NA PRÓXIMA XUNTANZA ABORDARANSE OS NOVOS ASENTAMENTOS
Xoves 19 de setembro do 2013
A Comisión de Urbanismo mantivo o mércores 18 de setembro unha nova xuntanza dentro do proceso de revisión das alegacións presentadas ao documento para aprobación inicial do Plan Xeral de Ordenación Municipal de Carballo (PXOM). Nesta reunión rematouse coa revisión de todas as alegacións correspondentes co medio rural do municipio, a excepción da parroquia de Razo, que polo número de reclamacións que lle corresponden, así como pola complexidade das mesmas, será necesario analizar nunha xuntanza en exclusiva. Na próxima comisión, que está previsto que se celebre o luns 23 de setembro a partir das 17.00 horas, abordaranse as alegacións relativas a novos asentamentos e de rematarse co proceso, na seguinte reunión, prevista para o mércores 25, continuaríase con Razo para saldar o rural definitivamente e principiar a analizar o casco urbano da capital carballesa. En todo caso, hai que subliñar que moitas das decisións tomadas neste proceso poden ser revisadas no futuro, en caso de que entren en contradición con parámetros xerais do documento, tales como as limitacións de solo residencial. De todos os xeitos, a maior parte da carga de traballo para o rural estaría concluída.
A NORMA SOMETERASE Á RATIFICACIÓN DO PRÓXIMO PLENO
Martes 17 de setembro do 2013
O voceiros dos grupos políticos municipais do Concello de Carballo acadaron, nunha xuntanza celebrada o luns 16 de setembro, o consenso para poder levar a Ordenanza reguladora de Praias á aprobación unánime do pleno na próxima sesión da corporación, que terá lugar a finais do mes de setembro. Así, durante esta semana realizarase a redacción dos artigos revisados, para axilizar o proceso. Nunha reunión de arredor dunha hora de duración debatéronse os principais puntos dunha normativa, a primeira no municipio referida en exclusiva ás praias, que pretende favorecer a convivencia entre todos os usuarios e usuarias dos areais, desde os bañistas, a paseantes, deportistas ou posuidores de animais domésticos. Na cita estiveron presentes o Alcalde de Carballo, Evencio Ferrero; o Concelleiro de Deporte e Medio Ambiente, Marcos Trigo; o Xefe de Protección Civil de Carballo, Javier Souto; e Juan Carlos Castro, Manuel Andrade e José Antonio Viña en representación dos grupos municipais de PP, TEGA e PSOE, respectivamente. A aprobación da normativa xa fora debatida no pleno ordinario de agosto, mais despois de que se tiveran manifestado algunhas dúbidas respecto dalgúns dos seus puntos, especialmente no referente a sancións, acordouse que o asunto quedara sobre da mesa para intentar acadar unha ratificación unánime, como así ten sucedido.
VENRES 20 E SÁBADO 21 DE SETEMBRO NA SALA DUBLÍN
Martes 17 de setembro do 2013
O Festival Xiria Pop volve de novo a Carballo no mes de setembro para ofrecer o mellor do pop e do rock do panorama nacional e internacional. Una cita na que se aposta pola calidade do directo e que atrae a moito público de toda Galicia e incluso de puntos de toda España, segundo subliña o Concelleiro de Mocidade, Daniel Pérez. Nesta XVI edición mantén a filosofía de citas anteriores de que "non fai falta pagar moitos cartos para ofrecer música de calidade". Así o asegura Xabier Graña, de O Molete Psicopop, asociación organizadora dun festival que ten un orzamento total, incluíndo os desprazamentos e aloxamentos dos grupos, de 10.000 euros. Este ano o Xiria Pop conta co estadounidense Javier Escovedo como cabeza de cartel. Escovedo, que actúa o venres 20 de setembro, é coñecido por ser o cantante, guitarrista e principal compositor da lendaria banda de punk rock de finais dos anos 70, The Zeros. Os "Ramones Mexicanos", como se lles coñecía pola súa ascendencia chicana e o seu son sucio e punk, foron un grupo fundamental na explosión punk de Los Ángeles daquela época. Na súa carreira en solitario ten sacado tan só un par de discos e no Xiria Pop presenta o seu último traballo. Ofrece en Carballo o penúltimo concerto da súa xira española -o único en Galicia- e conta cun directo moi potente.
