O MUNICIPIO PARTICIPA NO CLUB DE DEBATE 2012
Martes 7 de febreiro do 2012
O Concello de Carballo, a través do Servizo de Normalización Lingüística, participa en tres iniciativas destinadas a procurar o fomento do galego en diferentes ámbitos e de diferentes maneiras. O primeiro é un proxecto xa consolidado, que vai pola súa oitava edición e que desta volta conta coa colaboración de once medios de comunicación dixitais e escritos. Trátase do VIII Premio a Artigos Xornalísticos Normalizadores Concello de Carballo, que concede un premio de mil euros. Así mesmo, Carballo participa na edición de 2012 do Club de Debate para centros de ensino, unha iniciativa que se vén desenvolvendo nos últimos anos nos concellos da Coruña e de Pontevedra, e que este ano se desenvolve entre 13 municipios, na procura da ampliación territorial, a colaboración e coordinación administrativa e a optimización de recursos. Por último, Carballo quere colaborar cun proxecto desenvolvido desde a Mesa pola Normalización Lingüística, a Liña do Galego, coa difusión dun número de teléfono e un enderezo electrónico para atender temas relacionados cos dereitos lingüísticos da cidadanía como consultas, queixas ou parabéns.
OS TÉCNICOS XA TRABALLAN NA ADAPTACIÓN DO PLANEAMENTO
Martes 7 de febreiro do 2012
O Concello de Carballo vén de recibir esta semana o informe previo da Consellería de Medio Ambiente, Territorio e Infraestruturas (a través da Secretaría Xeral de Urbanismo) do novo Plan Xeral de Ordenación Municipal (PXOM), no que se lle solicita a corrección de varias cuestións relativas á capacidade residencial e á clasificación e determinación de distintos solos -especialmente no que refire a chan urbanizable- para proceder á aprobación inicial e continuar coa tramitación do planeamento. Así, a administración autonómica, responsable última da aprobación do PXOM, considera que debe reducirse a capacidade residencial que recolle o documento para os próximos 15 anos. Tanto os expertos da Oficina Técnica Municipal como os responsables do equipo redator xa están traballando na adaptación da documentación do PXOM enviada á Xunta o pasado mes de decembro, e á que se refire este informe. Así mesmo, está previsto remitir unha copia da valoración da Xunta aos voceiros de todos os grupos da corporación. O obxectivo agora é adaptar o planeamento ás novas directrices o antes posible, sempre coa arela de crear un documento "que ofreza a máxima seguridade xurídica", en verbas do Alcalde, Evencio Ferrero.
VENRES 10 DE FEBREIRO ÁS 21.00 HORAS
Luns 6 de febreiro do 2012
Un solitario home maior, deteriorado tras un infarto, vese obrigado polos seus fillos a aceptar na casa a unha muller que o coide. O enfrontamento inicial entrambos deixa paso a unha fermosa amizade e unha sorprendente alianza. Estes son os principais temas que se abordan en "Último cowboy" a proposta de Teatro do Noroeste para os Venres Culturais. Cadansúa historia e a experiencia vital converten a obra nunha aceda comedia na que está presente a realidade máis completa e inmediata, como as relacións familiares, a crise que nos desfonda económicamente, os bancos, a enfermidade ou a soidade do individuo no mundo globalizado onde os valores que nos inculcaron xa non teñen vixencia. Miguel Pernas e Luma Gómez son os protagonistas desta historia que bebe dunha importante referencia norteamericana, co seu universo de celuloide e imperialismo, coa súa intromisión e responsabilidade nesta situación que nos afoga. Pero a xeración que puxo as cousas onde están non cultivou o seu imaxinario nos programas de televisión, cultivouno nas novelas de vaqueiros. A duración aproximada do espectáculo é de 120 minutos. O prezo da entrada é de 3,5 € (2,5 € con desconto). A cita é o venres 10 de febreiro a partires das 21.00 horas no Pazo da Cultura.
