PRAZO DE PARTICIPACIÓN: ENTRE O 3 E O 18 DE AGOSTO
Luns 5 de agosto do 2013
O Concello de Carballo, a través da súa páxina de Facebook "Turismo Carballo", convoca un concurso de fotos para compartir e dar a coñecer lugares e momentos especiais de Carballo. Para participar, os interesados e interesadas tan só teñen que enviar a través da red social unha foto dun lugar ou dun momento vivido en Carballo na que se inclúa o logo da campaña "Carballo a un paso" coa que descurbrir un momento, lugar ou vivencia especial. Dende o sábado 3 e até o domingo 18 de agosto ás 00.00 horas poden mandarse as imaxes por mensaxe privada a través da páxina <facebook.com/turismo de carballo>. Serán publicadas na mesma páxina de Facebook na semana seguinte, entre o 19 e o 25 de agosto, tamén até as 0.00 horas. As tres que consigan máis "gústame", resultarán gañadoras. Os premios son: primeiro, unha cea con noite a almorzo incluído para dúas persoas nun aloxamento de turismo rural de Carballo; segundo, un circuíto termal para dúas persoas no Balneario de Carballo; e terceiro, unha xornada de aventura en Carballo para dúas persoas, a escoller entre bautismo de surf, ruta a cabalo ou golf.
INSCRICIÓNS ATÉ O LUNS 12 DE AGOSTO
Venres 2 de agosto do 2013
Carballo acolle por quinto ano consecutivo a carreira "Circuíto BTT 12 horas", unha marcha cicloturista para Bicicleta Todo Terreo (BTT) de velocidade libre e de carácter lúdico dirixida a todo aquel deportista que desexe participar conte ou non con licenza. A proba ten lugar o sábado 24 de agosto entre as 10.00 e as 22.00 horas e acolle a participación individual ou por equipos formados por entre dous e catro corredores. A proba disputarase por relevos sobre un circuíto de 8.400 metros con saída e chegada no Parque Empresarial de Bértoa de Carballo, á altura da nave de Garaysa. Segundo explica Moncho Ríos, da Asociación Deportiva Media Ducia, organizadora da cita coa colaboración do Concello de Carballo, a proba está pensada para que os máis expertos realicen unha verdadeira competición con varias voltas e para que os afeccionados tamén teñan a oportunidade de participar co "obxectivo de integrar a todos os ciclistas". Cada corredor estará conectado por chip, para que ao final da xornada poida coñecer o número de voltas que realizou, os seus tempos, etc. As incricións poden formalizarse até o luns 12 de agosto a través do web de Magma Sports ou pedindo máis información a través do web de Media Ducia www.admediaducia.es.
ESTARÁ ATA FINAIS DE AGOSTO NO XARDÍN MUNICIPAL
Xoves 1 de agosto do 2013
O stand de turismo do Concello de Carballo estará ao longo dun mes na Praza do Concello para que todas aquelas persoas que se acheguen á vila poidan saber de modo rápido e fácil todo o que o municipio ten que ofrecer. O stand encádrase na campaña turística "Carballo a un paso", que este verán está a presentar os mares e praias, os montes e ríos, a riqueza balnearia, a historia e a tradición comercial a todas as persoas que visiten a comarca. Así, está dotado dun rico banco de imaxes que amosa o mellor da paisaxe, o patrimonio e a arquitectura do municipio, ademais de contar con novos folletos turísticos dispoñibles para o público. O stand, situado a carón do Parque Infantil do Xardín Municipal e moi preto da rúa Coruña, procura unha imaxe moderna, dinámica, xuvenil e moi atractiva, simbolizada pola cor fucsia que nel predomina, ao igual que na imaxe promocional da campaña "Carballo a un paso". Trátase dunha estrutura móbil que permite anunciar o Concello de Carballo en todos aqueles espazos que poidan resultar de interese para a promoción do Concello, tales como, por exemplo, feiras turísticas. Está aberto ao público de xoves a sábado e domingo de feiras pola mañá, de 11.00 a 14.00 horas. Pola tarde, de martes a sábado, de 17.00 a 21.00 horas. Máis información no web <www.turismocarballo.com>.
