LUZ VERDE PARA O PREGO DE CONTRATACIÓN DO SUBMINISTRO ENERXÉTICO
Martes 2 de xullo do 2013
O pleno da corporación vén de aprobar por unanimidade o deslinde dos termos municipais de Carballo e A Laracha. O proceso para sacar adiante a acta de deslinde comezou en setembro de 2008, e dende entón tense realizado un exhaustivo traballo de identificación e localización dos marcos, xa que existían dúbidas en arredor de 30, estando situados a maioría deles nas parroquias de Sofán, Bértoa, Berdillo e Noicela. O proceso rematou cun acordo unánime da comisión de deslinde, e finalmente do pleno o luns 1 de xullo. A pesar de ser un proceso laborioso, conta co acordo dos municipios implicados e afecta na súa maior parte a leiras, montes e pistas forestais, con moi poucas vivendas implicadas. Outro dos asuntos da orde do día aprobado por unanimidade foi a aprobación inicial da Ordenanza Municipal reguladora do exercicio de actividades de apertura de establecementos e da realización de determinadas obras menores que aplica a Directiva europea Bolkestein, tamén coñecida como Directiva de servizos. O obxectivo final da normativa é contribuír a axilizar trámites administrativos, por exemplo, facilitando que os establecementos que queiran iniciar a súa actividade e que non estean sometidos a un informe sectorial só teñan que comunicarllo ao Concello, sen máis xestións.
SUBVENCIÓN PARA OS VOLUNTARIOS DE PROTECCIÓN CIVIL
Luns 1 de xullo do 2013
A Xunta de Goberno Local reunida en sesión ordinaria vén de aprobar dous convenios de colaboración co Centro Comercial Aberto (CCA) Carballo e coa Asociación de Xóvenes Empresarios de Bergantiños (Axober) destinados á dinamización da actividade económica. No primeiro caso trátase dun acordo para o desenvolvemento de medidas de potenciación e posterior execución de actividades para a consolidación dun centro comercial aberto na vila, co desenvolvemento de accións de modernización, innovación e dinamización do comercio local. Entre estas accións hai que subliñar a organización de Xornadas de sensibilización, formación e reciclaxe, a elaboración do Catálogo do CCA, a organización da Feira das Oportunidades ou do desfile de moda do CCA. No caso de Axober, o convenio persegue o desenvolvemento de medidas de dinamización empresarial, fomento da emprendeduría e do asociacionismo e consolidación de empresas con actuacións como a celebración de eventos dinamizadores, de formación, información ou promoción. Entre as actividades coas que colabora o Concello a través do convenio están as Xornadas de Enerxías Renovables, a elaboración de guías, webs ou catálogos, ou a realización de accións publicitarias coa colaboración da administración local, entre outras. A vixencia estipulada é até o 31 de decembro de 2013.
INSCRICIÓNS A PARTIR DO LUNS 1 DE XULLO
Venres 28 de xuño do 2013
O Concello de Carballo informa da celebración dun Curso de Alimentación e Nutrición Saudable dirixido ao colectivo de profesionais do sector hostaleiro do municipio, que terá lugar nas instalacións do Fórum Carballo a partir do luns 15 de xullo. A actividade é gratuíta e para participar os interesados e interesadas tan só deben inscribirse na Oficina de Información Turística situada no Museo de Bergantiños a través do teléfono 981 702 077 ou do enderezo electrónico <museo@carballo.org> a partir do 1 de xullo e até o venres 12 do mesmo mes. Está previsto ofrecer entre 20 e 25 prazas, mais en caso de que haxa máis solicitantes que prazas dispoñibles, a admisión realizarase por estricta orde de inscrición. O obxectivo desta acción formativa é proporcionar aos profesionais da hostalería unha primeira aproximación ás bases da nutrición e da cociña saudable. Así, preténdense proporcionar as claves sobre as consecuencias dunha pouco axeitada alimentación e, polo tanto, proporcionar consellos útiles e posibles fórmulas para contribuír a mellorar as dietas dos seus clientes. Ademais, esta acción formativa persegue dotar de contidos formativos as instalacións da Escola de Hostalería (na imaxe) que se atopan na Nave 4 do complexo Fórum Carballo e axudar a poñer en valor o sector hostaleiro da bisbarra.