SEGUNDO A ORDENANZA MUNICIPAL E A LEI DE PREVENCIÓN DE INCENDIOS
Venres 3 de febreiro do 2012
O Concello de Carballo tramitou entre os anos 2009 e 2012 un total de 589 expedientes de talas para a limpeza de solares urbanos e de parcelas rústicas en cumprimento da Ordenanza municipal de limpeza e da Ordenanza de seguridade, salubridade, hixiene, limpeza e ornato de parcelas, solares e edificacións; así como da Lei 3/2007 de prevención e defensa contra os incendios forestais. Destes expedientes, 89 correspóndense con solares situados no casco urbano, dacordo coa aplicación das ordenanzas municipais; e 503 correspóndense con parcelas rústicas, dacordo coa apliación da Lei. No caso dos solares da capital municipal e segundo recolle a normativa, os propietarios teñen a obriga de manter os seus solares limpos e libres de residuos, evitando o crecemento incontrolado de maleza e outros vexetais que afecten ás parcelas colindantes, e que en ningún caso poderán invadir as vías públicas. A administración local pide a colaboración dos veciños e veciñas para poder evitar a proliferación de terreos baleiros no interior dos núcleos urbanos que poidan parecer pouco adecuados á estética urbana, coidando dun mantemento aceptable que evite o deterioro da imaxe externa e que garanta a seguridade.
ESTÁ CUBERTO O 85 POR CENTO DO TERRITORIO MUNICIPAL
Venres 3 de febreiro do 2012
A Concellaría de Obras e Servizos que dirixe Luís Lamas informa de que nos últimos días estanse realizando os traballos para a colocación de 139 novas anclaxes para colectores de lixo na zona nordés do Concello. Os labores principiaron na zona de Baldaio e Vilela, así como noutras parroquias costeiras, e estase avanzando cara á capital municipal, de tal xeito que está previsto que os traballos estean rematados no prazo aproximado dun mes. Cando se remate co subministro destas novas anclaxes, contarán con este tipo de dotación arredor do 85 por cento dos colectores de lixo do territorio municipal, xa que se están incorporando dende hai catro anos co obxectivo final de cubrir todo o Concello. Esta medida permite mellorar a limpeza dos colectores, así como a hixiene da súa contorna, ademais de facilitar o emprego do servizo para os usuarios/as. Así mesmo, mellorase a seguridade para evitar que os colectores se despracen co vento e poidan provocar algún accidente. Este contrato de servizos adxudicouse na Xunta de Goberno Local celebrada o pasado 13 de febreiro por un prezo de 30.798 euros cunha rebaixa de máis de mil euros sobre o orzamento base de licitación, de 31.893,9 euros.
VENRES 3 DE FEBREIRO ÁS 21.00 HORAS
Xoves 2 de febreiro do 2012
O auditorio do Pazo da Cultura acolle o venres 3 de febreiro o primeiro dos dous concertos previstos no programa dos Venres Culturais baixo o epígrafe RockCarballo. A Concellaría de Cultura organiza esta cita coa colaboración dos grupos de música electrónica, pop, rock ou heavy que están a ensaiar nos locais do Pazo da Cultura, nun concerto co obxectivo de promocionar a estes artistas do municipio, integrándoos na programación xeral desta Concellaría e que asinaron o Convenio Musical co Concello. Nesta primeira quenda do RockCarballo está previsto que suban ao escenario os grupos The Cerne, Falso Jocker e Tinperís. Hai que desculpar a ausencia de Versión Imposible, que non poden participar por motivos persoais. Tínperis é un grupo de recente creación, pois fundouse no ano 2010 da man de Martín García e Pedro "Peris" Tasende. Ambos músicos uníronse coa ilusión de formar unha banda onde expresar as súas propias melodías e letras. Esta agrupación presentáse no Pazo da Cultura por primeira vez coa ilusión de achegar a súa música ao público carballés. Xunto cos experimentados The Cerne e o metal de Falso Jocker conforman as claves un concerto que ten lugar a partires das 21.00 horas. A entrada é de balde, ata completar o aforo.
