VENRES 10 DE FEBREIRO ÁS 21.00 HORAS

Teatro do Noroeste plasma a experiencia vital dun home solitario en "Último cowboy" nos Venres Culturais

Luns 6 de febreiro do 2012

Teatro do Noroeste é unha compañía de teatro profesional galega fundada no 1987 e que xa se ten convertido nun referente no panorama teatral do país. Foi fundada hai 25 anos por dous profesionais de dilatada experiencia teatral como son Eduardo Alonso, autor, adaptador e, sobre todo, director de teatro; e Luma Gómez, protagonista desta montaxe, actriz cunha longa e prolífica carreira profesional traballando en diversas e importantes compañías de teatro, así como en diversas montaxes do Centro Dramático Galego en papeis protagonistas. Fixo importantes papeis cinematográficos con produtores do Estado e de Galicia. É actriz habitual en programas e series da TVG. Na ampla traxectoria de Teatro do Noroeste, a compañía ten producido e distribuído unha grande cantidade de espectáculos. Entre estas propostas, poden salientarse desde textos clásicos como Rei Lear, Macbeth ou Noite de Reis, de William Shakespeare, ou As vodas de Fígaro, de Caron de Beaumarchais, até textos máis contemporáneos como Os Xustos, de Albert Camús, ou de autores galegos como Historias Peregrinas, ou A grande noite de Fiz, de Miguel Anxo Murado e Unha rosa é unha rosa, de Suso de Toro e o musical, Imperial: Café cantante. Vigo 1936, de Eduardo Alonso. Entre moitos outros.