VENRES 22, SÁBADO 23 E DOMINGO 24 DE NOVEMBRO
Venres 22 de novembro do 2013
Hoxe venres 22 de novembro de 2013, festividade de Santa Cecilia patrona dos músicos e músicas, así como de todos aqueles amantes da "cuarta" arte, terá un especial protagonismo esta fin de semana, cunha serie de actividades programadas para celebrar esta efeméride. Esta tarde ás 20.00 horas a Coral Polifónica de Bergantiños honrará á Santa, cunha misa cantada na parroquia de San Xoán Bautista de Carballo. Ás 20.30 horas, e dentro da entrega do Premio "Abertos ao Galego", actuará a cantautora galego-palestina Najla Shami. Esta actividade está organizada pola Mesa pola Normalización Lingüísta e conta coa colaboración do Concello de Carballo. A cita é no Salón de Actos do segundo andar do Pazo da Cultura. O sábado 23 hai unha nova cita con Novembro con Música 2013, o programa musical elaborado pola Concellería de Cultura do Concello de Carballo, coa colaboración das Agrupacións Musicais de Carballo e da Deputación da Coruña. A partir das 21.00 horas no Pazo da Cultura, terá continuación a celebración da festividade da patrona dos músicos co festival de corais Santa Cecilia 2013. Esta é unha das citas anuais coa música coral máis salientable da comarca. Un concerto no que, ademais da anfitriona, a Coral Polifónica de Bergantiños, participarán a Coral Polifónica de Laxe e a Coral Airiños da Capela .
DOMINGO 24 DE NOVEMBRO NUNHA CARPA NO XARDIN MUNICIPAL
Venres 22 de novembro do 2013
Como cada ano, o Concello de Carballo conmemora o 25 de novembro, Día Internacional para a Eliminación da Violencia de Xénero, cunha serie de actos entre os que destaca a Feira das Asociacións, que ten lugar durante a mañá do domingo 24 nunha carpa situada entre o edificio do mercado e o parque infantil do Xardín Municipal. Como cada ano dende 2004, esta cita conta coa presenza de distintas entidades que traballan en Carballo con e a prol das mulleres e da igualdade. A feira serve no só para rexeitar a violencia, senón tamén para dar a coñecer o traballo que as asociacións participantes desenvolven nesta loita, e para ofrecer información ás mulleres que así o desexen. O acto oficial de apertura da Feira está previsto para as 11.30 horas e está previsto que inclúa a lectura da Declaración Institucional do Concello de Carballo con motivo do 25 de novembro, que será levada para a súa aprobación ao pleno ordinario do mes de novembro. Estarán presentes na cita autoridades de distintas institucións, incluído o goberno municipal co Alcalde, Evencio Ferrero, e a Concelleira de Igualdade, Silvana Castro, os corpos e forzas de seguridade e a Xefa da Unidade de Violencia de Xénero da Subdelegación de Goberno en A Coruña, Judit Fontela Baro.
ACTO DE ENTREGA: VENRES 22 DE NOVEMBRO ÁS 20.30 HORAS
Venres 22 de novembro do 2013
Abertos ao Galego, o proxecto da Mesa pola Normalización Lingüística para dinamizar o galego no ámbito empresarial, entrega este venres 22 de novembro o seu II Premio, que se lle concede á cadea de electrodomésticos San Luís. O fundador de San Luís retoma a empresa despois de que a multinacional Darty, que a mercara hai uns anos, decidise pechar as tendas, que agora San Luís reabre en diferentes cidades galegas. Xa no seu día esta cadea fora un referente e unha empresa pioneira na publicidade en galego, e o lema do seu regreso é "Estamos de volta". O acto de entrega do premio, que é aberto ao público e que se fai en colaboración co Concello de Carballo, ten lugar no salón de actos do Pazo da Cultura de Carballo, ás 20.30 horas, e nel actúa a actriz e humorista Isabel Risco como mestre de cerimonias e a cantante galego-palestina Najla Shami. No acto tamén intervirá o alcalde de Carballo, Evencio Ferrero, e mais o presidente da Mesa pola Normalización Lingüística, Carlos Callón. O premio será recollido polo xerente e fundador de San Luís, Lorenzo López. O empresario coruñés Lorenzo López, que fundou San Luis nos anos 70, fai unha clara aposta pola lingua como elemento fundamental da identidade, o que el entende como parte imprescindible da marca da empresa, de aí a necesidade de recoñecerlle o seu labor.
