SOLICITUDE PARA PODER DERRUBAR O EDIFICIO DA CÁMARA AGRARIA
Venres 27 de setembro do 2013
A sesión plenaria ordinaria do mes de setembro, que ten lugar o luns 30 a partir das 20.30 horas, inclúe entre os asuntos da orde do día a aprobación do Contrato administrativo especial para as "Concesións administrativas dos postos situados no Mercado Municipal de Carballo". Así, o Alcalde, Evencio Ferrero, explica que hai varios postos libres e tanto concesionarios actuais de postos do mercado como comerciantes alleos á praza de abastos queren optar á concesión, así como ao uso dalgún dos almacéns. Por ese motivo, está previsto sacar a licitación un total de once postos e cinco almacéns do Mercado. Porén, as condicións varían respecto de licitacións anteriores, xa que, até o de agora, o prazo estipulado era sempre de 20 anos. Desta volta os interesados e interesadas deciden a oferta económica anual e puxarán polos anos que queiran manter a concesión, que pode ir dende un ano ata os 20 marcados como máximo. Ademais da oferta económica anual, que ten un peso de 90 puntos na oferta, tamén se terá en conta o proxecto de explotación presentado, valorado en 10 puntos. Outro dos puntos da orde do día é o de Solicitude de transferencia da propiedade do edificio da Cámara Agraria, situado na contorna da Milagrosa, en desuso dende hai décadas e nestes momentos pertencente á Xunta de Galicia.
INSCRICIÓNS NO CONCURSO DE TEATRO LIDO: ATÉ O MÉRCORES 2
Venres 27 de setembro do 2013
O Concello de Carballo informa de que as entradas soltas para o Programa de Sala e o Ciclo OTNI do FIOT (Festival Internacional Outono de Teatro) 2013 poderán comprarse desde o luns 30 de setembro ata o día antes de cada función polo sistema de televenta. Só poderán adquirirse un máximo de catro pases por persoa. Na xornadas da representación, a billeteira do Pazo da Cultura abrirase de 19.30 a 21.00 horas por se quedasen entradas sobrantes da televenta en Servinova. Do mesmo xeito, hai que lembrar que desde o ábado 28 e até o xoves 3 de outubro está aberto o prazo para que o público en xeral compre os bonos da 22ª edición do FIOT. O prezo dos bonos para o público en xeral é de 62 € e 55 € o reducido (estudantes, parados e maiores de 65 anos). Respecto dos minibonos, tanto o minibono A coma o B poderán adquirirse desde o luns 30 de setembro. No primeiro caso o prazo está aberto até o mércores 9 de outubro por 35 €; no segundo até o mércores 23 de outubro por 40 €. Ao minibono A correspondénlles as obras dos días 11 ("André e Dorine" - Kulunka Teatro), 12 ("Eurozone" - Grupo Chévere), 19 ("Siglo de Oro, Siglo de Ahora (Folía)" - Ron Lalá) e 20 ("Un trozo invisible de este mundo" - Prod. Cristina Rota e Teatro Español).
NA PRÓXIMA XUNTANZA ABORDARANSE AS RECLAMACIÓNS DE ARNADOS
Xoves 26 de setembro do 2013
A Comisión de Urbanismo vén de manter dúas xuntanzas esta semana dentro do proceso de revisión das alegacións presentadas ao documento para aprobación inicial do Plan Xeral de Ordenación Municipal de Carballo (PXOM). Na primeira delas, celebrada o luns 23, abordouse a situación dos novos asentamentos previstos no PXOM. Examináronse un total de 16 e aínda que non se van incluír todos no documento final, si está previsto aceptar a maioría e realizar modificacións nalgúns outros. En todo caso, cando se remate co proceso haberá que ter en conta a visión xeral do documento no que respecta á edificabilidade para ver se é posible incluír todos os asentamentos que recibiron o visto e prace da comisión. O mércores 25 tivo lugar unha nova xuntanza, neste caso, e despois de rematar co proceso de revisión de alegacións en todo o medio rural, para abordar a parroquia de Razo, que dada a súa complexidade e o elevado número de reclamacións coas que conta, fora deixada para o final para tratala en profundidade. Os técnicos e os membros da corporación conseguiron rematar coa revisión de alegacións en Razo da Costa, mentres que Arnados abordarase na próxima xuntanza.