XUNTANZA PARA OS VOLUNTARIOS: MARTES 17 ÁS 20.00 HORAS
Luns 16 de setembro do 2013
A Asociación Cultural Telón e Aparte e o Concello de Carballo están ultimando os detalles da organización do Festival Internacional Outono de Teatro (FIOT) de Carballo 2013, que este ano celebra o seu XXII aniversario. No 2010 iniciouse con moito éxito unha campaña de captación de voluntarios para colaborar nas actividades do Festival, co afán de implicar ao tecido social e aos afeccionados ao teatro na organización e desenvolvemento do mesmo. O resultado foi a formación dun equipo de voluntarios dinámico e competente que facilitou que as diversas actividades do FIOT se puidesen levar a cabo de forma óptima. Dado o grao de implicación do equipo formado hai tres anos, e tendo en conta que o FIOT vai medrando cada ano e a súa organización vai adquirindo unha maior complexidade, nesta edición lánzase novamente a convocatoria para os colaboradores voluntarios que desexen unirse ao equipo de traballo xa consolidado. O labor dos voluntarios será o de colaborar, en función da súa dispoñibilidade, coñecementos, aptitudes e intereses, con tarefas sinxelas que axuden ao desenvolvemento das actividades, sempre coa dirección do persoal responsable do Festival.
JORGE ATÁN XA LLE NOTIFICOU A SITUACIÓN Á GARDA CIVIL
Venres 13 de setembro do 2013
A Comisión Especial de Seguridade do Concello de Carballo mantivo unha xuntanza o xoves 13 de setembro na que se abordaron os problemas que neste ámbito xurdiron nos últimos días na parroquia de Ardaña, na que se teñen organizado grupos de vixilancia por parte da veciñanza. Durante a reunión, o Alcalde de Carballo, Evencio Ferrero, dou conta dunha carta remitida polo Subdelegado do Goberno, Jorge Atán Castro, en resposta a unha misiva enviada dende o Concello poñendo a situación en coñecemento da Subdelegación e solicitando a intensificación da vixilancia na parroquia por parte das forzas de seguridade. Atán explica que xa ten posto en coñecemento da Comandancia da Garda Civil a petición do Concello carballés, e subliña que "o vixente marco lexislativo establece que a seguridade pública é competencia exclusiva do Estado". Porén, engade que isto "non implica que os cidadáns queden ao marxe dun tema de tanta relevancia na vida de todos", senón que deben manter "unha dimensión de colaboración coas forzas e corpos de seguridade a través da denuncia e da transmisión da información de que se dispoñe respecto de actividades presuntamente delictivas". Esa colaboración "é perfectamente legal e absolutamente benvida" e "de unha maior utilidade" que outras medidas, incluso "imprescindible" para a consecución de resultados.
DOMINGO 15 DE SETEMBRO A PARTIR DAS 10.00 HORAS
Venres 13 de setembro do 2013
O Circuíto de Motor de Bértoa acolle o domingo 15 de setembro o XIV Motocross Concello de Carballo, unha proba puntuable para o Campionato Galego na que está previsto que participen preto de 50 pilotos, entre eles varios campións de España. Así, hai que subliñar a presenza de Rubén Fernández García, de 14 anos e Campión de España de Promesas de 2012; de Moisés Bernárdez Carro, nove veces Campión de España; ou de Xacob Agra Carrera, piloto mundialista de enduro. Tamén hai que destacar a participación de seis pilotos de Moto Club Motor Bergantiños, entidade organizadora da cita, como son Guillermo Loureiro, Iván Moscoso, Sergio Castro, Alberto Fernández, David Couto ou Serafín Lema. Juan Puga, de Motor Bergantiños, subliña que cada edición "custa máis traballo facer as carreiras" non só polas circunstancias económicas, senón tamén porque "cada vez os pilotos teñen máis dificultades para participar". Porén, considera que chegar a case o medio centenar de corredores é un "éxito". Puga tamén subliñou que se ten traballado para deixar o circuíto "nas mellores condicións" e anunciou unha variación que se ten feito na pista, subíndose de 32 a 35 metros a meseta principal para incrementar os saltos e "contribuír ao espectáculo".