DURANTE A XUNTANZA ABORDOUSE A UNIFICACIÓN DE HORARIOS
Mércores 20 de novembro do 2013
O Consello Escolar Municipal mantivo o martes 19 de novembro unha xuntanza na que a inspectora de Educación, Berta Estrada, confirmou que os traballos de ampliación do CEIP Bergantiños da capital municipal (na imaxe, un momento da recente visita ás instalacións do Conselleiro de Cultura, Educación e Ordenación Universitaria, Xesús Vázquez Abad) estarán listos a primeiros de 2014, a pesares dalgún atraso que houbo no pasado debido á realización do estudo xeotécnico. Segundo subliñou, está incluso aberta a posibilidade de que, se todo transcorre segundo o previsto, no mes de febreiro se realice o traslado de nenos e nenas xa escolarizados para que comecen a empregar as novas aulas -con capacidade para 225 alumnos e alumnas-, mentres que as novas incorporacións de alumnado e profesorado realizaríanse de cara ao curso 2014-2015. Nese sentido, a xuntanza tamén serviu para realizar un balance sobre o proceso de escolarización rexistrado este curso e o previsto para o próximo. Aínda que continúa habendo unha elevada taxa de natalidade, espérase que coa presenza das 225 novas prazas de Educación Infantil no CEIP Bergantiños non haxa ningunha incidencia de cara ao comezo da actividade escolar no próximo curso 2014-2015.
NA SALA DE EXPOSICIÓNS DO ANDAR -1 ATÉ O 29 DE NOVEMBRO
Martes 19 de novembro do 2013
A sala de exposicións do andar -1 do Pazo da Cultura de Carballo acolle até o venres 29 de novembro a mostra titulada "Mulleres, de vida alegre?". Cedida por Médicos do Mundo e composta por instantáneas de Salvador Campillo, transmítenos, a través do testemuño de catro mulleres, as causas e as consecuencias da explotación sexual. O obxectivo da exposición é concienciar á cidadanía acerca da situación na que se encontra un colectivo estigmatizado e excluído socialmente. Ademais de promover un cambio de actitudes cara á prostitución mostrando as súas consecuencias e dando voz e rostro ás mulleres que a exercen. Mediante esta mostra Médicos do Mundo busca reducir o estigma que rodea ás persoas en situación de prostitución. "Mulleres de vida alegre?" é unha chamada de atención á sociedade sobre as persoas prostituídas, persoas ás que, na maioría das ocasións, se lles sinala como culpables dunha situación cando en realidade son elas as vítimas. A mostra foi inaugurada polo Alcalde de Carballo, Evencio Ferrero; a Concelleira de Igualdade e Benestar, Silvana Castro; e a Concelleira de Cultura e Educación, Mar Eirís. Tamén estivo presente a Concelleira de Facenda, Belén Lendoiro. Poderá visitarse no horario habitual cada tarde de 18.00 a 21.00 horas.
MÉRCORES 20 DE NOVEMBRO
Martes 19 de novembro do 2013
O Novembro con Música 2013 continúa con máis actividades dirixidas a escolares, pero tamén a bebés o mércores 20 de novembro. En primeiro lugar, rapaces e rapazas dos colexios de Carballo asisten ao espectáculo musical "Un concerto divertido" impartido polo quinteto carballés-moldavo, Fórmula Brass. Esta actividade, dirixida a todos os escolares de 5º e 6º de Educación Primaria dos centros de Carballo, é unha proposta didáctica e tamén divertida, que xira arredor do mundo da música e, en concreto, da que se pode interpretar con instrumentos de vento e metal. O quinteto Fórmula Brass, está formado polos irmáns carballeses e trompetistas profesionais, Carlos e Javier Bardanca -este último profesor de trompeta do Conservatorio de Carballo- e dos moldavos Veaceslav Gorgan, Gregore Bufta e Ion Jelihovschi, procedentes da Orquestra Sinfónica de Moldavia e agora profesores en diversos centros musicais de Galicia. Interpretarán, con trompetas e trombóns, diferentes e variados temas da historia da música, ademais de realizar un percorrido polo mundo a través das melodías tradicionais dos diferentes países. Ao mesmo tempo, darán a coñecer aos asistentes os diferentes instrumentos musicais que empregan, e o que se esconde detrás deste tipo de formación musical, o quinteto de vento.
