XUNTA DE GOBERNO LOCAL
Luns 12 de marzo do 2012
A Xunta de Goberno Local vén de aprobar a solicitude dun total de nove subvencións á Deputación da Coruña para poder desenvolver actividades e manter servizos no Concello relacionados coa promoción económica, a cultura, o deporte e os servizos sociais. Así, dentro da orde do día inclúese unha petición para actividades e investimentos de promoción económica por un importe de 65.000 euros que se destinarían á promoción e divulgación de Carballo como destino turístico, así como á posta en marcha da Oficina de Promoción Económica. Tamén saíu a diante unha solicitude para unha subvención destinada a programas de servizos sociais relacionados coa Atención Primaria por un importe de 45.000 euros. Así mesmo, aprobouse a petición dunha achega de 40.000 euros para o fomento das políticas de igualdade entre mulleres e homes durante o ano 2012 no marco do programa Concilia. Fóra da orde do día recibiron luz verde outras seis peticións de subvencións: unha para desenvolver o programa de Ximnasia para Maiores; outra para o programa de técnicos deportivos; outra para o desenvolvemento de programas culturais; unha para infraestruturas culturais; outra para o Conservatorio Profesional de Música de Carballo; e, por último, unha para un animador cultural.
XUNTA DE GOBERNO LOCAL
Domingo 11 de marzo do 2012
A Xunta de Goberno Local, reunida en sesión ordinaria, vén de aprobar un convenio de colaboración entre o Concello de Carballo e a Escola Universitaria de Turismo do Centro Español de Nuevas Profesiones adscrita á UDC (Universidade da Coruña) para a realización de prácticas de estudo. Durante as prácticas, o alumnado da Escola realizará tarefas de promoción territorial, de xestión de programas turísticos, de coñecemento de produto e información turística, de atención ao cliente/visitante e de recepción, así como traballos administrativos non prioritarios. A duración das prácticas é de catro meses e a titora será a Técnica de Información Turística do Concello de Carballo. No apartado de convenios, tamén saíu adiante un acordo entre a Deputación da Coruña e o Concello para o financiamento e posta en marcha de novos proxectos de servizos sociais, en concreto para a contratación das tarefas de definición e presentación dos proxectos "Carballo en movemento: fomento da mobilidade no proceso de formación da xuventude local" e "Voluntariado europeo para maiores" dentro dos programas "Lifelong learning: Leonardo da Vinci" e "Programa PAP:Grundtving", respectivamente. A achega ascende a 13.000 euros e a vixencia do convenio é até o 31 de outubro de 2013.
TAMÉN ESTÁ ACUSADO DUN SUPOSTO ATENTADO A UN AXENTE
Venres 9 de marzo do 2012
A Policía Local informa de que a última hora do xoves 8 de marzo efectuouse a detención dunha persoa pola comisión dun presunto delicto de roubo con violencia en grado de tentativa, dun suposto delicto de atentado a un axente e por outro de resistencia grave a axentes. Os feitos producíronse cando dende a Central de Policía dous axentes reciben un aviso de que varios mozos encapuchados están tentando roubar varios vehículos situados no aparcadoiro público da Horta do Casino. Os representantes das forzas de seguridade diríxense ao lugar accedendo ao aparcadoiro polas rúas Lugo e Ponte e observan que seis persoas están arredor un turismo alí estacionado, mentres que tres delas están rodeando a un home tirado no chan que está sendo agredido. Despois de dar o alto, a metade dos encapuchados sairon correndo, mentres que os axentes comezaron a perseguir aos outros tres asaltantes, cos que se producen varios enfrontamentos físicos, levando un deles un arma blanca. Finalmente, os axentes logran apresar e reducir a M.B.R., ao que identifican como o que estaba agarrando directamente á persoa tirada no chan, ademais de poder identificar durante a loita sen ningún xénero de dúbida a D.N.C. e R.I.A.G.. Despois de formalizar a detención, M.B.R. foi posto a disposición da Garda Civil, á que tamén se dou parte do sucedido.
