño
Luns 5 de xuño do 2017 San Xoán 2017
Os certames do San Xoán serán este ano moi especiais. Por unha banda, tanto o Concurso de Cachelas como o Descenso do Anllóns celebran edicións simbólicas. O primeiro cumpre 30 anos e o segundo, 20. Case nada! Pero é que ademais, dado o incremento da participación que se rexistrou o ano pasado, a comisión de festas quere seguir apostando por dúas das actividades máis representativas das nosas festas. Con esa intención, para potenciar o aumento da cantidade e da calidade, este ano increméntanse as contías de premios e subvencións.
Descenso do Anllóns
No Descenso do Anllóns repartiranse un total de 2.375 euros. Polo simple feito de participar, para as primeiras 25 embarcacións inscritas haberá subvencións de 40 euros (10 máis que o ano pasado). Pero esa cantidade pode incrementarse substancialmente, xa que haberá tres premios á embarcación máis orixinal de 300, 200 e 125 euros (este último tamén aumenta); dous premios de 200 e 100 euros para as tripulacións máis simpáticas; un premio de 100 euros, patrocinado por Alquileres Reneymar, ás probas de habilidade; outro, tamén de 100 euros e patrocinado por Casa Francisco, para a embarcación máis veloz, e a todo isto únenselle outros 250 euros que reserva o xurado para posibles accésits.
Pero aínda que os premios poden ser un aliciente, no Descenso do Anllóns o que prima é a diversión. Os/as participantes percorrerán o tramo do río comprendido entre a Ponte de Bértoa e o Parque do Anllóns, ao longo do cal haberá varias metas voantes e deberán efectuar probas de habilidade. O concurso celébrase, como todos os anos, o 25 de xuño as 18 horas. O prazo de inscrición está aberto ata as 13 horas do día 20 no Museo de Bergantiños (981 702 077). Coa solicitude de participación os equipos deberán entregar a declaración, debidamente cuberta, que podedes descargar nos documentos adxuntos, onde tamén atoparedes as bases completas do certame.
Concurso de Cachelas
O primeiro premio do Concurso de Cachelas está dotado con 600 euros, e todos os demais increméntanse con respecto ao ano pasado
O prazo do dia 20 rexe tamén para o Concurso de Cachelas, todo un clásico que leva tres décadas enchendo de animación todos os recunchos do casco urbano. Neste caso tamén se prevén subvencións de 20 a 50 euros para as vinte primeiras cachelas inscritas que non resulten premiadas e que reúnan un mínimo de calidade. Pero paga a pena esforzarse, porque o primeiro premio está dotado con 600 euros! Todos os seguintes aumentan de contía. Así, o segundo pasa de 250 a 300 euros; o terceiro, de 175 a 200, e o cuarto, de 125 a 150 euros. Ademais, o xurado poderá outorgar accésits por un total de 200 euros (50 máis que o ano pasado).
Nos documentos adxuntos, ademais das bases completas, atoparedes as recomendacións de seguridade para a prevención de riscos elaboradas polo Parque Comarcal de Bombeiros, o Servizo Municipal de Protección Civil e a comisión de festas.
Concurso en Instagram
Ao igual que o ano pasado, a comisión de festas tamén convoca un concurso a través de Instagram co obxecto de elixir unha imaxe para a revista do ano que vén. Poderán participar todas as persoas que o desexen, que deberán enviar as súas fotografías relacionadas co San Xoán de Carballo ao enderezo electrónico sanxoancarballo@gmail.com, especificando datos de contacto do autor ou autora. Todas as fotografías serán publicadas no perfil de Instagram do San Xoán, e a que obteña máis votos será publicada na revista do ano seguinte.
A imaxe que acompaña esta información corresponde á fotografía gañadora o ano pasado, cuxo autor é José Juan Pérez Ramos.