VENRES 2 DE AGOSTO ÁS 22.30 HORAS
Xoves 1 de agosto do 2013
Un dos pratos fortes do Verán Cultural serve para arrincar a programación do mes de agosto: o venres 2 a compañía de baile e música Contra2 ofrece o espectáculo "Orquestra Gharbo". O gharbo é fachenda e soberbia, pero tamén elegancia, desenvoltura, graza e xeito. Gharbo é unha actitude e finalmente unha historia, a historia que a compañía Contra2 conta por vez primeira en Carballo ao aire libre, a través da música e do baile tradicional fusionados con novas formas. Nun faiado desenvólvese a acción deste espectáculo no que o propio espazo e os obxectos que o ocupan toman vida como símbolo da nosa memoria colectiva no corpo dos habitantes dese fogar, nunha mestura de momentos históricos e temporais. Tangos, alalás, muiñeiras, maneos, xotas ou pasodobres cun son máis actual e influencias ben recoñecibles veñen da man de Nelson Quinteiro, director musical e escénico do espectáculo, Fran Castro, Pulpiño Viascón, Eduardo Méndez "Dubi", coa colaboración de Silvia Penide e Maghúa Pandereteiros e das actrices/performers, María Polo e Uxía Vázquez. Un elenco que fai de "Orquestra Gharbo" unha experiencia inesquecible que tamén estará dispoñible en breve en soporte dixital. A cita ten lugar ás 22.30 horas na Praza do Concello e conta coa colaboración da Deputación da Coruña.
DOMINGO 4 DE AGOSTO A PARTIR DAS 10.00 HORAS
Mércores 31 de xullo do 2013
O Club Ciclista Carballo-Placasa cumpre 25 anos de vida e o festexa organizando o Campionato Galego de Fondo, no que durante a xornada do domingo 4 de agosto arredor de 150 ciclistas de categorías femias, cadetes e júnior percorrerán as rúas e estradas do municipio carballés. O presidente da Federación Galega de Ciclismo, Manuel Tallón, que organiza a cita xunto co Club e o Concello, subliñou o alto nivel da cita, á que acoden algúns dos mellores ciclistas galegos. Pola súa banda, a presidenta do Club Ciclista Carballo, Vanessa Loureiro, quixo pedir desculpas, xa que a proba estaba prevista para o 20 de xullo, mais tivo que "aprazarse por motivos alleos ao club". Loureiro defendeu o ciclismo feminino, reclamando unha proba de fondo só para mulleres e subliñando que a do domingo é unha das poucas citas nas que participan. O director deportivo do Carballo-Placasa, Juan Seoane, resaltou "a dureza" dos percorridos, algo polo que o Club quixo apostar ao tratarse dun campionato galego. Para o seleccionador galego, José Ángel Vidal, "trátase dun percorrido bonito", con "moitas pendentes" que contribuirán a facer "un campionato" duro e disputado. A organización quere subliñar que este ano a saída e a chegada están na Avenida da Milagrosa, na contorna do Fórum Carballo (onde están a oficina e o parque pechado), e que a proba arrinca ás 10.00 horas.
BOLSA DE TRABALLO MUNICIPAL
Martes 30 de xullo do 2013
O auditorio da Nave 1 do Fórum Carballo vén de acoller a entrega de diplomas do curso "Redes Sociais Profesionais", de 20 horas de duración e que contou coa participación continuada de 31 persoas; e do curso "Busca de emprego e novas tecnoloxías", de 30 horas de duración e ao que asistiron 20 persoas. O Concelleiro de Formación e Emprego, Marcos Trigo, foi o encargado de presidir este acto no que estiveron presentes a maioría dos alumnos e alumnas que durante o mes de xullo tentaron mellorar a súa empregabilidade nos ámbitos das novas tecnoloxías da información e a comunicación. Trigo animou aos participantes a que continúen con accións formativas no futuro e manteñan o contacto coa Bolsa de Traballo ademais de desexar que atopen unha ocupación o antes posible. Hai que subliñar que todos os beneficiarios destas accións formativas están inscritos na Bolsa de Traballo Municipal. No caso do curso de "Busca de emprego e novas tecnoloxías", estivo dirixido a persoas con baixa cualificación académica e pouca preparación ante o mercado de traballo e a busca de emprego por Internet. No que respecta ao curso de "Busca de emprego e novas tecnoloxías", estivo dirixido a persoas con media e alta cualificación académica tales como ciclos formativos de grao superior, diplomados/as, licenciados/as ou terceiros ciclos anotados na Bolsa de Traballo.