CESIÓN DE USO DA ESCOLA INFANTIL AO CONSORCIO GALEGO
Venres 9 de marzo do 2012
A corporación carballesa vén de celebrar unha sesión plenaria extraordinaria na que un dos principais puntos da orde do día foi a aprobación da Suspensión cautelar de licenzas en diversos ámbitos das normas subsidiarias municipais do Concello de Carballo, un asunto que saíu adiante cos votos a favor do Goberno e do grupo socialista. Segundo este acordo, durante o prazo dun ano non se concederan licenzas urbanísticas naqueles ámbitos onde as normas subsidiarias dos anos 80 -en aplicación trala suspensión do PXOM de 2003- comprometan o futuro ordenamento urbanístico, especialmente en puntos onde existe contradicción na cualificación do solo. Tamén se aprobou durante a sesión o recoñecemento extraxudicial de crédito do exercicio 2012 do Concello, que ten un importe de 311.637,36 euros. Esta figura recoñece o pago daquelas facturas que con data de 31 de decembro de 2011 non foron abonadas, ben porque chegaron fóra de data, ben porque non contaron con partida específica a final de ano. O Goberno local espera que con este recoñecemento se paguen todas as facturas pendentes antes do 15 de marzo, data límite estipulada por un decreto para xustificar as débedas non abonadas polas administracións locais.
O ÁMBITO DE ACTUACIÓN PROLÓNGASE ATÉ O ANO 2014
Xoves 8 de marzo do 2012
O Concello de Carballo a través da Concellaría de Igualdade e Benestar que dirixe Silvana Castro vén de conmemorar o 8 de marzo, Día da Muller Traballadora, coa presentación do III Plan de Igualdade de Oportunidades entre homes e mulleres, un documento que constitúe unha mostra do compromiso do Concello coa eliminación dos roles e estereotipos de xénero e coa erradicación da violencia de xénero como a mostra máis brutal das desigualdades. O plan persegue establecer medidas concretas e coherentes así como dun xeito transversal en todas as áreas do Concello, centrando as actuacións na relación cos veciños e veciñas, coas empresas ou mesmo coas relacións institucionais con organismos oficiais. O documento recolle, así mesmo, un estudo exhaustivo sobre a situación do Concello, tendo en conta datos como que 16.058 habitantes dos 31.373 censados son mulleres, o 51 por cento do total; ou que o 97,7 por cento das persoas do municipio que non saben escribir ou ler son mulleres. O obxectivo do plan é acadar a conciliación da vida persoal, laboral e familiar, pero tamén incrementar a presenza das mulleres na vida do Concello equiparando os xéneros, en verbas de Silvana Castro.
SÁBADO 17 DE MARZO ÁS 19.30 HORAS NO PAZO DA CULTURA
Xoves 8 de marzo do 2012
Un "reto", unha "ópera non cantada feita teatro" ou "a historia das nosas propias vidas". Así resume o director Xesús Ron, de Grupo Chévere, as claves de "Citizen", unha obra sobre A.O. e Sara que mestura ficción e realidade para contar a vida de Amancio Ortega, que creou un imperio económico dende a periferia a partir da marca Zara. A posta en escena está dividida en tres actos que xurdiron como obras independentes a través dun proceso no que os autores traballaron "sobre a marcha", en verbas de Ron, sacando o texto das improvisacións e do esforzo conxunto de todas as partes nun "proceso de traballo pouco habitual no medio teatral galego" e que finalizou aglutinando as tres partes, "Maiorías silenciosas", "Made in Galiza" e "Wii economía" en "Citizen". Ademais, este proxecto serve para conmemorar os 25 anos de Grupo Chévere, que conta cun estilo e estética propios e cun peculiar estilo do humor, "moi galego". O espectáculo conta con máis de tres horas de duración e dous intermedios, aínda que os seus creadores aseguran que ao público fáiselle curto, e que participa activamente no coloquio co que finaliza a proposta. A cita é o sábado 17 de marzo no Pazo da Cultura a partires das 19.30 horas e o prezo da entrada é de 3,5 euros, 2,5 con desconto.
