Adxudicadas por 92.358,17 euros as obras da segunda fase das beirarrúas de Ardaña

Luns 24 de febreiro do 2025

O alcalde, nun percorrido pola primeira fase das beirarrúas de Ardaña

A Xunta de Goberno Local adxudicou á empresa Mantido, SL, por 92.358,17 euros, as obras de construción de beirarrúas en Ardaña (fase II).

Nesta segunda fase, que se estenderá entre os puntos quilométricos 4+025 e 4+405, aproveitarase a actuación para instalar unha rede de augas pluviais separada da de saneamento, xunto con 13 sumidoiros. A nova zona peonil daralle continuidade ao treito executado no 2023 e terá un ancho medio de 2,20 metros, cumprindo a normativa de accesibilidade. O proxecto inclúe tamén sinalización horizontal e vertical e a creación de pequenas zonas verdes dotadas de arborado.

Con esta actuación, que trata de fomentar a mobilidade peonil creando itinerios seguros, complementarase o proxecto desenvolvido no 2023 entre os quilómetros 3+450 e 4+0,25, que supuxo un investimento de 175.000 euros e permitiu tamén crear un acceso peonil ao centro social.

A Xunta de Goberno Local adoptou outros acordos relacionados con diferentes contratos:

Urbanización da parcela de equipamento destinada á ampliación do centro de saúde. O goberno municipal aceptou a solicitude de suspensión temporal do prazo de execución presentada pola empresa, que argumenta que o groso dos traballos consiste no recheo da rúa para acadar as cotas e a rasante prevista, e que para levar a cabo ese tipo de obras “é preciso que non haxa precipitacións ou que as mesmas sexan de pouca contía”. Á vista dos informes técnicos correspondentes, o prazo queda en suspenso ata o 20 de abril.
Melloras de camiños municipais 2024: Oza. Tamén se optou pola suspensión temporal do prazo de execución dos traballos, que xa están en marcha, por mor das persistentes chuvias. A suspensión rematará o 30 de marzo.
Mellora na estrada DP-1901 Carballo-Sísamo (fase III). Nese caso amplíase o prazo de execución en catro meses dados o atraso acumulado por causas meteorolóxicas.
Ampliación do cemiterio municipal (fase II). Declarado deserto o procedemento por non concorrer ningunha empresa.
Subministración e instalación de oficinas e vestiarios no polígono de Carballo. Declarada deserta a adxudicación tras a exclusión do único licitador por superar o prezo de licitación.
Subministración de combustible para os vehículos, maquinaria e edificios do Concello de Carballo. Lote 1: subministración de combustible a vehículos do parque móbil municipal e maquinaria. Lote 2: transporte e subministración de combustible a edificios municipais. Aprobado o expediente de contratación, cun orzamento de licitación de 215.370,51 euros para o lote 1, e 10.697,61 euros para o lote 2.
Subministración dunha aplicación informática para a preinscrición dixitalizada de exercicio físico aos usuarios dos servizos deportivos de prestación directa polo Concello de Carballo. Aprobada a prórroga do contrato.
Servizo profesional de responsable de seguridade segundo Esquema Nacional de Seguridade. Adxudicado a Norquality Consultores SL por 8.772,50 euros.

Por outra banda, a Xunta de Goberno Local aprobou facturas de gasto por importe de 39.745,88 euros, a programación de Entroido e a solicitude á Consellería de Presidencia, Xustiza e Deportes dunha subvención de 40.000 euros (importe máximo permitido) para cubrir os custos do servizo de salvamento e socorrismo, que ascenden a 139.964,58 euros.