O XEFE TERRITORIAL TEN PREVISTO VISITAR O CEIP BERGANTIÑOS
Xoves 12 de xaneiro do 2012
O Alcalde de Carballo, Evencio Ferrero, e a Concelleira de Educación, Mar Eirís, veñen de manter unha xuntanza co novo Xefe Territorial de Educación, Indalecio Cabana Leira -a primeira dende que tomou posesión do cargo- e coa Inspectora de zona de Educación Primaria, Berta Estrada, para transmitirlles os problemas de escolarización previstos nos centros escolares do casco urbano carballés para o curso 2012-2013 nas aulas de 3 anos. Así, no ano 2009 rexistráronse un total de 280 nacementos no municipio, dos cales 216 producíronse no casco urbano, o que implica que haberá que escolarizar o próximo curso arredor dese número de nenos e nenas nos centros escolares da capital municipal. Aínda que a cifra de nacementos baixa con respecto ao ano 2008, en que se rexistraron 315, tamén é inferior con respecto aos computados en 2010, con 287 nacementos -206 no casco urbano-. A Inspectora manifestou a súa vontade de manter unha xuntanza a próxima semana coas direccións dos centros educativos para estudar as posibles solucións para esta situación. A cita tamén serviu para trasladar as necesidades máis urxentes dos centros escolares, especialmente no que se refire aos peches dos CEIP Nétoma-Razo, Gándara-Sofán e Fogar, cuxo deterioro pode incluso revestir perigosidade.
EN 2011 A OFICINA TÉCNICA LEVANTOU UN TOTAL DE 76
Mércores 11 de xaneiro do 2012
O Concello de Carballo ten rexistrado nos últimos 23 anos (dende o ano 1989) un total de 1.495 actas de inspección urbanística, das cales 76 levantáronse ao longo do ano 2011. A acta de inspección é un documento de campo, do que se lle entrega copia ao denunciado e ao técnico xurídico encargado de instruír os expedientes. Non todas as actas de inspección teñen porque xerar un informe técnico do arquitecto municipal. Do mesmo xeito, non todas as actas e/ou informes implican a apertura dun expediente de reposición e/ou infracción. Dende o ano 1989, o exercicio no que se elaboraron máis actas foi 1997, con 142; e o segundo foi 1992, con 96. O ano 2011 é o sexto en que se rexistraron máis actas de inspección. No outro lado da táboa está o ano 1991, cun total de 34 actas, seguido de 2007, con 40. O incremento no número de actas de 2011 con respecto do ano anterior é de 17, xa que en 2010 houbo 59. O servizo de inspección urbanística do Concello sufriu un proceso de optimización no ano 2008 no que colaboraron tanto os responsables de urbanismo como a Policía Local. Entre as principais modificacións, estableceuse un sistema de inspección diario e fíxose fincapé na prevención, ademais de incorporarse a colaboración da Policía Local na loita contra as infraccións.
RETIRADOS CATRO NOVOS VERTEDOIROS INCONTROLADOS
Martes 10 de xaneiro do 2012
A Brigada de Medio Ambiente de Carballo recolleu, a través do Punto Limpo Móbil, un total de 40 residuos voluminosos no servizo do primeiro martes de xaneiro. Tan só 13 destas limpezas se corresponden con peticións xestionadas a través do aviso telefónico durante o mes de decembro, mentres que os 27 residuos restantes foron detectados e retirados pola Brigada nos seus percorridos habituais. O Concello de Carballo, a través das Concellarías de Obras e Servizos e Medio Ambiente, quere solicitar a colaboración dos veciños e veciñas para que avisen cando queiran depositar residuos voluminosos ou cando detecten a presenza deste tipo de lixo para facilitar o labor da Brigada e contribuír a mellorar o servizo de limpeza. Así, o Punto Limpo Móbil, que funciona cada primeiro martes de mes, permite que os carballeses e carballesas que o desexen soliciten a recollida a domicilio -tanto no medio urbano coma no rural- de residuos voluminosos solicitándoo con alomenos 24 horas de antelación no teléfono 981 701 642. Considéranse "voluminosos" aqueles restos que polas súas dimensións non poden ser xestionados como o resto de residuos urbanos. Habitualmente son electrodomésticos ou mobles. Estes restos tamén poden levarse voluntariamente ata o Punto Limpo do polígono de Bértoa, aberto os martes, xoves e sábados de 10.00 a 13.00 horas.