OS VENRES CULTURAIS PROPOÑEN A MÚSICA DE ROGER DE FLOR
Mércores 7 de marzo do 2012
A sala de exposicións do andar -1 do Pazo da Cultura acolle a exposición do "VI Premio de Banda Deseñada Castelao" organizado pola Deputación da Coruña. Nesta mostra, que principia a súa itinerancia en Carballo, preséntase a obra gañadora da sexta edición do "Premio da Banda Deseñada Castelao" (fallado no 2011), un certame de carácter anual organizado pola Deputación da Coruña e dotado con 6.500 euros e a publicación da obra. Neste caso, o gañador foi o mozo brionés Brais Rodríguez Vázquez con "A man do diaño". O xurado destaca da obra que "a partir dunha anécdota sinxela elabora un relato ucrónico, un alegato humanista e antibelicista". Segundo o autor, a historieta relata a experiencia de "tres soldados que teñen unha visión bélica propia, pero mentres van cumprindo a súa misión, ven a dimensión humana da guerra". A exposición pode visitarse até o 14 de marzo no Pazo da Cultura no horario habitual, de 18.00 a 21.00 horas. Ao acto de inauguración asistiron o Deputado provincial Perfecto Vázquez Lema, que describiu a mostra como unha boa forma de mergullarse "na 9ª arte"; Evencio Ferrero, Alcalde de Carballo e Mar Eirís, Concelleira de Cultura.
NA ORDE DO DÍA: UN RECOÑECEMENTO EXTRAXUDICIAL DE 311.000 EUROS
Mércores 7 de marzo do 2012
A Casa do Concello acolle o xoves 8 de marzo a celebración dun pleno extraordinario da corporación na que un dos puntos da orde do día é a Suspensión cautelar de licenzas en diversos ámbitos das normas subsidiarias municipais. Segundo explica a Tenente de Alcalde, Milagros Lantes, esta suspensión, que terá unha vixencia dun ano, aplicarase onde as normas que se teñen en conta trala suspensión do PXOM de 2003 comprometan o futuro ordenamento urbanístico. Así, afectará a catro ámbitos: aos núcleos rurais de Ferradal, Mirón, A Rega e parte do Sisto, así como á contorna da glorieta da estrada de Malpica; ás parroquias de Nétoma, Cances e Entrecruces, que no futuro PXOM son consideradas núcleos rurais; ao solo urbano de media densidade, especialmente na contorna das vías de saída da capital municipal; e no casco urbano nos puntos onde está prevista a creación de novas rúas, onde se prevén máis alturas nas normas subsidiarias que no futuro PXOM e na Horta do Casino, casas dos mestres e casas de Ferreiro. Lantes explica que a suspensión afecta "máis á ordenación que á edificabilidade". O Goberno espera que o novo PXOM, que está moi avanzado, reciba a aprobación inicial antes de que expire o ano de aplicación da suspensión, xa que nese momento deixaría de estar vixente.
ACTUACIÓNS: CREAR UN NOVO BALNEARIO OU INCENTIVAR O DEPORTE
Martes 6 de marzo do 2012
Recuperar a vexetación da ribeira da canle, crear sistemas para evitar as inundacións, edificar un novo balneario na zona da Lagoa, conectar con camiños "verdes" o Paseo do Anllóns co casco urbano ou incrementar a oferta deportiva son algunhas das propostas presentadas hoxe por un total de seis alumnos do Máster de Arquitectura da Paisaxe da Fundación Xoana de Vega para recuperar e rexenerar a contorna do río Anllóns no casco urbano carballés. Un convenio entre o Concello de Carballo, a Universidade da Coruña (UDC) e a Universidade de Santiago de Compostela (USC) xunto coa Fundación Xoana de Vega permitiu que alumnos e alumnas que cursan o citado master realizasen prácticas en Carballo co obxecto de complementar a súa formación teórica e tamén para facilitar a súa incorporación ao mercado laboral. Os traballos realizados consistiron na análise do ámbito do Anllóns e na formulación dun master plan para este ámbito. O Alcalde, Evencio Ferrero, subliñou a importancia de que o alumnado plantexase "propostas totalmente libres", e cun punto de vista diferente do que normalmente teñen as persoas que viven ou traballan na vila. Así mesmo, comprometeuse a que a Oficina Técnica estude algunhas das ideas presentadas como posibles "follas de ruta" do futuro.