EXPEDIENTE PARA A CONTRATACIÓN DO SUBMINISTRO ENERXÉTICO
Venres 28 de xuño do 2013
O pleno da corporación celebra o luns 1 de xullo unha sesión extraordinaria na que entre os asuntos da orde do día recóllense a aprobación do deslinde co Concello da Laracha e a disolución do Padroado Deportivo Municipal, ademais do visto e prace para o expediente de contratación do subministro enerxético para o municipio ou a aprobación inicial da Ordenanza do exercicio de actividades de apertura de establecementos e realización de obras menores. Hai que lembrar que xuño non contou cunha sesión plenaria ordinaria, xa que o último luns de mes cadrou o día 24, festivo por mor do San Xoán. Ao non celebrarse na data correspondente, decidiuse celebrar unha sesión extraordinaria a primeiros de xullo. Respecto da orde do día, caracterízase especialmente por asuntos de importante calado administrativo. Entre eles, está a disolución e extinción do Padroado Deportivo Municipal que supón, segundo explica o Alcalde, Evencio Ferrero, "unha simplificación da administración", e proponse para "optimizar esforzos". Ferrero asegura que esta modificación é simplemente administrativa e non vai supoñer "cambios na concepción da xestión deportiva". Así, a partir de agora a actividade deportiva será directamente xestionada pola Concellaría de Deporte e o persoal do Padroado incorporarase á RPT (Relación de Postos de Traballo) do Concello. Ademais, os bens do Padroado xa forman parte do Inventario Municipal de Bens.
VENRES 28, SÁBADO 29 E DOMINGO 30 DE XUÑO
Xoves 27 de xuño do 2013
As festas de San Xoán 2013 pechan cunha das súas citas máis importantes, unha romaría de veciños e veciñas recuperada hai xa unha década e que marca sempre o final das celebracións: a Festa do Bosque. O Bosque do Añón convértese o sábado 30 de xuño no espazo onde os carballeses e carballesas desfrutan coa familia e os amigos dun amplo programa de actividades para todas as idades. A cita principia oficialmente ás 12.30 horas, aínda que a primeira das actuacións musicais está programada para a sesión vermú con Trastes, ás 13.00 horas; pola tarde, toca o Grupo de Gaitas de San Cristovo; e a partir das 20.00 horas está previsto un concerto co grupo Clave de Sol. Ás 22.00 horas é a quenda da música do grupo Dude e pechan a festa a partir das 23.00 horas Recambios Tucho, unha agrupación na que hai antigos compoñentes de Herdeiros da Crus. Ademais da música, non hai que esquecer o tradicional Concurso de Sobremesas e de Licores Caseiros, patrocinado por Pastelaría San Luís a partir das 16.30 horas; e a 115ª edición do Campionato Mundial de baixada de augas doces de barcos de papel (na imaxe), ás 18.30 horas, unha cita patrocinada por Tecnosos Galicia e na que cada neno ou nena que participe recibirá un agasallo. Tamén hai xogos populares a partir das 17.30 horas. Colabora coa cita a Asociación Cultural 13 Lagartos.
OS FEITOS FORON POSTOS EN COÑECEMENTO DAS AUTORIDADES
Mércores 26 de xuño do 2013
O Concello de Carballo, a través das concellarías de Servizos e de Medio Ambiente que dirixen Luís Lamas e Marcos Trigo, respectivamente, vén de denunciar un delicto ecolóxico producido na contorna do Paseo do Anllóns a pasada fin de semana. Así, algunha persoa ou persoas sen ningún tipo de conciencia cívica veñen de crebar arredor de medio centenar de árbores de ribeira entre as que se atopan paulownias, carballos americanos, castiñeiros, bidueiros, ameneiros e unha nogueira. Estás árbores viñan de plantarse recentemente nas marxes do río para rehabilitar a canle e axudar no repoboamento das árbores de ribeira, dentro das accións de mellora do Paseo. A administración local quere denunciar este ataque a un ben colectivo e a un recurso natural e vén de poñer os feitos en coñecemento da Policía Local e tamén o fará diante do Seprona (Servizo de Protección da Natureza da Garda Civil) e nos Xulgados. Así, parece probada a intencionalidade dos feitos, xa que para crebar as árbores empregouse un instrumento cortante, ademais de que os danos están localizados nunha zona concreta, no treito entre o Bosque e a antiga potabilizadora. O Concello pide a colaboración dos veciños e veciñas para perseguir este tipo de accións e informa de que se porán en marcha todos os medios necesarios para atrapar aos culpables e sancionalos.