LUZ VERDE PARA OS NOVOS CRITERIOS URBANÍSTICOS
Xoves 2 de febreiro do 2012
Arredor de 3 horas durou a sesión plenaria ordinaria celebrada o xoves 1 de marzo na que o principal asunto da orde do día foi o visto e prace para os presupostos xerais da corporación para o exercicio de 2012. Incluíronse dúas enmendas presentadas polo grupo municipal do PSOE para equiparar o nivel de ingresos e gastos, pasándose dos 20.453.917,27 euros propostos nun principio para os ingresos a 19.993.917,27 euros e mánténdose o apartado de gastos en 19.978.038,40 euros. O goberno califica as contas de "prudentes", xa que foron elaboradas tendo en conta o contexto económico actual. O principal investimento incluído no orzamento é a execución do Proxecto Anllóns-Bardoso de mellora do subministro de auga potable, por un importe de 2.213.393,68 euros e que estará financiado nun 70 por cento cunha achega de fondos europeos FEDER. Outros investimentos que hai que subliñar son o Plan de Obras e Servizos da Deputación con 279.735,75 euros; 180.000 para a urbanización de terreos para melloras urbanas; ou 160.000 para actuacións na Escola Infantil. O debate relativo aos orzamentos acaparou a maior parte da sesión plenaria, con dúas horas e media de intervencións, despois das cales as contas saíron adiante cos votos a favor do goberno e do grupo socialista. Para coñecer a proposta orzamentaria máis polo miúdo, premer aquí.
EVENCIO FERRERO E ANTONIO PENSADO VISITARON AS INSTALACIÓNS
Mércores 1 de febreiro do 2012
O Alcalde de Carballo, Evencio Ferrero, e o Alcalde de Coristanco, Antonio Pensado, veñen de visitar a Estación Depuradora de Augas Residuais (EDAR) situada en Noví (Ardaña) e que outorga servizo ás parroquias de Ardaña, Rus e Entrecruces no Concello carballés, e á de Erbecedo no Concello de Coristanco. O motivo é que vén de producirse o relevo na xestión das instalacións, que até o de agora recaía na empresa responsable dos traballos -CRC Obras e Servizos- e que despois dun ano de proba pasará a asumir Aquagest. Así mesmo, Ferrero e Pensado aproveitaron para falar do futuro acordo ao que deberán chegar os dous concellos e os mecanismos que se empregarán para financiar o mantemento das instalacións, que recaerá nas dúas administracións. O Alcalde carballés estivo acompañado durante o percorrido, no que tamén estiveron técnicos de CRC e de Aquagest, polo Concelleiro de Medio Ambiente, Marcos Trigo e polo Concelleiro de Obras e Servizos, Luís Lamas. O proxecto para a creación de colectores xerais e EDAR de Ardaña foi executado por Augas de Galicia a través da Consellería de Medio Ambiente por 2,1 millóns de euros.
O NOVO ESPAZO SERÁ UN PUNTO DE ENCONTRO PARA EMPRESARIOS
Martes 31 de xaneiro do 2012
A nova directiva de Axober (Asociación de Xóvenes Empresarios de Bergantiños) co seu presidente, Isidro Varela Bardanca, vén de realizar un longo percorrido polas instalacións do recinto Fórum Carballo acompañada polo Alcalde de Carballo, Evencio Ferrero; polo Concelleiro de Formación e Emprego, Marcos Trigo; e polo Concelleiro de Xestión Municipal, Xosé Regueira; ademais de polo director do Centro de Formación, Juan Lorenzo. O obxectivo desta visita é dar a coñecer o novo espazo, xa que unha das finalidades do Fórum Carballo é a de crear un punto de encontro de empresarios, emprendedores e autónomos, integrando desta forma ao tecido empresarial nas actividades do centro. Así mesmo, crearase unha normativa municipal para regular o uso das instalacións de Fórum Carballo por entidades, colectivos e empresas que o soliciten para a celebración de xornadas, conferencias ou outro tipo de actividades. Precisamente a directiva prestou especial atención á nave 1 do complexo, que conta cun auditorio con capacidade para máis de cen persoas, así como con dúas salas de usos múltiples especialmente pensadas para o desenvolvemento deste tipo de iniciativas formativas e de divulgación.
