A Escola de Natación do Concello de Carballo iniciará o 13 de setembro as actividades do curso 2021-22
Consulta aquí a relación de admitidos/as, horarios e protocolo COVID-19
Venres 27 de agosto do 2021
O 13 de setembro iniciará a súa actividade a Escola de Natación 2021-22. Tal como consta na resolución que pode descargarse ao remate desta nova, dende a área de Deportes procedeuse á cobertura das 540 prazas ofertadas mediante renovación automática dos usuarios do curso 2020/21 e comunicación da dispoñibilidade de praza ao resto de usuarios e usuarias pola seguinte orde:
- Usuarios e usuarias con adiamento da participación con reserva de praza.
- Usuarios e usuarias preinscritos mediante aboamento ós servizos deportivos e solicitude de inclusión na lista de espera para a actividade.
A partir de agora ábrese un prazo ata o 10 de setembropara solicitar o cambio de grupo asignado ou comunicar a renuncia á praza, nas seguintes condicións:
- Os participantes que comuniquen renuncia perderán a súa praza na Escola de Natación.
- Na solicitude de cambio de grupo priorizaranse as solicitudes motivadas pola incompatibilidade co horario lectivo obrigatorio dos participantes e ca asistencia de irmáns, por esa orde, e a condición de que o cambio solicitado sexa posible atendendo ós criterios técnicos organizativos da actividade.
As comunicación de renuncia e solicitudes de trocos de grupo e aprazamentos poden efectuarse por tres vías: rexistro telemático do Concello de Carballo, correo electrónico á dirección carballodeporte@carballo.gal ou presencialmente nas oficinas “Carballo Deporte” na rúa Vila de Corcubión S/N.
Toda a información, así coma os apectos máis destacados do protocolo de prevención da COVID-19, poden descargarse máis abaixo.