MÁIS DE 4,8 MILLÓNS DESTÍNANSE A INVESTIMENTOS REAIS
Venres 15 de novembro do 2013
O Concello de Carballo presenta un orzamento para 2014 que no apartado de gastos reflicte un importe de 23.284.114,41 euros -un 7,03 por cento máis que en 2013 con 1.530.104,27 euros máis- e no de ingresos de 23.294.992,53 euros -cun incremento do 2,92 respecto da previsión para o exercicio anterior con 662.301,01 euros máis-. Trátase dunhas contas que, segundo explica a Concelleira de Facenda, Belén Lendoiro, "manteñen a regra de gasto e a estabilidade financeira" ademais de incrementar os ingresos e "asumir un elevado investimento real sen recorrer a préstamo". Lendoiro subliña que as contas continúan a liña aberta cos orzamentos de 2012 e 2013, cun presuposto "realista e que garante a calidade dos servizos" dándolle prioridade "ao benestar das persoas", así como "á formación e o emprego e á dinamización económica". A Concelleira de Facenda quere resaltar que o orzamento de 2014 é un exemplo "da boa saúde económica do Concello", establecéndose un "control rigosoro do gasto". Para o Alcalde, Evencio Ferrero, trátase dun "bo documento que fará que Carballo continúe pola senda da estabilidade e do crecemento", incrementando nun 11,46 por cento os investimentos reais respecto de 2013, chegándose aos 4.845.000 euros. Tamén subliña que a débeda viva segue baixando e agora é de "tan só o 5,97 por cento", sendo a débeda por habitante de pouco máis de 100 euros.
SÁBADO 16 DE NOVEMBRO ÁS 21.00 HORAS
Venres 15 de novembro do 2013
O sábado 16 de novembro o público ten unha nova cita co Novembro con Música 2013, o programa musical elaborado pola Concellería de Cultura do Concello de Carballo, coa colaboración das Agrupacións Musicais de Carballo e da Deputación da Coruña. A partir das 21.00 horas no Pazo da Cultura ten lugar o Festival de Corais, unha das citas anuais coa música coral, con algunhas das formacións máis importantes de Carballo e da comarca de Bergantiños: a Agrupación Polifónica de Carballo, o Coro Aires de Bergantiños e a Coral Polifónica de Bergantiños. Fundada no ano 2001, polo que a converte na máis nova das tres que participan neste festival, a Agrupación Polifónica de Carballo, non deixa de ser a menos experimentada, porque moitos dos seus integrantes, xa formaron parte doutras agrupacións corais. Está integrada por músicos noveis e outros veteranos, incluso algún deles, galardoado coa medalla de prata Marcial del Adalid. Nestes 12 anos de carreira, a Agrupación Polifónica de Carballo ten actuado en numerosos eventos e lugares da nosa comunidade autónoma e, na actualidade, están dirixidos por Javier Otero. O coro galego Aires de Bergantiños, de carácter marcadamente tradicional, leva moitos anos recuperando e divulgando a música tradicional, o patrimonio cultural no máis amplo sentido da palabra.
UXÍA E ANTÓN SENSIBILIZAN AOS CATIV@S SOBRE O MEDIO AMBIENTE
Xoves 14 de novembro do 2013
O Concello de Carballo e Urbaser, a empresa concesionaria do servizo de recollida de lixo no municipio, veñen de principiar unha nova acción de divulgación da reciclaxe no marco do programa Carballo Limpo. Así, durante todo o mes de novembro, os rapaces e rapazas dos centros de ensino do municipio aprenderán as claves da reciclaxe de residuos e da recollida selectiva a través dun divertido obradoiro. Uxía e Antón son dous personaxes deseñados no seu día polo inesquecible deseñador carballés Alberto Gende para Carballo Limpo e agora cobran vida por medio dun actor e unha actriz que os caracterizan e divulgan en vivo toda a información que antes so se facía en papel. O alumnado que poderá gozar deste obradoiro é o dos ciclos de Primaria dos colexios, que se pretende sexan os transmisores e transmisoras da importancia que ten a colaboración da cidadanía na conservación do nosa contorna. Estas accións serán completadas cunha promoción coincidindo cos dous días de mercado semanal na capital municipal, cando estes personaxes realizarán tamén accións de divulgación. O primeiro día, hoxe 14 de novembro, os obradoiros visitaron o CEIP Bergantiños da capital municipal ás 10.00 horas e tamén aos alumnos e alumnas de 1º e 2º de Primaria do CEIP Xesús San Luís Romero ás 13.30 horas. A esta última cita tamén asistiron o Alcalde de Carballo, Evencio Ferrero e a Concelleira de Educación e Cultura Mar Eirís.
