DOMINGO 22 DE XANEIRO ÁS 18.00 HORAS

O programa dos Venres Culturais principia co ciclo En Familia e "Pío", de Caramuxo Teatro

Mércores 18 de xaneiro do 2012

Respecto da venda de bonos e entradas dos Venres Culturais, hai que lembrar que dende o martes 17 de xaneiro está aberto o prazo para a adquisición dos Bonos de Teatro e do ciclo En Familia do programa Venres Culturais, que se desenvolve nas fins de semana entre os meses de xaneiro e marzo, así como o período para a venda e reserva de entradas. A venda de entradas realízase no despacho de billetes do Pazo da Cultura, unha hora e media antes do inicio da actuación. A reserva de entradas pode facerse no 981 704 300 ou na Concellaría de Cultura (1º andar do Pazo da Cultura) habitualmente dende 15 días antes da celebración dos espectáculos cun límite de 4 entradas por persoa. Nalgúns espectáculos aplicaranse prezos reducidos a determinados colectivos que deberán acreditar debidamente a súa circunstancia especial: estudantes con carné de estudante, maiores de 65 anos e menores de 12 anos. No caso dos espectáculos de balde, debido á limitación do auditorio, se é necesaria a reserva previa, comunicarase coa antelación posible.

No que se refire á venda de bonos tamén poden adquirirse nas Oficinas da Concellaría de Cultura de 11.00 a 14.00 horas.

• Bono de teatro: Para os días 27 de xaneiro, 10 de febreiro, 2, 17 e 30 de marzo.
  • Bono ordinario: 13 €.
  • Bono especial con prezo reducido: 10 € (para estudantes con carné de estudante, maiores de 65 anos e menores de 12 anos).
• Bono En Familia: Para os días 22 de xaneiro, 12 de febreiro, 4 e 25 de marzo.
  • Bono ordinario: 8 €.
  • Bono especial con prezo reducido: 6 € (para estudantes con carné de estudante, maiores de 65 anos e menores de 12 anos).