UN TOTAL DE 32 FORON RECUPERADOS POLOS SEUS DONOS
Xoves 26 de setembro do 2013
Despois da publicación no BOP da Coruña o pasado 6 de agosto da Ordenanza de Control Animal do Concello de Carballo, a empresa Servigal-UTE Carballo vén de comezar a xestión da canceira municipal en base a esta norma. Entre os cambios máis importantes que se establecen nesta ordenanza está que ningún propietario poderá retirar o seu can sen o "microchip" de identificación. Cando se recolle un can da rúa mobilízanse varios operarios de Carballo Limpo, da Brigada de Obras e incluso da Policía Local, polo que unha pequena parte deste custe así como da atención durante os días que o can estea aloxado na canceira, terá que ser abonada polo propietario ou propietaria. Un dos obxectivos principais deste servizo é a consecución de adopcións dos cans non identificados e que non son recuperados polos seus donos. Estes cans poderán ser recollidos dentro de todas as normas legais e sanitarias establecidas e a concesionaria entregará o animal desparasitado, vacunado, con "microchip", e realizará todas as tarefas administrativas incluíndo o rexistro no REGIAC (Rexistro Galego de Identificación de Animais de Compañía), sendo o custe total de 50 euros por adopción.
VENRES 23: FIN DAS INSCRICIÓNS PARA "UNHA NOITE DE FARÁNDULA"
Mércores 25 de setembro do 2013
Por segundo ano consecutivo, e tras o éxito acadado na pasada edición, os bonos, minibonos e entradas soltas para os espectáculos de sala e do Ciclo OTNI poderán comprarse a través do sistema de televenda de Servinova na súa páxina web www.servinova.com ou no 902 504 500. O teléfono estará operativo de 9.00 a 22.00 horas todos os días, excepto domingos e festivos. A páxina web activarase ás 9.00 horas dos días indicados. Este método de acceso a unha butaca do FIOT, que está tendo moi boa aceptación entre os usuarios, considérase unha canle de venda universal e equitativa para o público, así como rápida e accesible desde calquera lugar as 24 horas. Os primeiros en poder comprar os bonos serán os socios da Asociación Cultural Telón e Aparte durante dous días, desde as 9.00 horas do xoves 26 ás 22.00 horas do venres 27 de setembro. O pago realizarase exclusivamente con tarxeta e por teléfono xa que deberán identificarse como socios. En total, poñeranse á venda 175 bonos para asistir a todas as representacións e, no caso dos socios, aplicarse un desconto do 20 por cento sobre o prezo de venda (49,6 €). Así mesmo, tal e como xa se avanzara, os 50 primeiros socios do FIOT teñen dereito a adquirir un segundo bono no mesmo prazo reservado para eles.
CONSTÁTASE UN DESCENSO NO NÚMERO DE INCIDENCIAS
Mércores 25 de setembro do 2013
A Xunta Local de Seguridade do Concello de Carballo vén de manter unha reunión extraordinaria na que se constatou un bo comportamento dos índices de seguridade en todo o conxunto do municipio e tamén en concreto na parroquia de Ardaña, que se examinou en profundidade en resposta a unha demanda veciñal. Segundo subliñaron tanto o Subdelegado do Goberno, Jorge Atán Castro, como o Alcalde de Carballo, Evencio Ferrero, que co presidiron unha xuntanza de preto de hora e media de duración, os índices amosan un descenso no número de delictos respecto do mesmo período do ano anterior. Así mesmo, Atán e Ferrero subliñaron a implicación, sintonía e colaboración existente entre todas as forzas e corpos de seguridade presentes no municipio e valoran a colaboración dos veciños e veciñas mediante a denuncia de feitos delictuosos así como na información ás autoridades competentes de calquera conduta ou feito sospeitoso na súa contorna como fórmulas que redundan en beneficio de toda a comunidade. A reunión tamén serviu para realizar un balance positivo da campaña de verán que se tiña preparado na anterior Xunta Local de Seguridade, celebrada o pasado 6 de xuño.
