En marcha as obras de renovación da cuberta e das instalacións do pavillón deportivo do CEIP Gándara-Sofán
A concelleira de Educación e o concelleiro de Deporte realizaron unha visita ao centro, no que estamos a investir 200.000 euros
Xoves 14 de xullo do 2022
.jpeg)
A concelleira de Educación, Mar Eirís, e o concelleiro de Deporte, Marcos Trigo, visitaron hoxe o CEIP Gándara-Sofán para ver o desenvolvemento das obras que está a levar a cabo a empresa Vázquez y Reino no pavillón polideportivo do colexio. O groso do investimento, que acada os 208.579,69 euros, vai destinado á renovación da cuberta, pero tamén se realizarán outras importantes melloras na instalación deportiva.
Durante a visita, os concelleiros estiveron acompañados polo equipo directivo e polo arquitecto Roberto Souto, autor do proxecto e director de obra, que realizou unha explicación dos traballos que se están levando a cabo.
A finalidade principal do proxecto é mellorar a experiencia e as necesidades dos usuarios do pavillón, que son, maioritariamente, os alumnos e alumnas do colexio. Deste xeito, a vella chapa metálica do tellado, que provocaba moitos problemas nos días de choiva, xa foi retirada e será substituída por unha cuberta mediante panel sándwich con illamento incorporado. Tamén se incorporarán novos elementos de recollida e evacuación das augas pluviais, e modificarase a propia rede de pluviais do pavillón.
.jpeg)
As obras que se levan a cabo aproveitando as vacacións de verán inclúen tamén a substitución do panel metálico da fachada oeste, xa que presenta os mesmos problemas que a vella cuberta. O proxecto tamén prevé a renovación do pavimento, o marcado dos campos de xogo, o pintado interior, a instalación de gradas prefabricadas para acomodar ao público dos eventos deportivos, a instalación dun rocódromo para a práctica da escalada e de diverso equipamento deportivo: canastras retráctiles, porterías, etc.
O pavillón polideportivo, ademais, quedará conectado co edificio principal do complexo educativo a través dunha pasarela cuberta. E ademais crearase un novo acceso que permitirá o acceso ao completo sen interferir na actividade docente.