A POLICÍA LOCAL VIXIARÁ O CUMPRIMENTO DA ORDENANZA
Martes 12 de novembro do 2013
O Concello de Carballo solicita aos veciños e veciñas que cumpran coa Ordenanza municipal reguladora da limpeza, salubridade e hixiene no termo municipal de Carballo e non deixen os excrementos dos seus cans nas rúas da vila. Así, segundo a norma "queda absolutamente prohibido que os propietarios ou posuidores de cans deixen as deposicións dos seus animais en parques infantís ou xardíns de uso frecuente por parte dos nenos, así coma nas beirarrúas e zonas de paso de peóns, e en xeral, en toda a vía pública". Ademais "as deposicións que se produzan serán recollidas polos propietarios ou posuidores dos cans e colocaranse de maneira hixienicamente aceptable nos colectores de recollida de lixo". Por último, "queda prohibido depositalos en papeleiras públicas ou nas entradas das cloacas da rede de sumidoiros". As infraccións polo incumprimento da normativa están clasificadas como leves e graves. No primeiro caso, pasear un animal sen portar as bolsas ou recipientes para a recollida das súas dexeccións, ao ser requirido da súa exhibición polos funcionarios da inspección, e sen que se teña producido aínda a dexección do animal pode supoñer 50 euros. Infracción grave é deixar depositadas na vía pública as dexeccións dun animal, con 250 euros de sanción.
PRÁCTICAS DOS CURSOS AFD DE ELECTRICIDADE, COCIÑA E SOLDADURA
Luns 11 de novembro do 2013
Hoxe, luns 11 de novembro, vén de comezar o curso "Plan Xeral Contable" da Bolsa de Traballo Municipal (BDT) e do que se benefician un total de 20 usuarios e usuarias do servizo de busca de emprego local. Está previsto que teña 60 horas de duración repartidas en tres semanas en horario de mañá de 9.00 a 13.00 horas. Accederon a el de forma gratuíta persoas rexistradas na BDT con perfil académico de ciclos formativos medios ou superiores (FPII, Diplomaturas, Licenciaturas, Graos, etc.) en temas relacionado coa contabilidade (Administración e Finanzas, Empresas, Economía, Administrativo, etc.). Trátase dunha acción formativa baseada sobre todo nos aspectos prácticos en Contabilidade que lles permita aos alumnos e alumnas comprender cómo se realizan e formulan os estados financieiros a partir das anotacións contables e dominar os fundamentos da contabilidade e a normativa na que se apoia. Así mesmo, o Fórum acolle tres cursos do plan AFD (Accións Formativas para Desempregados) dos que nestes días principian as prácticas nas empresas. Trátase dun curso de Cociña de 828 horas de duración; un de Soldadura con eléctrodo revestido e TIG de 758 horas; e un curso de Operacións auxiliares de montaxe de instalacións electrotécnicas e de telecomunicacións en edificios de 458 horas.
DOMINGO 10 DE NOVEMBRO NA FEIRA DOMINICAL
Venres 8 de novembro do 2013
O domingo 10 de novembro, coincidindo coa feira tradicional, Carballo Limpo e Sogama coordinan unha campaña de promoción da reciclaxe entre a poboación, na que se contará cun camión e unha carpa nos que se repartirá material divulgativo. O obxectivo da campaña é incidir directamente na poboación para que esta comprenda a importancia de mellorar a clasificación dos residuos xerados nos seus fogares e reducir a cantidade de materiais non desexados ou "impropios" nos colectores amarelos. O stand estará situado na confluencia das rúas Coruña e Desiderio Varela de 10.00 a 14.00 horas. Ademais, esta iniciativa presta especial atención aos mais cativos e cativas, que poderán participar no "Xogo da reciclaxe". Este acto de colaboración entre Carballo Limpo e Sogama é o primeiro dunha serie de accións que Carballo Limpo levará a cabo nos vindeiros meses para promover a reciclaxe e así mellorar os índices de impropios nos diferentes colectores, tendo en conta ao mesmo tempo a ampliación do servizo de reciclaxe ás parroquias que se ten realizado nos últimos meses. Carballo Limpo e o Concello agradecen de antemán a colaboración da cidadanía, que fan uso do Punto Limpo Móbil chamando ao 981 75 49 17, e que contactan a través do web <www.carballolimpo.com> ou de Twitter @CarballoLimpo.