O CENTRO ESPECIAL DE EMPREGO PRINCIPIA CO TRABALLO EN OUTUBRO
Martes 24 de setembro do 2013
O Alcalde de Carballo, Evencio Ferrero, o presidente de Aspaber (Asociación de Pais de Discapacitados Psíquicos de Bergantiños), Francisco Costa e a súa xerente, Dolores Fernández veñen de asinar na alcaldía o contrato administrativo de servizos de "Limpeza de colexios públicos de ensino de Infantil e Primaria do Concello de Carballo". O Centro Especial de Emprego de Aspaber foi a empresa gañadora do concurso e será a encargada de asumir estas tarefas por un prazo de catro anos prorrogables outros dous e por un prezo anual de 63.508,23 euros. A adxudicataria asume, así mesmo, mil horas de limpeza extraordinaria sen custo adicional repartidas entre todos os centros afectados polo contrato (CEIP Bergantiños, Fogar, Razo, varias escolas unitarias e a sede do CRA (Colexio Rural Agrupado)) e entre os catro anos de duración (250 horas por ano). Coa sinatura deste contrato concéntrase nunha única empresa un servizo que antes realizaban varias, o que supón un aforro aproximado de 10.000 euros para as arcas municipais. Segundo explicou Dolores Fernández durante a sinatura, neste momento dende Aspaber están realizando o proceso de selección de persoal, e calcula que o traballo implicará alomenos a contratación de dez persoas, aínda que non se descarta que sexan máis.
UNHA COMISIÓN DE SEGUIMENTO VALORARÁ OS AVANCES DA INICIATIVA
Luns 23 de setembro do 2013
Arredor de 20 nenos e nenas do CEIP Fogar da capital municipal veñen de poñer en marcha o proxecto Pedibús, unha iniciativa da Concellaría de Seguridade e Tráfico que dirixe Xosé Regueira que pretende poñer en marcha Camiños Escolares de acceso aos principais centros de ensino da vila para que os cativos e cativas vaian andando cada día ao colexio. O obxectivo é avanzar nunha alternativa de mobilidade para o alumnado dos centros de ensino do casco urbano carballés, creando rutas peonís nas que os nenos e nenas teñan contacto directo coa súa contorna cotiá, o seu barrio e as súas xentes. Xosé Regueira realiza un balance positivo desta primeira xornada, na que nais e pais voluntarios acompañaron aos alumnos e alumnas por cinco rutas que funcionan como se se tratase de paradas de autobús. Así, en determinados puntos é onde se recolle aos nenos e nenas que se van incorporando á ruta ata que conflúen todas na rúa Alfredo Brañas, dende onde xa van todos xuntos ata o Fogar, primeiro centro no que se ten posto en marcha o proxecto. O venres 20 de setembro arredor de 30 nais e pais, incluíndo algúns do CEIP Bergantiños, no que tamén se quere implantar a iniciativa, analizaron nunha xuntanza as principais claves dos Camiños Escolares ademais de recibir o material necesario. As reunións faranse cada semana nunha comisión de seguimento para reforzar os avances e solucionar os problemas que puideran xurdir.
AXUDAS PARA UN PROXECTO DE ECOTURISMO EN RAZO-BALDAIO
Luns 23 de setembro do 2013
A Xunta de Goberno Local vén de aprobar, fóra da orde do día, o Contrato administrativo de obras de "Mellora da capa de rodadura nos lugares de Ferradal (Bértoa) e Paraíso (Berdillo)" que contan cun orzamento de contrata de 110.765,53 euros (IVE incluído). Entre os criterios de adxudicación hai que subliñar o programa de traballo, a oferta económica ou a redución do prazo de execución, así como as melloras sen custe adicional. Tamén fóra da orde do día, aceptouse a axuda para un Plan de Dinamización de Ecoturismo en Razo-Baldaio (na imaxe). Así, a través da primeira convocatoria de axudas do ano 2013 do Grupo de Acción Costeira 3 - Costa da Morte, a Consellería do Medio Rural e do Mar acorda conceder unha acuda de carácter plurianual para o desenvolvemento desta iniciativa, cun importe de 2.800 euros para 2013 e unha achega de 36.568 euros para 2014, sendo o importe total de 39.368 euros. Así mesmo, aceptouse unha subvención da Consellería de Economía e Industria ao abeiro da orde do 13 de maio de 2013 pola que se establecen as bases reguladoras para a concesión das axudas para o soterramento de infraestruturas eléctricas que transcorran por un ou varios termos municipais da comunidade autónoma de Galicia, cofinanciadas polo Fondo Europeo de Desenvolvemento Rexional (Feder) na convocatoria 2007-2013.
