INCLUIRÁ NO PROXECTO MEDIDAS PARA FAVORECER O MARISQUEO

Costas emprenderá a recuperación do sistema dunar de Baldaio que está danado como consecuencia dos temporais

Mércores 23 de setembro do 2015

Así mesmo, a reconstrución do espazo dunar tamén podería supoñer retirar parte da area acumulada na entrada da ría, xa que esta area formaría parte orixinariamente das dunas que pretenden recuperarse e tería sido arrastrada polos temporais á súa situación actual. De todos os xeitos, Rafael Eimil explicou que a Agrupación Fonte Santa Elena debe presentar un escrito no seu departamento detallando as actuacións que consideran precisas para solucionar o seu problema. A presidenta das mariscadoras, María José Felípez, demandou a axuda do Concello para a elaboración do escrito ao non contar a entidade con persoal administrativo, e o Alcalde, Evencio Ferrero, accedeu a prestar esa colaboración. En todo caso, o obxectivo principal das actuacións será contribuír á recuperación e bo uso do espazo natural da lagoa de Baldaio.