SERÁ POSIBLE A TRAVÉS DUN PROTOCOLO DE COLABORACIÓN CO CONCELLO
Venres 13 de setembro do 2013
O Alcalde de Carballo, Evencio Ferrero, e o director de Cáritas Interparroquial de Bergantiños, Francisco Suárez Calvo, veñen de asinar un protocolo de colaboración co obxectivo de contribuír a axudar aos máis necesitados, especialmente en tempos de crise. Así, mediante este acordo, sempre que o programa formativo do Curso de Cociña que se está a desenvolver no Fórum Carballo o permita, a comida elaborada e preparada a través das prácticas laborais desta acción formativa achegarase a Cáritas para que poidan distribuíla no seu comedor social. Así, a partir de agora o servizo poderá ofrecerse tamén durante as fins de semana, xa que o catering do comedor tan só traballa de luns a venres. Coa comida elaborada polo alumnado do curso, que nesta ocasión cargaron o transporte (na imaxe) con lentellas e sándwiches, así como con natillas para os máis cativos e cativas, as familias necesitadas poderán asistir ao comedor todos os días. Francisco Suárez quixo agradecerlle ao Concello, no nome dos beneficiarios do comedor, a súa boa vontade para ceder os alimentos. Pola súa banda, Evencio Ferrero subliñou tamén a importancia que suporá para o alumnado do curso o feito de cociñar como un catering real para ofrecer un servizo real, o que, segundo tamén admitía a profesora do curso, será moi beneficioso para o programa formativo.
DO 18 AO 22 DE SETEMBRO NO PAVILLÓN CARBALLO CALERO
Venres 13 de setembro do 2013
Escola Lubiáns de Carballo cumpre este ano 30 anos de vida e o celebra co VII Torneo de Hóckey a Patíns Concello de Carballo no que se darán cita preto de 300 xogadores e un total de 14 clubs, incluídos os anfitrións. Entre o 18 e o 22 de setembro o Pavillón Carballo Calero da capital municipal acollerá toda unha serie de actos que comezan o mércores 18 coa actuación da Banda Municipal de Gaitas a partir das 20.30 horas e a celebración do partido inaugural ás 21.00 coa presenza do Dominicos, un equipo de 1ª Nacional, e o Cerceda, da Liga OK. Dous conxuntos "de alto nivel", segundo subliña o presidente de Escola Lubiáns, Fernando Fidalgo, que espera que ofrezan un bo espectáculo. O xoves 19 de setembro será a presentación do Club para a tempada 2013/2014, mentres que a partir do venres será a celebración do torneo propiamente dito, no que o club ten acadado a participación de "practicamente todos os equipos da provincia", en verbas de Fidalgo. Así, o 20 de setembro xóganse as semifinais en todas as categorías que son benxamín, prebenxamín, alevín e sénior; o sábado 21 é a quenda da loita polo terceiro e cuarto posto tamén para todas as categorías e para as finais, sendo as sénior a partir das 20.45. O domingo 22 está pensado como unha gran festa para os nenos e nenas das Escolas a partir das 10.30 horas.
ESPECIALMENTE DIRIXIDO A MAIORES, ESCOLARES E DISCAPACITADOS
Xoves 12 de setembro do 2013
Representantes de "la Caixa" e o Concello de Carballo veñen de asinar un convenio de colaboración polo que a entidade financeira potenciará no municipio, mediante unha achega económica, toda a actividade deportiva de base, e especialmente a destinada a colectivos de persoas maiores, escolares e persoas discapacitadas. Tanto o Alcalde de Carballo, Evencio Ferrero, como o Director de Área de Negocio de "la Caixa" na Coruña, José Manuel Caamaño, manifestaron a súa satisfacción por continuar cunha colaboración que permite a realización de numerosas actividades deportivas en Carballo. Caamaño quixo destacar a importancia da Obra Social "la Caixa" en Galicia, especialmente nestes momentos, "nos que a nosa entidade está a realizar un grande esforzo para seguir apoiando concellos como o de Carballo na consecución dos seus proxectos sociais, e que estes non se vexan resentidos pola conxuntura económica", declarou. Pola súa banda, o Alcalde de Carballo expresou o desexo do Concello de seguir apostando polo deporte de base, xa que o municipio ten podido converterse nun exemplo de difusión deportiva entre os máis novos. Para Ferrero, ademais, "o deporte é unha excelente plataforma para resaltar as potencialidades do municipio" e desexou que esta forma de colaboración con "la Caixa" poida continuar no futuro.