O PREGO INCIDE NA REDUCIÓN E NA RECICLAXE DOS RESIDUOS
Martes 31 de xaneiro do 2012
O debate para a aprobación do prego de condicións e da documentación que rexerá o Concurso para a Concesión do servizo de recollida de lixo do Concello de Carballo terá lugar na sesión plenaria do mes de febreiro, previo ditame e xuntanza da Comisión Informativa de Facenda, Especial de Contas, Réxime Interior e Contratación (CIFECRIC). Así, nunha segunda reunión de traballo -a primeira tivo lugar o 19 de xaneiro- celebrada hoxe entre todos os voceiros dos grupos políticos da corporación rematouse o exame previo de toda a documentación necesaria, que está dividida en catro epígrafes (Regulamento de Servizos, Estudo Económico-financeiro, Prego de cláusulas técnicas e Prego de cláusulas administrativas particulares) e conta cun total de 231 páxinas. Os detalles foron analizados de novo coa axuda do asesor José Antonio González Ferreira e de varios técnicos municipais ante a presenza do Alcalde, Evencio Ferrero; a Concelleira de Contratación, Milagros Lantes; o voceiro do PP, Alberto Sueiro; o de TEGA, Manuel Andrade; e o do PSOE, José Antonio Viña. Houbo que desculpar a presenza do voceiro do grupo do BNG e Concelleiro de Xestión Municipal, Xosé Regueira, por ter que asistir na Coruña a un pleno da Deputación.
SOLICITADA UNHA SUBVENCIÓN A PROL DA IGUALDADE DE XÉNERO
Luns 30 de xaneiro do 2012
A Xunta de Goberno Local vén de aprobar nunha sesión ordinaria a adxudicación do contrato administrativo de servizos para a "Organización e vixilancia do espazo público onde se desenvolve o mercado de ambulantes da Milagrosa" por un prezo de 58.339,20 euros. A proposta inclúe como obrigas a organización dos postos do mercado na contorna da praza onde se celebra (na contorna do Fórum Carballo, na imaxe), a comprobación das autorizacións e dos pagos dos concesionarios dos postos e a limpeza do ámbito do espazo público onde se desenvolven as feiras e mercados. O adxudicatario ofrece unha mellora, valorada en 5.200 euros, que inclúe o marcado e pintado dos postos da feira da Milagrosa unha vez ao ano. O prazo máximo de execución do contrato é de catro anos, prorrogables por dous anos máis até un máximo de seis. No apartado de contratación, a Xunta de Goberno tamén supuxo a aprobación do expediente do contrato administrativo de servizos de "Limpeza e mantemento da Unidade Asistencial de Drogodependencias (UAD) do Concello de Carballo". Os criterios de adxudicación basearanse na oferta económica e nas melloras en canto ao aumento de zonas de limpeza ou o mantemento da prestación. O presuposto anual estimado do contrato é de 7.000 euros por un período de catro anos.
ANDAR -1 EN HORARIO DE 18.00 A 21.00 HORAS
Venres 27 de xaneiro do 2012
O andar -1 do Pazo da Cultura de Carballo acolle até o domingo 26 de febreiro unha exposición que recolle unha escolma das fotografías presentadas á primeira edición do Concurso Fotográfico Comarca Natural de Bergantiños organizado pola Asociación de Desenvolvemento da Comarca de Bergantiños (GDR), unha iniciativa que pretende poñer en valor a riqueza natural e etnográfica da bisbarra. A selección inclúe as nove obras premiadas nas dúas categorías do certame, unha de fotografía paisaxística e outra dedicada ás actividades ou oficios característicos do territorio. O xurado estivo formado por profesionais do ámbito cultural de recoñecido prestixio tales como: Xoan Villarmea, fotógrafo profesional e Premio "Mellor fotógrafo profesional de España 2011"; Xesús Búa e Pablo Verdes, profesionais nominados a "Mellor fotógrafo nacional na modalidade de retrato"; Marcos Rodríguez, fotógrafo profesional e gañador en 2010 do certame fotográfico Xosé Manuel Eirís de Carballo; e Luz Díaz, profesora de pintura. Tamén formou parte do xurado Xosé Mª Varela, membro da Xunta Directiva do GDR Bergantiños. A mostra poderá visitarse na sala de exposicións do andar -1 do Pazo da Cultura no horario habitual, de 18.00 a 21.00 horas.
.jpg)