VENRES 2 DE MARZO ÁS 21.00 HORAS E DOMINGO 4 ÁS 18.00 HORAS
Martes 28 de febreiro do 2012
O programa dos Venres Culturais reanúdase despois das festas de Antroido con teatro e maxia no Pazo da Cultura o venres 2 e o domingo 4 de marzo. A primeira das propostas vén da man da compañía galega de Teatro Lagarta, Lagarta que presenta "Unha hora na vida de Stefan Zweig". Este espectáculo introdúcenos nun día, nunha hora moi especial no matrimonio Zweig, e contaranos o que aconteceu en realidade na vida do grande escritor austríaco, ou, alomenos, o que puido ter acontecido. O matrimonio Zweig toma unha importante decisión, calculada con meticulosidade, sobre a súa vida. Pero no seu fogar preséntase un estrano e inoportuno visitante que permitirá que afondemos nos distintos posicionamentos deles ante a vida, a morte, os medos, o amor, o poder, a liberdade, a fuxida permanente dun mundo que horroriza. Todo nunha única hora na que poñerán a súa alma ao descuberto. Un drama moi humano e cunha grande dose de emoción, intriga e suspense. A proposta está protagonizada por actores e actrices de renome, como Ernesto Chao, César Cambeiro ou Belén Constenla. A cita é o venres 2 a partires das 21.00 horas e o prezo da entrada de 3,5 euros (2,5 € con desconto).
APRAZADO ATÉ O XOVES 1 DE MARZO O PLENO ORDINARIO DE FEBREIRO
Luns 27 de febreiro do 2012
A xunta de Goberno Local reunida en sesión ordinaria vén de acordar a adxudicación do contrato administrativo do servizo de "Asesoría xurídica do Centro de Información á Muller (CIM) de Carballo" por un prazo de dous anos e por un prezo de 26.000 euros. Este servizo proporciona unha asesoría legal gratuíta para as mulleres que así o precisen en temas relacionados coa igualdade e benestar e tamén coa loita contra a violencia de xénero e constitúe unha máis das accións desenvolvidas polo CIM para contribuír á consecución real e efectiva da equiparación entre os homes e mulleres do municipio. Hai que lembrar que o CIM garante en todo momento o anonimato na identidade das súas usuarias e a privacidade das cuestións que estas poidan plantexarlle ao persoal do Centro. A Xunta de Goberno Local tamén supuxo a autorización de dous vaos permanentes; a aprobación dunha licenza de obra e dun proxecto de execución; o visto e prace para tres licenzas de obra e apertura; e luz verde para catro licenzas de primeira ocupación. Unha destas últimas refírese a unha nave industrial sen uso específico no plan de sectorización SRAU I de Queo de Arriba no Parque Empresarial de Bértoa.
A DEBATE: OS ORZAMENTOS E O CONTRATO DO SERVIZO DO LIXO
Venres 24 de febreiro do 2012
A sesión plenaria ordinaria do luns 27 de febreiro conta entre os principais asuntos da orde do día coa aprobación dos criterios de interpretación sobre o réxime transitorio aplicable no solo clasificado polo planeamento municipal de Carballo. A través desta proposta establécense unhas pautas urbanísticas xerais de aplicación no municipio despois da anulación definitiva do PXOM de 2003 e que terán vixencia ata a aprobación dun novo Plan Xeral. Nesta ordenación adóptanse como referencias principais as normas subsidiarias dos anos 80 para a clasificación do solo e a Lei 9/2002 de Ordenación Urbanística e Protección do Medio Rural de Galicia (LOUGA) para a aplicación das normas urbanísticas correspondentes en cada caso. A proposta distingue catro apartados (chan urbano, solo apto para urbanizar, chan incluído no ámbito dos núcleos rurais ou solo non urbanizable) nos que se aplica a Disposición Transitoria Primeira da LOUGA en aspectos como a altura e ocupación máximas ou a superficie mínima para as parcelas rurais. No que respecta aos ámbitos onde se aplicará a suspensión de licenzas, o goberno espera que o asunto se debata no pleno de marzo.
.jpg)