A SESIÓN INCLÚE A ADXUDICACIÓN DUN NOVO POSTO DO MERCADO

A ordenanza reguladora da taxa do servizo de recollida de lixo centra o debate do terceiro pleno celebrado en setembro

Venres 26 de setembro do 2014

O Alcalde de Carballo, Evencio Ferrero, explica que dende 1998 o servizo de recollida de lixo deixa de ser prezo público para pasar a ser unha taxa, e polo tanto "de recepción obrigatoria" para todas as vivendas, estean ou non ocupadas. En Carballo, o cambio de prezo público a taxa formalizouse en 1999, mentres que foi en 2004 cando se regularizou a situación para todas as vivendas do municipio, incorporándose as do medio rural. Agora se realiza a regularización do cobro da taxa a todas as vivendas do municipio. Os técnicos municipais explican que a xurisprudencia aplicable é a última emitida polo Tribunal Supremo, que reitera o carácter "de recepción obrigatoria da taxa". Ademais, aclara que "é o Estado o único que pode condonar débedas". Respecto da posibilidade de realizar bonificacións para aquelas vivendas que non estean habitadas, fronte ás que si o están, a legalidade establece que isto só é posible "pola capacidade económica, nunca polo tipo de uso dos espazos". E dicir, as bonificacións realizaríanse tendo en conta os ingresos familiares, nunca en función de se a vivenda está ou non baleira. Por último, o Alcalde resaltou que calquera derrogación ou modificación da taxa nos sentidos propostos "sería manifestamente ilegal", algo que unha corporación non pode admitir. Así mesmo, a Concelleira de Facenda, Belén Lendoiro, informou de que nestes momentos hai emitidos xa preto de 2.000 recibos, enviados en dúas quendas, unha de 1.200 e outra de preto de 800. No primeiro caso, teñen pagado xa o 70 por cento dos usuarios e usuarias, e no segundo, que ten de prazo de pago voluntario ata decembro de 2014, xa pagaron un 20 por cen. Respecto dos recursos presentados polos veciños e veciñas, son un total de 122.

Modificación puntual do contrato de alumeado público