Chega a Carballo o obradoiro “Creactivity” para fomentar o deseño e a creatividade entre a poboación escolar
A unidade móbil do proxecto promovido pola Obra Social LaCaixa estará na Praza do Concello os días 12, 13 e 14 deste mes
Mércores 7 de agosto do 2019
.jpg "A unidade móbil de")
A unidade móbil de "Creactivity"
Carballo acollerá do 12 ao 14 deste mes a unidade móbil de “Creactivity”, un proxecto itinerante da Obra Social La Caixa que ten por obxecto fomentar o deseño e o desenvolvemento de solucións orixinais para problemas sinxelos. Os obradoiros desenvólvense no interior dun autobús adaptado e equipado con bancos, mesas de traballo e diversas probas dispostas para os/as participantes.
“Creactivity” é un espazo deseñado para espertar o enxeño, a destreza e a creatividade da poboación escolar de 6 a 16 anos, é dicir, de primaria e secundaria. Un facilitador guía aos nenos e nenas a través dun proceso de creación ao que tamén están convidadas as persoas adultas que os/as acompañen. As sesións teñen unha duración estimada de 90 minutos. Os obradoiros desenvolveranse de 10.00 a 14.00 e de 17.00 a 20.30 horas, e o teléfono de información para as familias interesadas é o 900 101 493.
Interior do autobús
O espazo está caracterizado pola súa compoñente lúdica e de colaboración. Conta con diferentes áreas (mecánica, vento, electricidade, luz...) que permiten desenvolver distintas habilidades. Os nenos e nenas poderán investigar cos materiais, planificar, crear novos deseños ou buscarlles novas funcións a través de propostas abertas e interdisciplinarias que abranguen a ciencia, a tecnoloxía, a enxeñaría, as artes e as matemáticas, aínda que tamén se traballan outras competencias máis transversais como hábitos de aprendizaxe cooperativa, autocoñecemento para a aprendizaxe ou creación e realización de proxectos.
O sistema de aprendizaxe de “Creactivity” está inspirado no movemento “Tinkering” do Exploratorio de San Francisco, e forma parte do programa EduCaixa, que chega a Carballo en colaboración co Concello.