O DIRECTOR XERAL DE INDUSTRIA COMPROBOU A MARCHA DOS TRABALLOS
Venres 8 de novembro do 2013
O Director Xeral de Industria, Ángel Bernardo Tahoces, acompañado do Alcalde da Laracha, José Manuel López Varela, e dos concelleiros de Obras e Servizos e de Medio Ambiente do Concello de Carballo, Luís Lamas e Marcos Trigo, vén de visitar os traballos de mellora dos accesos ao Parque Empresarial da Laracha desde a estrada provincial DP-1909. Este proxecto xorde da colaboración entre os concellos de Carballo e A Laracha, que concorreron conxuntamente ás axudas convocadas pola Consellería de Economía e Industria para compartir os gastos e sacar adiante un proxecto que beneficia aos dous municipios. A través dun convenio entre ambos concellos, estableceuse que a contratación do proxecto se realizase dende a Laracha, adxudicándose as obras por 224.000 euros, contando cun financiamento de case o 80 por cento por parte da Consellería de Economía e Industria. Ao remate, terase realizado unha mellora integral dos 2.814 metros de lonxitude da estrada que comunica A Xesteira (A Laracha, no acceso ao parque empresarial) con Castelo (Carballo, parroquia de Vilela). Así, a vía contará con pavimentación en aglomerado asfáltico en quente de 6 centímetros de grosor e será ampliada en determinados treitos para acadar unha anchura de 6,30 metros e incluír a canalización para a recollida de augas pluviais, especialmente no lugar da Xesteira.
SÁBADO 9 DE NOVEMBRO ÁS 21.00 HORAS NO PAZO DA CULTURA
Venres 8 de novembro do 2013
Esta fin de semana arrinca o programa do Novembro con Música 2013, a programación do Concello de Carballo para o mes de Santa Cecilia. O programa está elaborado pola Concellaría de Cultura do Concello de Carballo e conta coa colaboración das Agrupacións Musicais de Carballo, da Deputación da Coruña e doutras entidades privadas. A primeira das actividades prevista é a xa clásica cita anual coas agrupacións de música tradicional de Carballo, baixo o título Sons de Aquí. Nesta ocasión a encargada de abrir o acto é a Banda de Gaitas Municipal de Carballo. A continuación será a actuación das Cantareiras de San Campio de Cances. Logo, a Asociación Lembranzas de Bergantiños de Bértoa e a súa nova formación musical a Vella Troula de Lembranzas do Grupo de Gaiteiros dos veciños do barrio de San Cristovo. De seguido volven os cantos e as pandeiretas co grupo de Cantareiras Xoldreira da AC Nemeth de Carballo e rematan este concerto os tres grupos que trae a Asociación Cultural e Xuvenil Arume de Berdillo: Cantareiras e Cantareiros da AC Arume, a Escola de Gaitas de AC Arume e as Cantareiras Névedas da Asociación Xuvenil Arume. Esta mostra de música tradicional galega é unha das actividades máis concorridas de Novembro con Música e hai que lembrar que a cita é o sábado 9 de novembro a partir das 21.00 horas.
O CURSO PLAN XERAL CONTABLE PRINCIPIA O 11 DE NOVEMBRO
Xoves 7 de novembro do 2013
O Fórum Carballo vén de acoller o acto de entrega de diplomas do curso "Xestión dun comercio" dirixido a usuarios e usuarias da Bolsa de Traballo Municipal (BDT) e que finalizaron con aproveitamento un total de 18 persoas. Presidiu a cita o Concelleiro de Formación e Emprego, Marcos Trigo, que lle desexou aos participantes que "atopen traballo o antes posible" para que a súa relación coa BDT sexa para mellorar a súa situación laboral pero non dende o desemprego. Os responsables da Bolsa de Traballo explican que os alumnos e alumnas quedaron moi satisfeitos coa acción formativa, especialmente coa parte práctica na que puideron vivir de primeira man casos de xestión de stocks, operacións de caixa, presentacións de produto ou simulacións de venda e dinámicas de grupo. O curso "Xestión dun Comercio", de 60 horas de duración, estivo dirixido a demandantes de emprego con experiencia no sector comercial e que queiran traballar no futuro como dependentes ou como xestores do seu propio negocio. A iniciativa afondou nas habilidades e coñecementos necesarios para a xestión dun establecemento de venda de cara ao público. Hai que subliñar que a BDT continuará nos próximos días coa súa oferta formativa para desempregados co obxectivo de axudar aos veciños e veciñas a mellorar a súa situación laboral.