SEIS DELAS CORRESPÓNDENSE COS TERREOS DA SEGUNDA FASE
Luns 9 de xaneiro do 2012
O Concello de Carballo a través da Oficina Técnica Municipal ten rexistrado un total de sete solicitudes de licenzas de obra para a construción de naves no Parque Empresarial de Bértoa ao longo do ano 2011. Destas peticións, unha correspóndese coa primeira fase e seis refírense a terreos situados na recente ampliación (segunda fase). Destas seis, unha delas xa foi concedida a unha empresa construtora para a edificación dunha nave industrial "sen uso específico" na primeira Xunta de Goberno Local celebrada en 2012. O ano 2011 rexistra o número de solicitudes máis elevado dende o ano 2007, en que se rexistraron un total de 15 peticións. Nos últimos nove anos (no período entre 2003 e 2011) o exercicio no que se rexistraron máis solicitudes de licenzas de obra para naves industriais foi o ano 2006, con 23. O ano de menos actividade foi o 2010, con tan só unha petición de licenza, seguido do 2009 con catro. Dende 2003 a Oficina Técnica ten tramitado un total de 95 solicitudes de licenzas para o parque empresarial, a ampla maioría para a primeira fase do polígono. Hai que lembrar que a recente anulación do PXOM (Plan Xeral de Ordenación Municipal) de 2003 non afecta ao desenvolvemento do Parque Empresarial, onde se poden seguir solicitando licenzas con normalidade.
O INCREMENTO É DUN 38,8 POR CENTO RESPECTO DE 2010
Xoves 5 de xaneiro do 2012
O Concello de Carballo ten rexistrado ao longo do ano 2011 a través dos servizos da Oficina Técnica Municipal un total de 36 solicitudes de licenzas para a construción de vivendas no municipio, todas elas peticións referidas a vivendas unifamiliares. Estes datos recollen as solicitudes que se contabilizan no Rexistro municipal, o que non quere dicir que se concederan todas as licenzas solicitadas nin que se edificaran todas as vivendas que recibiron licenza. Hai que subliñar que no ano 2011 non se recibiu ningunha solicitude para a construción de edificios de vivendas no casco urbano, seguindo a tendencia de 2010 e 2009, anualidades en que tampouco se solicitou ningunha. Respecto da evolución das peticións para a construción de vivendas unifamiliares, en 2009 contabilizáronse 30 peticións fronte ás 22 de 2010 e as 36 de 2011, polo que o incremento do ano pasado respecto do anterior é dun 38,8 por cento e dun 16,6 por cento respecto de 2009, manténdose unha tendencia positiva. O último ano no que se rexistraron solicitudes de licenzas para a construción de edificios de vivendas no casco urbano é 2008, con 662, ás que hai que sumar as 80 para unifamiliares, facendo un total de 742 solicitudes de licenzas para vivendas nese período.
MÉRCORES 5 DE XANEIRO A PARTIRES DAS 17.30 HORAS
Mércores 4 de xaneiro do 2012
A Asociación Xuvenil Fogar da Xuventude organiza, coa colaboración do Concello de Carballo, a tradicional Cabalgata de Reis que percorrerá as principais rúas da capital municipal. O itinerario inclúe a chegada dos Reis Magos ás 17.15 horas ao CCB-Gadis Hiper, de onde está previsto que as súas Maxestades saian ás 17.30 horas. Despois do percorrido, os Reis Magos diríxense á carpa situada na Praza do Concello, onde reciben aos cativos e cativas que queiran falar con eles ou entregarlles persoalmente as súas cartas. A chegada á Praza do Concello está prevista para as 20.00 ou 20.30 horas, aproximadamente. A cita conta co patrocinio do Concello de Carballo e a colaboración do CCB-Gadis Hiper, La Caixa, Gonzacar, Alquileres Reneymar e Ecoquad Galicia. Tampouco hai que esquecer que os Reis Magos teñen previsto visitar as parroquias carballesas, xa que o mércores 5 están en Berdillo, Baldaio, Sísamo, Oza, Entrecruces e Bértoa (a partires das 19.00 horas, aprox.), mentres que o xoves 6 visitan Sofán, Razo, Artes, Rus e Cances (a partires das 10.00 horas aprox.). Estas cabalgatas están organizadas polas asociacións de cada parroquia e seguen os itinerarios de anos anteriores.