LUNS 24 E MARTES 25 DE XUÑO
Domingo 23 de xuño do 2013
O luns 24 de xuño é o día grande das festas de San Xoán, e para ese día está reservado un dos principais atractivos do programa, a actuación do grupo El sueño de Morfeo. Despois da tradicional misa solemne e procesión da mañá, pola noite chega o igualmente tradicional concerto central das festas, a partir das 23.00 horas. Os eurovisivos El sueño de Morfeo son un grupo de música pop-rock con influencias folk formado en Asturias en 2002. Está integrado por Raquel del Rosario (voz), Juan Luis Suárez (guitarra) e David Feito (guitarra). Publicaron o seu primeiro disco, que levaba o nome actual do grupo, en 2005, e ao que seguiron "Nos vemos en el camino" e "Cosas que nos hacen sentir bien", cos que tiveron numerosos éxitos e conseguiron diferentes premios. O seu último disco é "Buscamos sonrisas", e inclúe cancións tan coñecidas como "Depende de ti" ou "Lo mejor está por llegar". El Sueño de Morfeo representou a España no festival de Eurovisión en Malmö, Suecia, baixo o nome de ESDM, interpretando a canción "Contigo hasta el final". Cando remate o concerto, sobre as 00.30 horas, continúa a música e a animación coa verbena a cargo da Orquestra Los Player's, fundada en 1960 e que une a tradición dunha das mellores formacións galegas coa modernidade dun gran e espectacular escenario.
A ASOCIACIÓN ADEAC CONCEDE ESTE DISTINTIVO DE CALIDADE
Sábado 22 de xuño do 2013
A Bandeira Azul, un distintivo que concede a ONG Asociación de Educación Ambiental e do Consumidor (ADEAC), ondea dende o sábado 22 de xuño nos areais de Razo, Pedra do Sal e As Saíñas do municipio carballés. Recupérase así o distintivo para a praia de Razo (na imaxe), que en anos anteriores non puidera facer ondear a bandeira, e Carballo convértese de novo no único municipio da Costa da Morte con tres insignias. Este símbolo recoñece a calidade das praias, así como das súas augas, ademais dos servizos que ten dispoñibles, como o de duchas, áreas de estacionamento, xestión ambiental, seguridade e en xeral as instalacións das que dispoñen os areais, atendendo á accesibilidade, ao feito de que exista recollida selectiva, ao servizo de salvamento e socorrismo, etc. As bandeiras foron recollidas o venres 21 de xuño na praia de Valcobo (Arteixo) polo Alcalde de Carballo, Evencio Ferrero, nun acto no que estivo presente o presidente da Xunta de Galicia, Alberto Núñez Feijóo. Unha vez en Carballo, o propio Alcalde, foi o encargado de proceder xa o sábado ao izado das enseñas, acompañado do Concelleiro de Medio Ambiente, Marcos Trigo, e de socorristas e membros de Protección Civil, nunha mañá algo nubrada e desapracible nos primeiros días dun verán que se resiste a aparecer.
COMPETICIÓNS: OS DÍAS 6 E 27 DE XULLO E 18 DE AGOSTO
Venres 21 de xuño do 2013
Un ano máis a praia de Razo énchese de actividades deportivas durante todo o período estival e o volei praia continúa con éxito a súa andaina polo areal. Nesta ocasión con ata tres torneos que terán lugar nos meses de xullo e agosto e coas xa habituais Escolas de Volei Praia para todas as idades. A Asociación de Volei Praia Costa da Morte, coa colaboración do Concello, e o patrocinio de Calvo, Alquileres Reneymar e a Deputación -entre outras entidades- é a encargada de organizar estas citas entre o 1 de xullo e o 1 de setembro. No caso dos torneos, este ano hai un más respecto a tempadas anteriores. O primeiro ten lugar o 6 de xullo no marco do festival PopUp e o segundo o 27 de xullo no marco do festival Sereas e Piratas. En ambos casos está previsto o reparto de trofeos e de premios en metálico entre os participantes. E como xa vén sendo tradicional, o 18 de agosto celébrase o VI Torneo-Foliada Concello de Carballo, que serve como peche de actividades. Neste evento haberá xogos populares, agasallos, competición de volei praia e unha cita xa habitual nos últimos tres anos, como é a elaboración dunha paella xigante para arredor de 100 persoas e coa que colaboran varios establecementos carballeses. Segundo Rosalino Mariño, da Asociación de Volei Praia Costa da Morte, o obxectivo é "ofrecer deporte e ocio para todas as idades".