NO PAVILLÓN VILA DE NOIA O 10 DE NOVEMBRO
Xoves 7 de novembro do 2013
O Pavillón Vila de Noia da capital municipal acolle o domingo 10 de novembro a fase final da Copa Galicia de Baloncesto en categoría Infantil masculina na que participa o Escola Basket Xiria. Enfrontarase ao Sigaltec Vilagarcía, ao Seis do Nadal Coia e ao Instituto Rosalía pola victoria neste torneo no que se dan cita os mellores xogadores galegos da categoría, moitos deles integrantes da selección galega de baloncesto e incluso da selección española. O adestrador do Basket Xiria, Arturo Ferraces, explica que a competición a inaugura o equipo local contra o Vilagarcía coa primeira semifinal ás 10.30 horas; ás 12.30 ten lugar a segunda semi entre os outros dous equipos e as finais son pola tarde, coa loita polo terceiro e cuarto posto ás 17.00 horas e a final ás 19.00. Ferraces subliña que preto do 90 por cento dos integrantes da selección galega estarán en Carballo o domingo, polo que espera que o público se anime a gozar dos partidos, especialmente nunha "categoría especial" na que se practica un "baloncesto moi bonito". Da mesma opinión é o Vicepresidente da Federación Galega de Baloncesto (Fegaba), José Manuel Villamarín, que describiu a cita como "unha boa oportunidade para ver aos mellores xogadores do momento". Villamarín tamén quixo agradecer a disposición tanto do Concello como do Escola Basket Xiria para acoller esta e outro tipo de citas importantes no calendario da Federación.
MÉRCORES 20 E MÉRCORES 27 DE NOVEMBRO NO PAZO DA CULTURA
Mércores 6 de novembro do 2013
O Concello de Carballo, a través do seu Servizo de Normalización Lingüística, organiza un ano máis un obradoiro de nanas dirixido a nais e pais, presentes ou futur@s, así como a outr@s familiares, formador@s ou persoas interesadas que queiran aprender ou practicar o aproveitamento do poder emocional das nanas e cantos de berce para arrolar os seus bebés. Este pequeno obradoiro terá catro horas de duración, e desenvolverase o mércores 20 e o mércores 27 de novembro, en horario de 17.00 a 19.00 horas, no Pazo da Cultura de Carballo. Nel poden participar un máximo de 25 persoas, ben soas, ben acompañadas do seu bebé. A inscrición é gratuíta e pode facerse no Servizo de Normalización Lingüística (no Pazo da Cultura) ou no teléfono 981 704 304, en días laborables en horario de mañá. De impartir o obradoiro encargarase, igual que o ano pasado, o músico bergantiñán Xabier Díaz, que é cantante dos grupos Berrogüetto e aCadaCanto e que, entre outros proxectos, publicou hai dous anos o exitoso disco "Arrolos de salitre", un álbum que contén precisamente 11 cantos de berce en galego. Este disco foi editado xunto co músico Guillerme Fernández, tamén músico de Berrogüetto e aCadaCanto, e que tamén participará neste obradoiro.
A PARTIR DO 11 DE NOVEMBRO
Mércores 6 de novembro do 2013
O Concello de Carballo, como cada ano, conmemora o 25 de novembro, Día Internacional para a Eliminación da Violencia de Xénero, con todo un mes cheo de actos programados pola Concellaría de Igualdade e Benestar entre os que se inclúen unha exposición, cinema, obradoiros, espectáculos e a xa tradicional Feira das Asociacións, na que participan numerosas entidades do municipio. Analizando polo miúdo as citas, como cada ano está previsto contar cunha mostra (na imaxe o cartel anunciador da de 2013), neste caso cedida por Médicos do Mundo e titulada"Mulleres, de vida alegre?". Composta por instantáneas de Salvador Campillo, transmítenos, a través do testemuño de catro mulleres, as causas e as consecuencias da explotación sexual. O obxectivo da mostra é concienciar á cidadanía acerca da situación na que se encontra un colectivo estigmatizado e excluído socialmente. Ademais de promover un cambio de actitudes cara á prostitución mostrando as súas consecuencias e dando voz e rostro ás mulleres que a exercen, mediante esta mostra Médicos do Mundo busca reducir o estigma que rodea ás persoas en situación de prostitución. Outra das actividades previstas terá lugar o propio luns 25 de novembro. O alumnado de 1º de Bacharelato dos IES de Carballo poderá asistir a un espectáculo lúdico musical e pedagóxico que analiza os roles de xénero que transmiten as cancións de temática amorosa.
.jpg)