OS AVISOS PODEN FORMALIZARSE NO 981 704 700
Martes 3 de xaneiro do 2012
As Brigadas de Obras e Medio Ambiente do Concello de Carballo teñen atendido e solucionado un total de 1.422 demandas realizadas por veciños e veciñas do municipio referentes a arranxos e melloras do alumeado público, dos sinais informativos e de tráfico, dos servizos de auga, luz ou teléfono, do deterioro de equipamentos e mobiliario urbano municipal e do sistema viario ou referentes á limpeza de espazos públicos e ao programa Carballo Limpo durante o ano 2011. Hai que subliñar que esta cantidade vese incrementada entre un 15 e un 20 por cento por aquelas melloras que as brigadas xestionan directamente, ben pola súa urxencia, ben porque as detectan durante o desenvolvemento do seu labor habitual, e que non pasan polo rexistro de avisos do Concello. Os veciños e veciñas poden denunciar as deficiencias ou demandar os arranxos que consideren oportunos a través do número de teléfono 981 704 700 ou ben no correo electrónico <infocarballo@carballo.org>. No que respecta ao balance do ano 2011, e como vén sendo habitual dado que no municipio carballés hai arredor de 8.000 puntos de luz, a maioría das demandas refírense a arranxos no alumeado público, con 808 peticións.
TEN CAPACIDADE PARA 45 USUARIOS/AS
Luns 2 de xaneiro do 2012
O Concello de Carballo informa de que o luns 2 de xaneiro vén de entrar en funcionamento o Centro de Día situado na Praza de Vigo da capital municipal acollendo a un total de dez novos usuarios e usuarias. O servizo estará xestionado polo Consorcio Galego de Servizos de Igualdade e Benestar e cofinanciado polo organismo autonómico e a administración local, que achegará unha cantidade mensual para os gastos de mantemento. O edificio do Centro de Día de Carballo comezou a contruírse no mes de setembro de 2008 nunha parcela cedida polo Concello, e levaba máis de dous anos rematado, á espera de que a Administración Autonómica rematara os trámites necesarios para a súa posta en marcha. Así, a dotación de equipamento para o edificio foi adxudicada en xullo de 2010 por máis de 99.000 euros, mentres que o último paso foi a adxudicación da xestión do servizo en 2011. O proxecto construtivo do Centro de Día de Carballo recolle unha capacidade de 45 prazas, custou 763.000 euros e foi executado pola empresa Mouzo&Souto. Coa apertura do Centro de Día aglutínanse na Praza de Vigo dous servizos destinados especialmente para a terceira idade, uníndose o Centro de Día ao labor realizado polo Centro de Maiores.
TAMÉN ESTÁ PREVISTO ELIMINAR 800 PUNTOS DE LUZ
Luns 2 de xaneiro do 2012
O Concello de Carballo está poñendo en marcha unha serie de medidas para contribuír ao aforro enerxético e a reducir o gasto en consumo eléctrico do alumeado público. Así, nestes momentos están practicamente estabilizados os reloxos astronómicos e os redutores de fluxo que se instalaron hai un tempo e que permiten regular os arredor de 8.000 puntos de luz existentes no municipio. No primeiro caso, os reloxos calculan automaticamente a hora de saída e ocaso do sol para regular o acendido e apagado dos puntos de luz. Pola súa banda, os redutores fan que a determinadas horas en que se incrementa a intensidade de luz natural baixe a intensidade lumínica dos focos. Estas medidas implican un mínimo de media hora menos por foco ao día de consumo eléctrico, o que supón un mínimo de 4.000 horas menos de gasto diario e de 1.460.000 horas menos anuais de consumo global tendo en conta todos os puntos de luz do municipio. Estas medidas compleméntanse, así mesmo, coa retirada de preto de 800 focos que poden resultar redundantes situados en todo o territorio do Concello. En todo caso, a Concellaría de Obas e Servizos que dirixe Luís Lamas aclara que non se retirará ningún punto de luz que ofreza un servizo directo a vivendas.