NALGUNHAS XORNADAS HABERÁ DESDE 20 A 22 EFECTIVOS
Venres 21 de xuño do 2013
O Concello de Carballo, a través da Concellaría de Seguridade e Tráfico que dirixe Xosé Regueira, informa de que durante as festas de San Xoán, que transcorren entre o 21 e o 30 de xuño, a Policía Local triplicará o número de axentes nas rúas para garantir a seguridade de veciños e veciñas, así como dos visitantes que se acheguen á localidade nestas datas. Así, intensificarase a vixilancia establecéndose un dispositivo extraordinario dirixido polo Concello organizado arredor de quendas de traballo repartidas en mañá, tarde e noite, chegando a traballar 22 policías nos días de maior afluencia de xente, triplicándose con esta medida o número habitual de axentes dunha xornada. Os días con maior número de efectivos son o luns 24 e o martes 25, así como durante as fins de semana, sendo máis intensivas as quendas durante os momentos de corte de tráfico a causa das procesións, así como polas noites. O obxectivo é tratar de que haxa as mínimas incidencias posibles durante as celebracións, e que as que sexan inevitables, se solucionen canto antes grazas á presenza dos axentes, tanto no que se refire á circulación do tráfico rodado como a outro tipo de sucesos. Espérase que o despregue operativo sirva para dar unha maior seguridade a todos os cidadáns e visitantes.
PRIMEIRA FIN DE SEMANA DE FESTAS
Xoves 20 de xuño do 2013
Despois do humor dos Monólogos R e Rober Bodegas e de varias citas culturais e deportivas, o San Xoán comeza de forma oficial o xoves 20 de xuño co pregón, coma sempre acompañado pola música da Banda Municipal. Este ano, a encargada de animar aos carballeses e carballesas a gozar das festas é a polifacética poetisa muxiana e carballesa Rosalía Fernández Rial. Licenciada en Filoloxía pola Universidade de Santiago de Compostela (UDC) toca o acordeón grazas aos seus estudos no Conservatorio Profesional de Música de Carballo, fai teatro afeccionado e, sobre todo, escribe. Ademais, é presidenta da Asociación Cultural Lumieira e forma parte moi activa da vida cultural carballesa. Ela dará os primeiros pasos dun San Xoán 2013 que colle velocidade o venres 21 co Festival Rockin´. Está previsto que a cita comece a partir das 22.00 horas nunha carpa situada no parque de Rego da Balsa, detrás da antiga estación de autobuses. E os grupos que enchen o cartel son os madrileños Sex Museum (na imaxe) e Layabouts, os barceloneses Stay e os vigueses Moon Cresta. Así mesmo, a DJ Sandrita Dinamita será a encargada de pinchar para animar o festival, ao igual que fixera o ano pasado. Unha cita ineludíbel que aposta polo rock´n´roll e pola calidade do seu directo que xa é un referente no almanaque festivaleiro galego.
OS VOCEIROS MUNICIPAIS ESTUDARON A DOCUMENTACIÓN DO PREGO
Mércores 19 de xuño do 2013
A Casa do Concello vén de acoller unha xuntanza dos voceiros municipais na que se estudaron, coa axuda dos responsables da elaboración da documentación, os pregos técnicos e as cláusulas administrativas particulares para sacar a concurso o mantemento e subministro do alumeado público e a xestión enerxética do Concello de Carballo, exceptuando os edificios municipais. O obxectivo é acadar que a administración local poida aforrar preto de 150.000 euros ao ano na factura de subministro enerxético, mantemento, conservación e reposición das instalacións de alumeado. Coa aplicación dunha serie de medidas técnicas e de xestión enerxética, o custo anual sería de 830.000 euros durante a a vixencia do contrato, co que o importe total do contrato durante os doce anos previstos para a súa duración sería de preto de once millóns de euros. O contrato recolle, entre outras medidas, a substitución das aproximadamente 7.500 luminarias existentes no municipio na actualidade por luminarias LED reguladas, así como a renovación da instalación e a substitución dos cadros eléctricos. A xuntanza, de máis de dúas horas de duración, contou coa presenza, ademais dos técnicos municipais, do Alcalde de Carballo, Evencio Ferrero; a Concelleira de Contratación, Milagros Lantes; o Concelleiro de Servizos, Luís Lamas; o voceiro do PP, Alberto Sueiro; o voceiro de TEGA, Manuel Andrade; e o voceiro do PSOE, José Antonio Viña.
.jpg)