A ACCIÓN FORMATIVA CONTA CON 758 HORAS DE DURACIÓN
Martes 19 de novembro do 2013
Os 15 alumnos que participan no Curso de Soldadura con electrodo revestido e TIG que se imparte dende o pasado verán no Fórum Carballo tiveron a oportunidade de asistir o luns 18 de novembro a unha demostración coa maquinaria máis avanzada que existe no mercado. Así, a empresa ESAB (Soldadura e Corte España) ofreceulle aos participantes a oportunidade de aprender algunhas das claves do funcionamento da máquina Warrior, a última xeración en tecnoloxía en soldadura, sendo unha das principais características desta nova ferramenta a eficiencia no manexo da enerxía. Outra é a súa versatilidade, xa que permite traballar para MIG, Flux Cored, Electrodo Revestido, soldadura TIG, e ranurado con electrodo de carbón. ESAB conta coa única máquina deste tipo que existe en España e acaba de lanzala ao mercado, realizando demostracións en empresas, pero tamén en Centros de Formación como o carballés para permitir que o alumnado teña acceso ás últimas tecnoloxías. Durante boa parte da mañá os asistentes ao curso puideron ver a máquina en acción, así como outras ferramentas pioneiras en materia de soldadura. Hai que mencionar que este Curso de Soldadura está incluído no plan AFD (Accións Formativas para Desempregados) da Consellería de Traballo e conta con 758 horas de duración.
MARTES 19 DE NOVEMBRO ÁS 12.00 HORAS
Luns 18 de novembro do 2013
O martes 19 de novembro, e dentro das actividades complementarias do programa Novembro con Música 2013, está prevista a representación teatral a cargo da compañía Malasombra Producións, de "Smoke City. A cidade do fume". Esta proposta didáctica, dirixida nesta ocasión ao alumnado de 3º da ESO dos centros de Educación Secundaria de Carballo (IES Alfredo Brañas, IES Isidro Parga Pondal, IES Monte Neme e Colexio Artai), xorde da colaboración entre as Consellerías de Sanidade, de Política Lingüística, da AGADIC (Axencia Galega das Industrias Culturais) e dos concellos que quixeran participar no proxecto, como o caso do de Carballo. "Smoke City", título da obra e nome da cidade onde se desenvolve a trama, é o paraíso do fume dos cigarros. As mafias do tabaco dominan a cidade e os cidadáns van caendo nas súas redes, ata que un detective decide poñer fin a toda esta tea de araña de fumareda e corrupción. Unha obra de teatro do xénero "negro" da banda deseñada cun aire moi urbano. Con gánsters, policías, clubs con música e sobre todo, con moitas vítimas cos pulmóns ennegrecidos polo fume do tabaco, e dos maléficos plans de Silvio Nicotini, xefe da mafia tabaqueira.
ASINADO UN CONVENIO COA CONSELLERÍA DE PRESIDENCIA
Luns 18 de novembro do 2013
O Alcalde de Carballo, Evencio Ferrero, e o Vicepresidente da Xunta, Alfonso Rueda, veñen de asinar un convenio de colaboración para a cesión e utilización de espazos administrativos no complexo Fórum Carballo. O obxectivo do convenio é centralizar neste edificio todos os servizos autonómicos localizados no termo municipal, a fin de prestar un mellor e máis áxil servizo á cidadanía, e dentro do compromiso destas dúas administracións por optimizar o uso dos edificios públicos. Segundo explican Ferrero e Rueda, está previsto que as dependencias da Oficina de Emprego (da Consellería de Traballo e Benestar), das oficinas das consellerías de Medio Rural e Mar (Oficina Agraria Comarcal) e de Medio Ambiente, Territorio e Infraestruturas (neste último caso con seis persoas do distrito ambiental II do Servizo de Conservación da Natureza) estean plenamente operativas e dispoñibles para os veciños e veciñas a partir do mes de xaneiro na planta baixa e no andar 1 da nave 2 do Fórum. O Alcalde de Carballo, Evencio Ferrero, quixo subliñar a "lealdade e colaboración institucional" existente entre o Concello e a Xunta co obxectivo de "optimizar os recursos de formación e emprego" e "dinamizar todo o barrio da Milagrosa". Rueda, pola súa banda, quixo resaltar as "magníficas" instalacións coas que "a Xunta vese claramente beneficiada" e nas que 30 persoas traballarán a partir de xaneiro coa arela de "mellorar o servizo".