VENRES 30 DE DECEMBRO NO PAVILLÓN BERGANTIÑOS ÁS 18.00 HORAS
Xoves 29 de decembro do 2011
O Club Escola Lubiáns de Hoquei sobre Patíns xunto con Cáritas de Bergantiños e coa colaboración do Concello de Carballo organizan a primeira edición do Día do Patín Solidario, unha iniciativa que ten como obxectivo responder á necesidade primaria de alimentos que teñen moitas persoas e familias que sofren graves dificultades económicas, especialmente nestes momentos de crise. A cita consiste na celebración de catro encontros de hoquei no Pavillón Carballo Calero (Zona Bergantiños) da capital municipal o venres 30 de decembro a partires das 18.00 horas. Toda persoa que esté disposta a colaborar pode facelo entregando no propio pavillón alimentos non perecedoiros e de primeira necesidade como arroz, legumes, pastas, azucre, conservas, ademais de poder realizar achegas económicas. Estas achegas pódense facer efectivas directamente no pavillón o día do evento ou, para quen non poidan asistir e queiran colaborar, facendo un ingreso no número de conta: 2091 0019 17 3040021910 de Novagalicia Banco, co concepto "Patín Solidario". A recolleita empregarase integramente na compra de alimentos para completar a contribución do pavillón e entregarase en Cáritas.
SUPORÁ ARREDOR DE 25 NOVAS PRAZAS DE ESTACIONAMENTO
Xoves 29 de decembro do 2011
O Concello de Carballo informa de que a partires do venres 30 de decembro pola tarde a rúa Álvarez de Sotomayor da capital municipal pasará a contar cun único sentido de circulación, de tal xeito que os vehículos só poderán transitar dende a rúa Vila de Negreira cara a rúa Gran Vía e a Praza do Concello. Con está medida está prevista a creación de arredor de 25 novas prazas de estacionamento en liña na marxe da rúa na que nestes momentos está prohibido aparcar. Esta medida adóptase seguindo as recomendacións dos informes elaborados pola Policía Local, ademais de respondendo á petición dos veciños e veciñas da vía, que viñan solicitando esta reordenación da rúa. Segundo informa o Concelleiro de Xestión Municipal, Xosé Regueira, está previsto que a rúa Álvarez de Sotomayor estea cortada durante toda a mañá do venres 30 de decembro para poder realizar os labores de repintado e a sinalización horizontal das novas prazas de estacionamento e espérase que xa estea aberta á circulación pola tarde. Así mesmo, está previsto que nos próximos días se proceda á mellora da sinalización horizontal en varios puntos do casco urbano completando novas zonas de carga e descarga, pasos de peóns e paradas de autobús.
PRESENTACIÓN: XOVES 29 DE DECEMBRO ÁS 20.30 HORAS
Mércores 28 de decembro do 2011
O xoves 29 de decembro, ás 20.30 horas, o Pazo da Cultura de Carballo acolle a presentación do libro "Follas de Carballo", unha publicación da AC Lumieira na que participan sete autores carballeses, con cadanseu relato. O libro, co que se conmemora o 35 aniversario da Agrupación Cultural Lumieira, está coordinado por Nel Vidal e ilustrado por Alberto Varela Ferreiro; da introdución encargouse o catedrático de lingua Xosé Ramón Freixeiro Mato e do prólogo o historiador Xan Fraga. Na presentación estarán boa parte dos participantes na obra. "Follas de Carballo" é un libro de autoría múltipla que presenta a vantaxe da súa variedade, que permite confrontarmos estilos e temáticas diferentes, con historias ambientadas en épocas que van desde o período medieval á actualidade, pasando polo século XVIII, nas cales están presentes motivos como o amor, a morte, a saudade, a loita, a música, etc. Na maior parte delas latexa a presenza da Galiza como espazo en que transcorren os feitos narrados, mais tamén a xeografía bergantiñá serve de marco espacial, como non podía ser menos. O libro estará á venda polo prezo de 12 € na presentación e na Libraría Brañas.
.jpg)