ESTÁ PREVISTO OUTROS TANTOS ANOTADOS PARA A QUENDA DE AGOSTO
Martes 30 de xullo do 2013
O Alcalde de Carballo, Evencio Ferrero, e a Concelleira de Igualdade e Benestar, Silvana Castro, aproveitaron a mañá lúdica que marca a fin da quenda de xullo das Actividades de Verán do programa Concilia para visitar o CEIP A Cristina e falar cos arredor de 75 rapaces e rapazas que aproveitaron o servizo durante o pasado mes. Tamén se informaron de primeira man cos monitores e monitoras e responsables da empresa Axiña Servizos Deportivos, encargada de atender aos nenos e nenas entre as 10.00 e as 14.00 horas en xullo e agosto nun servizo que funciona por cuarto ano consecutivo. Colchóns inchables e xogos tradicionais como o hula-hoop ou a corda entretiveron aos nenos e nenas durante boa parte da mañá. O mércores 31 está previsto realizar unha excursión para pechar definitivamente a quenda de xullo. Dende Axiña, informan que para a quenda de agosto está prevista a participación de outros 70 cativos e cativas, aínda que moitos dos que aproveitan o servizo repiten, xa que están inscritos durante todo o verán. O programa Concilia é unha iniciativa que pretende favorecer a conciliación da vida laboral e familiar dos pais e nais dos alumnos e alumnas dos centros escolares carballeses de Infantil e Primaria. O prezo máximo estipulado por mes para as Actividades de Verán, prezo que debe aboarse no momento da inscrición, é de 58 euros.
MODIFICADAS CINCO ORDENANZAS FISCAIS E DE PREZOS PÚBLICOS
Martes 30 de xullo do 2013
A sesión plenaria ordinaria do mes de xullo supuxo a aprobación, co voto a favor de todos os grupos da corporación e a abstención de TEGA, dun expediente de suplemento de crédito para incorporar un millón de euros do remanente de tesourería e destinalo a investimento en obras de mellora en estradas e rúas do municipio. Así, o Concello conta un remanente de máis de cinco millóns de euros, dos que, descontando o crédito con entidades financieiras, restan 1,7 millóns. Desa cantidade, o Concello propón a incorporación de aproximadamente un millón de euros co que se mellorará a capa de rodadura en viarios estruturantes de distintas parroquias que soportan un elevado nivel de tráfico; a capa de rodadura en Nétoma-Razo, Ferradal-Bértoa e Paraíso-Berdillo; realizarase o acondicionamento da contorna do cemiterio de Berdillo; o soterramento das estruturas eléctricas no lugar da Piña en colaboración do Concello da Laracha; ou emprenderase a mellora do firme en 20 rúas do casco urbano de Carballo de máis de mil metros cadrados de superficie. Así mesmo, realizaranse actuacións de mellora da seguridade viaria, de substitución da caldeira do Concello e de acondicionamento da rúa Valle Inclán. Unha vez rematados os traballos que se están desenvolvendo na vía, cos que se están substituíndo as redes de saneamento antigas por outras de PVC, está previsto acondicionar a vía para darlle un acabado final similar á da Desiderio Varela.
PRÓXIMA XUNTANZA: O MARTES 20 DE AGOSTO
Martes 30 de xullo do 2013
A Comisión de Urbanismo vén de manter hoxe, martes 30 de xullo, unha nova xuntanza dentro do proceso de revisión das alegacións presentadas ao documento para aprobación inicial do Plan Xeral de Ordenación Municipal de Carballo (PXOM). Neste caso, os técnicos e representantes dos catro grupos políticos da corporación, PSOE, TEGA, PP e BNG, presididos polo Alcalde, Evencio Ferrero, e pola Concelleira de Planificación e Desenvolvemento Urbano, Milagros Lantes, revisaron todas as alegacións presentadas no medio rural correspondentes coas parroquias de Aldemunde, Ardaña e Artes. Así, quedaron todas as reclamacións destas zonas resoltas, aínda que non de forma completamente definitiva, xa que pode haber algunha pequena modificación no futuro se as decisións afectasen á capacidade residencial ou a outros aspectos globais do documento. A próxima xuntanza está prevista para o martes 20 de agosto, cando se continuará co proceso por orde alfabética, aínda que hai que lembrar que non está revisada aínda ningunha reclamación da parroquia de Razo, xa que é a que presenta maior número de alegacións, con máis de 200, e tamén as de maior complexidade, polo que o máis probable é que se lle dedique unha xuntanza en exclusiva. Hai que lembrar que o documento para aprobación inicial do PXOM recibiu un total de 1.921 alegacións presentadas por 2.451 alegantes.