MÁIS INFO E INSCRICIÓNS EN <atletismocarballo2013@gmail.com>
Mércores 11 de setembro do 2013
Carballo vén de presenciar o nacemento do primeiro club de atletismo de Bergantiños e tamén o único do municipio. Trátase do Club Atletismo Carballo, que principia a súa andaina, en verbas da súa presidenta, Asun Vázquez, "para encher un baleiro" que había na zona respecto a este deporte e pola "necesidade" dun grupo de nais e pais de crear un marco para que os seus fillos e fillas puidesen practicar esta disciplina en Carballo. Vázquez subliña que a nova entidade comeza con "moitas ganas de traballar e moitísima ilusión" e abre as filas do club non só aos veciños de veciñas de Carballo, senón de toda a comarca. O Alcalde de Carballo, Evencio Ferrero, que apoia o nacemento do club en nome do Concello, ao igual que a Federación Galega de Atletismo da man do seu presidente, Isidoro Hornillos, e a Fundación Luís Calvo Sanz representada por Luciano Calvo, desexoulle "moitísimos éxitos" a esta nova iniciativa e manifestou o seu soño de ver que "algún día algún veciño ou veciña de Carballo participe nuns Xogos Olímpicos". Os interesados e interesadas en anotarse no novo club ou pedir máis información poden facelo no enderezo electrónico . A cota mensual é de 15 €, incluíndo adestramentos, seguro ata 1º de ESO, licenzas deportivas, transporte para competicións e camiseta técnica para competir.
LUZ VERDE PARA O PROGRAMA DE EXERCICIO PARA MAIORES
Luns 9 de setembro do 2013
A Xunta de Goberno Local reunida en sesión ordinaria vén de aprobar -fóra da orde do día- o proxecto de Reurbanización da Rúa Valle Inclán da capital municipal (na imaxe), cun orzamento previsto de 199.705,82 euros (IVE incluído). A actuación recolle que a vía recibirá o mesmo acabado que o treito da Rúa Desiderio Varela que transcorre entre a rúa Camiño Novo e a Rúa Colón. Así, está previsto colocar en toda a lonxitude da rúa Valle Inclán unha calzada de lastras e beirarrúas de pedra con bordes de granito negro ao mesmo nivel que a vía. O proxecto non inclúe a dotación do mobiliario urbano, aínda que está previsto realizar esta actuación no futuro, cando rematen os traballos. Coa aprobación do proxecto en Xunta de Goberno comeza xa o proceso de contratación para que as obras comecen o antes posible. O prazo de execución previsto para a actuación é de tres meses. Hai que lembrar que a rúa Valle Inclán ten sido obxecto de melloras hai pouco, coa substitución das redes de saneamento antigas por outras de PVC, unhas melloras que se completan agora cos traballos de reurbanización. A sesión tamén supuxo a aprobación, un curso máis, do Programa de Exercicio Físico para maiores de 60 anos que transcorre entre o 1 de outubro de 2013 e o 30 de xuño de 2014.
INTERESAD@S INSCRIBIRSE NO MUSEO DE BERGANTIÑOS
Luns 9 de setembro do 2013
Tal e como se tiña adiantado no pasado mes de xullo, dende o Concello de Carballo estanse a organizar distintas accións formativas dirixidas especificamente ao sector turístico do Concello. Así, desenvolveranse tres cursos entre os meses de setembro e outubro. Trátase dun Curso de Alimentación e Nutrición Saudable dirixido a hostaleiros; dun Curso de Aproximación á calidade turística para profesionais do sector; e do Curso Impactic Carballo. No primeiro caso, a actividade consta de catro sesións presenciais -que se realizarán os días 17, 19, 24 e 26 de setembro en horario de tarde- e ten como obxectivo proporcionar aos profesionais da hostalería unha primeira aproximación ás bases da nutrición e da cociña saudable, de maneira que aprendan claves, consellos útiles e posibles fórmulas para contribuír a mellorar as dietas dos seus clientes. No caso do curso de Aproximación á calidade turística, está previsto que teña lugar entre a segunda e terceira semana de outubro. A acción formativa busca un achegamento aos conceptos e a filosofía da calidade turística, xa que a través da súa implantación ofrécese ao sector a posibilidade de mellorar a súa viabilidade económica, de acadar unha maior satisfacción do cliente e de contribuír a proporcionar unha imaxe máis atractiva do territorio.
.jpg)