INSCRICIÓNS DO LUNS 23 AO VENRES 27 DE SETEMBRO: 25 PRAZAS
Luns 23 de setembro do 2013
O XXII Festival Internacional Outono de Teatro preséntase este ano, por primeira vez, cun fillo moi artista debaixo do brazo, o "Fiotiño". Este novidoso concepto na traxectoria do Festival carballés quere reunir a parte máis lúdica e didáctica do FIOT concibida para achegar aos nenos e nenas ao teatro. A Asociación Cultural Telón e Aparte e o Concello de Carballo, organizadores do FIOT, queren sumarse así á tendencia de todos os grandes teatros do mundo que optan por ofrecer programas estables, actividades e espazos que achegan as artes escénicas aos máis novos. O campamento nocturno "Unha noite de farándula", enmarcado nas Actividades Paralelas do programa, xurdirá cando as butacas queden baleiras e as luces do escenario se apaguen. O equipo de monitores aproveitará a fascinación da noite para facer un percorrido pola evolución da historia do teatro e para mostrarlles aos cativos os segredos que se agochan tras as bambolinas, á vez que xogan e se divirten mentres se introducen nas distintas artes escénicas. O feito de que durman baixo os focos axudaraos a una mellor comprensión da maxia do teatro.
A EXCELENTE CLIMATOLOXÍA FAVORECEU A AFLUENCIA AOS AREAIS
Venres 20 de setembro do 2013
A Unidade de Salvamento Acuático do Concello de Carballo -que actúa nas praias do municipio durante a tempada de verán- vén de ofrecer os datos das principais incidencias rexistradas entre os meses de xuño e setembro. Este ano, a afluencia aos areais ten sido moi elevada, especialmente durante o mes de xullo e primeiros de agosto, debido á boa climatoloxía. Así, o verán saldouse cun total de cinco salvamentos, dous en Razo, dous nas Saíñas e un en Pedra do Sal. Os datos contrastan cos rexistrados en 2012, en que houbo un único operativo de rescate, mais hai que lembrar que o tempo non foi tan soleado e a afluencia aos areais foi menor na tempada pasada. Respecto dos rexistrados en 2013, o primeiro deles foi no mes de xuño en Razo; o segundo, tamén en Razo, o luns 22 de xullo, nun operativo para rescatar a dúas persoas; o 31 do mesmo mes houbo que sacar a un mozo de 22 anos de Carballo na zona de Pedra do Sal. En agosto, o cuarto rescate foi o martes 20 nas Saíñas, na zona das pontes de Baldaio, en que houbo que sacar a un rapaz de 18 anos, e a outro de 23, veciños de Carballo; o último salvamento produciuse o luns 26 de agosto e afectou a un home de 50 anos e con domicilio en Madrid. Entre os incidentes menores, chamáronse dúas ambulancias: unha en xullo por un posible golpe de calor; e outra en agosto para unha surfeira que rexistraba dores en costas e pescozo.
50 ACTIVIDADES TEATRAIS ENTRE O 3 E O 31 DE OUTUBRO
Venres 20 de setembro do 2013
O FIOT 2013 cumpre 22 anos sendo "un dos mellores festivais de Galicia e dos máis importantes do norte peninsular". Así define Alberto Sueiro, presidente da Asociación Cultural Telón e Aparte, organizadora do festival xunto co Concello de Carballo, a calidade do programa do FIOT 2013. Máis de 50 actividades relacionadas co teatro repartidas entre a Rúa dos Contos, o OTNI (Obxecto Teatral Non Identificado), as funcións de sala e a animación de rúa, que se verán apoiadas por numerosas actividades paralelas. Actores como Juan Diego Botto ou Malena Alterio, directores como Sergio Peris-Mencheta ou Claudio Tolcachir e compañías xa coñecidas para o FIOT como Titzina Teatre ou Ron Lalá encherán o auditorio do Pazo da Cultura. Un ano máis, todas as obras xiran arredor dun fío que leva dun espectáculo a outro. Neste caso o número 22 que identifica a edición suxire o tema das semellanzas e diferenzas que existen entre as parellas presuntamente de iguais. Respecto da venda de entradas, este ano introdúcese a figura do socio, de novo coa arela de premiar aos fioteiros máis fieis e facilitar a adquisición de bonos. A iniciativa tivo un grande éxito con preto de 100 novos asociados. Para o público en xeral, continúa o sistema do ano pasado, xestionándose bonos, minibonos e entradas unicamente a través da televenda por Internet en ; e tamén no 902 504 500.
.jpg)