CAMPAÑA NA PRAZA DO CONCELLO ENTRE O 1 E O 3 DE AGOSTO
Luns 29 de xullo do 2013
O Concello de Carballo rexistrou durante o ano 2012 un total de 1.305 doazóns de sangue, o que supón un incremento dun 5 por cento respecto do período anterior e sitúa a Carballo como a vila número 13 de Galicia en canto a número de doazóns. O ano pasado acadouse unha taxa de 42 doazóns por cada 1.000 habitantes e ano, cifra que supera a media galega e que se atopa dentro das recomendacións da Organización Mundial da Saúde (OMS). Hai que subliñar os datos positivos da vila nunha tendencia negativa en Galicia, que ten rexistrado un descenso dun 1 por cento nas doazóns, ademais de que o Concello supera o incremento rexistrado en Bergantiños, dun 4 por cento. Son datos expostos polo responsable de promoción do Centro de Transfusión de Galicia (CTG), Antonio Carcedo, que quixo agradecer o labor do Concello nas tarefas de chamamento cidadá que se realizan cada ano. O xoves 1, venres 2 e sábado 3 de agosto unha Unidade Móbil do CTG estará situada na Praza do Concello para contribuír a manter o número de doazóns en 2013. Entre xaneiro e xuño deste ano téñense realizado 537 doazóns, catro menos respecto do mesmo período do ano anterior. O Concello, Protección Civil e socorristas están realizando estes días unha campaña para sensibilizar á poboación, usando as megafonías das praias do municipio e repartindo información na vila para que a veciñanza poida contribuír a que moitos enfermos recuperen a súa saúde.
XUNTA DE GOBERNO LOCAL
Luns 29 de xullo do 2013
A Xunta de Goberno Local, reunida en sesión ordinaria, vén de aprobar un convenio de colaboración entre o Concello de Carballo e Vía Láctea Filmes para a realización da longametraxe cinematográfica "Sicixia". A produtora Vía Láctea é ben coñecida polo éxito das súas últimas longametraxes para cine en 35 mm "Pradolongo" (2008) e "Vilamor" (2012), e agora acomete o proxecto de levar á gran pantalla a primeira película rodada integramente na Costa da Morte. Dende a preparación e a rodaxe, a comarca será tan protagonista como os propios personaxes, tendo Carballo tamén un papel fundamental, ao igual que a Costa da Morte, no aspecto paisaxístico, monumental, gastronómico e histórico, sendo a película unha plataforma para a promoción integral do municipio e poñer en valor aspectos da vila e a comarca como a lingua, o territorio, a cultura ou as tradicións. Carballo acollerá no seu momento a estrea oficial do filme, coa participación do equipo técnico e artístico, sendo tamén a vila protagonista nos labores xerais de promoción. A cinta contará con distribución internacional e presenza nos festivais de cine máis prestixiosos. Por todo o anterior, o Concello considera importante apoiar a realización do filme, polo grande interese cultural e polo impacto de promoción para o Concello e a Costa da Morte.
AS BANDEIRAS DA CASA CONSISTORIAL ONDEAN A MEDIA ASTA
Venres 26 de xullo do 2013
Con motivo do dramático accidente de tren acontecido na tarde do mércores 24 de xullo en Santiago de Compostela, o Concello de Carballo fixo un chamamento á cidadanía para que ás 12.00 horas do venres 26 de xullo participase nunha concentración diante da casa consistorial na que se gardaron cinco minutos de silencio. Arredor dun centenar de persoas se achegaron para amosar o seu respecto e solidariedade coas vítimas do terrible descarrilamento en Angrois que polo de agora ten causado 78 mortos e 130 feridos, así como coas súas amizades e familiares. Na cita participaron traballadores do Concello, a ampla maioría dos membros da corporación, e veciños e veciñas da vila. Ademais, respectando os días de loito, as bandeiras que presiden o edificio do Concello estarán a media asta. O Alcalde de Carballo, Evencio Ferrero, presidiu un acto no que desexou a pronta recuperación dos feridos, entre os que se atopan "persoas que viven entre nós" pero que "afortunadamente" parece que van sobrevivir, e desexou que "accidentes coma este non se volvan a producir". Así mesmo, quixo agradecer a "solidariedade" dos presentes. Hai que mencionar que o Concello ten suspendido as actividades culturais e lúdicas previstas para esta fin de semana incluídas no programa Verán Cultural en sinal de respecto ás vítimas.
.jpg)