O SERVIZO TEN OFERTADO UN TOTAL DE 60 POSTOS DE TRABALLO

A Bolsa de Traballo celebra o seu primeiro aniversario con máis de 800 demandantes de emprego e a implicación de 30 empresas

Sábado 30 de novembro do 2013

Tense rexistrado un aumento en ocupacións relacionadas co sector da hostalería como pinche de cociña, cociñeira/o ou camareiro/a, e tamén en empregos máis relacionados con oficios como soldador, mestre ou carpinteiro. No que respecta ás empresas ofertantes, os empregos que máis solicitan son os relacionados cos servizos á comunidade (asistencia domiciliaria), co sector comercio (dependentes, axentes comerciais) ou co sector servizos (cociñeiro/a). En canto á cualificación dos demandantes de emprego, tanto académica como complementaria, rexístrase unha ampla diferenciación entre os que posúen unha alta cualificación e aqueles que case non teñen ningunha. Pode observarse, así mesmo, que os datos seguen unha tendencia moi similar aos do inicio do servizo.

Se a comezos de 2013 a cualificación dos usuarios e usuarias era baixa, e dábase unha importante cifra de casos que non podían e/ou non queren acreditar a súa titulación, esa situación segue a ter un grande peso na actualidade. Dos 808 rexistros actuais, uns 300 teñen como máximo EXB, mentres que só 127 acreditan formación universitaria e o resto FP 1, FP 2, ESO ou Bacharelato. A gran cantidade de usuarios e usuarias con moi baixa ou nula formación dificulta a súa procura de emprego, dadas as esixencias do mercado de traballo ante a titulación académica ou complementaria e en canto aos certificados de profesionalidade e outros carnés profesionais. A formación é un elemento fundamental que axuda aos demandantes ser competitivos no mercado de traballo, motivo polo cal é un dos puntos nos que mais forza fai a BDT.

Preto do 15 por cento de usuari@s se beneficiaron de cursos da BDT