A SUBVENCIÓN SUPERA OS 130.000 EUROS

O Centro Social San Xoán Bautista mellora os seus locais para crear un centro de día e un albergue para transeúntes con fondos Agader

Venres 16 de marzo do 2012

En nome do Centro Social, o presidente do seu Consello de Administración, Xosé García Gondar, quere agradecer a colaboración do Agader para poder realizar estas melloras. O Alcalde de Carballo, Evencio Ferrero; o propio don Xosé García Gondar; un representante da Asociación de Desenvolvemento da Comarca de Bergantiños; así como outros representantes do Centro Social veñen de visitar as instalacións, nas que hai aulas debidamente equipadas para realizar cursos formativos e de apoio educativo, un comedor social ou un aula de formación musical. Así mesmo, os traballos serviron para realizar, entre outras reformas, a eliminación das barreiras arquitectónicas ou a mellora do tendido eléctrico. O Centro Social quere subliñar o labor que se realiza ao longo de todo ano, especialmente o apoio educativo para contrarrestar o fracaso escolar de nenos e nenas de familias desfavorecidas. Así, nas instalacións impártense clases de luns a xoves en horario de 17.00 a 19.00 horas para axudar aos rapaces e rapazas na responsabilidade no estudo, colaborar nos deberes e axudalos a mellorar o seu rendemento escolar. Nestes momentos hai 69 rapaces e rapazas inscritos cunha asistencia regular de entre 45 e 50 deles. Oito voluntatios encárganse de impartir as clases, aínda que é benvida calquera colaboración de voluntariado que se sume a esta iniciativa. O Centro Social espera rematar toda a reforma e rehabilitación coincidindo co peche do Ano Xubilar, no mes de setembro deste ano.