INTERESAD@S EN PARTICIPAR CONTACTAR COA ASOCIACIÓN SENDA NOVA
Sábado 16 de novembro do 2013
A Asociación Ambiental Senda Nova, coa colaboración do Concello de Carballo e a implicación de varios establecementos da vila e de artistas locais pon en marcha a iniciativa "Pintamos moito" que ten como obxectivo mellorar a estética do casco urbano carballés axeitando varios muros e medianeiras do centro. O obxectivo é que nenos e nenas carballeses, baixo a supervisión dos artistas, pinten e plasmen as súas ideas en catro puntos da vila para enchelos de cor e mellorar a trama urbana. Segundo explica Xose Manuel Menéndez, presidente de Senda Nova, a idea xurdiu coa intención de "lavarlle un pouco a cara a certos lugares do casco urbano", comezando con catro, mais coa arela de continuar no futuro noutros puntos de Carballo. Desta primeira volta os lugares son: un muro situado na contorna da rúa Vila de Noia que terá unha temática deportiva; outra parede situada na confluencia das rúas Alfredo Brañas e Gran Vía inspirada no Pedibús; un muro na Rúa Barcelona centrado en plasmar o Bosque da Ribeira da Pena; e outro na glorieta da contorna do CCB-Gadis na que a temática será o espazo natural de Razo-Baldaio. Nestes momentos xa están implicados no proxecto os rapaces e rapazas que participan no Obradoiro Ambiental Sendas Carballo, mais os interesad@s -adult@os e cativ@s- en colaborar poden poñerse en contacto con Senda Nova no enderezo electrónico e nos teléfonos 636 326 083 e 696 155 232.
NOVA COMISIÓN: MÉRCORES 20 DE NOVEMBRO ÁS 16.30 HORAS
Venres 15 de novembro do 2013
Despois dun total de 31 xuntanzas da Comisión Informativa de Urbanismo e Medio Rural, o proceso de revisión das alegacións presentadas ao documento para aprobación inicial do Plan Xeral de Ordenación Municipal de Carballo (PXOM) entra na súa recta final. Nestes momentos, e despois dunha quenda de xuntanzas que comezou o pasado mes de xuño, xa están revisadas todas as reclamacións correspondentes ao medio rural así como as do casco urbano e a zona costeira e, segundo explica a Concelleira de Urbanismo e Desenvolvemento Urbano, tan só restan "algúns flocos", dúbidas moi concretas sobre ámbitos moi concretos que no seu momento quedaron sobre da mesa e que poderán despexarse na próxima reunión convocada para o mércores 20 de novembro. Unha vez rematada toda a revisión e ditaminadas as resolucións para as 1.921 alegacións presentadas, será o momento de que o equipo redactor do PXOM elabore un documento no que se recolle todo o proceso, un informe que deberá ser ratificado de novo pola Comisión de Urbanismo e que logo debe recibir a aprobación provisional do pleno da corporación. Despois de ese trámite, será a Xunta de Galicia a través da Consellería de Medio Ambiente, Territorio e Infraestruturas, a que acepte ou rexeite a aprobación definitiva do plan.
RECEPCIÓN DE EVENCIO FERRERO NA ALCALDÍA
Venres 15 de novembro do 2013
O Alcalde de Carballo, Evencio Ferrero, vén de recibir na Casa do Concello aos recentes campións da Copa Galicia de baloncesto en categoría infantil masculina, o equipo da Escola Basket Xiria. Así, na final celebrada no Pavillón Vila de Noia da capital municipal o domingo 10 de novembro, os anfitrións superaron ao outro finalista, Seis do Nadal-Coia, por 63 a 39, despois dun torneo cunha impecable traxectoria. O terceiro posto correspondeulle ao Instituto Rosalía e cuarto foi para Sigaltec BBC Vilagarcía. O Alcalde quixo falar cos compoñentes do equipo, Jorge Mato Andrés, Roi Navarro Sánchez, Martín Vidal Otero, Anxo Estany Gómez, Javi López Pardo, Luciano Calvo Eirís, Álex Estramil Reyes, Enrique Melini Pose, Javi Souto Pallas e Iago Caamaño Serra, así como co adestrador, Arturo Ferraces, moi satisfeito co traballo dos seus xogadores, así como coa organización do torneo. Tiveron a oportunidade de asinar no libro de honra, que, curiosamente, cubriu coas súas verbas e sinaturas todas as súas páxinas, polo que o volume chegou á súa xubilación despois de ser o espazo de expresión de numerosas autoridades e persoeiros dende o ano 1974. Nun ambiente distendido, Ferrero quixo felicitar aos vencedores, e desexoulles que continúen no futuro cos éxitos do Basket Xiria e do deporte de base para o Concello carballés.