Razo acolle esta fin de semana un seminario para escolas de surf que participan no proxecto “Aprende a través do surfing”
A actividade formativa para profesionais complementarase o domingo cunha sesión para o profesorado dos centros escolares adheridos
Venres 10 de marzo do 2023
Imaxe do seminario celebrado o ano pasado
A praia de Razo convértese esta fin de semana no punto de encontro do monitorado das escolas de surf adheridas ao programa "Aprende a través do surfing" en Galicia, unha das comunidades autónomas que vén participando no proxecto educativo, deportivo e medioambiental organizado pola Federación Española de Surfing e Surf and Clean.
O seminario DEAN (Defensa dos espazos acuáticos naturais), organizado pola Federación Galega de Surf en colaboración coa española e Surf and Clean, vai destinado a xerentes e direccións deportivas de escolas náuticas. Para todos eles está deseñada unha formación presencial teórica e práctica. Deste xeito, as escolas de surfing quedan habilitadas para poder impartir as actividades do proxecto "Aprende a través do surfing".
Paralelamente, para o domingo 12, de 10.00 a 13.00 horas está programada unha actividade na escola BoaOla e na propia praia na que participará profesorado dos centros escolares adheridos ao proxecto nos concellos de Cabana, Camariñas, Carballo, Coristanco, Ferrol, A Laracha, Malpica, Miño, Mugardos, Ponteceso, Valdoviño e Vimianzo.
O Concello de Carballo colabora un ano máis cunha actividade que pretende fomentar a cultura acuática e marítima, mellorar a seguridade nas praias, crear un vínculo co mar que permita comprender mellor a súa relevancia, recoñecer as ondas coma un ben de gran valor para a comunidade, crear unha rede do mar, introducir no ensino a perspectiva de medio ambiente e transformación social e formar axentes de cambio que axuden á sociedade a facer unha transición cara unha forma de vida máis sostible.
