SEMIFINAIS: SÁBADO 3 ÁS 20.00 HORAS
Venres 2 de setembro do 2011
O Pavillón Vila de Noia da capital municipal carballesa acolle os días 3 e 4 de setembro a celebración da fase final da Copa Galicia de balonmán masculina coa presenza de Academia Octavio, Frigoríficos do Morrazo, SD Teucro e o Xiria carballés. As semifinais celébranse o sábado día 3 de setembro, sendo o primeiro partido ás 18.00 hora co enfrontamento entre o Teucro e o Cangas Frigoríficos do Morrazo. A continuación (ás 20.00 horas), dispútase a outra semifinal entre o Academia Octavio e o Xiria. A final e a loita polo terceiro posto disputaranse o domingo 4, tamén no Pavillón Vila de Noia. En primeiro lugar xogarán os equipos derrotados nas semifinais, ás 11.00 horas; e ás 13.00 horas celebrarase a final. A pasada fin de semana tiveron lugar os enfrontamentos de cuartos de final cos seguintes resultados: Academia Octavio - Atl. Novas: 40-31; SD Teucro - BM Chapela: 28-26; BM Cangas (Frigoríficos do Morrazo) - BM Porriño: 36-26; BM Xiria - BM Cisne: 34-23. A Copa Galicia de balonmán é unha competición na que participan os conxuntos galegos de categoría estatal: Asobal, División de Honra de Prata e Primeira Estatal (onde compite o Xiria, sendo a terceira categoría en importancia do balonmán español).
RENUNCIA DE XOSÉ REGUEIRA Á DEDICACIÓN EXCLUSIVA
Venres 2 de setembro do 2011
A sesión plenaria ordinaria de agosto, que se traslada ao luns 5 de setembro ás 20.30 horas, inclúe entre os principais asuntos da orde do día a modificación da ordenanza fiscal número 11, reguladora das taxas pola prestación de servizos no mercado municipal de abastos, con motivo das obras de reforma da praza. Así, en novembro de 2010, o pleno tiña sacado adiante a aprobación inicial desta modificación, na que se acordaba a aplicación nas taxas do IPC acumulado dende o anterior axuste dos prezos no ano 2000, un importe que se considerou suficiente para cubrir o mantemento do servizo despois da reforma, incluíndo tamén as tarefas de limpeza do edificio, entre outros labores. Porén, o PP esixiu a realización dun novo estudo económico financeiro para determinar as cantidades que deben abonar os concesionarios. Finalmente, a corporación acordou a suspensión da aprobación da modificación da ordenanza e encargouse formalmente a elaboración dun novo estudo financeiro. Agora, rematado este informe, que recolle as características dos locais, a superficie ou a súa categoría para determinar os coeficientes, lévase a modificación da ordenanza ao pleno para darlle o visto e prace. Segundo os resultados do estudo, producirase un incremento das taxas nunha media de aproximadamente un 6 por cento respecto ao estipulado anteriormente, aínda que o índice non será o mesmo para todos os postos. Despois da aprobación inicial no pleno, a ordenanza someterase a exposición pública durante un prazo de 30 días.
OS INCENDIOS CHEGAN A ÍNDICES PRÓXIMOS AOS DE 2006
Xoves 1 de setembro do 2011
O Concello de Carballo vén de celebrar unha xuntanza da Comisión Especial de Seguridade Cidadá na que o principal asunto abordado foi a proliferación de lumes forestais que se teñen producido este verán na contorna da capital municipal. Segundo explica o Concelleiro de Xestión Municipal e responsable da área de Seguridade, Xosé Regueira, o número de incendios rexistrados é similar ao do ano 2006, durante a vaga de lumes que asolou Galicia. Na sesión, na que estiveron, ademais de Regueira, o Alcalde de Carballo, Evencio Ferrero, o xefe da Policía Local, Constantino Vázquez, o responsable de Protección Civil, Javier Souto Facal, e representantes dos grupos municipais, deuse a coñecer que a maioría destes incendios son provocados, especialmente por menores, en actos de gamberrismo, pero as consecuencias son preocupantes, non só polos danos rexistrados nos montes, senón tamén porque os incendios prodúcense na contorna de grupos de vivendas e núcleos. A comisión acordou trasladar esta problemática á Xunta Local de Seguridade, que se reunirá a mediados de setembro, e subliñou a necesidade da intervención dos corpos de seguridade do Estado para buscar solucións e afondar na prevención dos lumes.
SÁBADO 3 E DOMINGO 4 DE SETEMBRO
Xoves 1 de setembro do 2011
Carballo acolle os días 3 e 4 de setembro a celebración do I Concurso Nacional Canino, unha cita organizada pola Sociedade Cinolóxica Galega (Expogal) coa colaboración de Protección Verde e o Concello, na que está previsto que participen máis de cen cans chegados de lugares como Pamplona, Navarra ou Xaén. Entre os principais atractivos desta cita, que terá lugar no Parque do San Martiño (no pavillón do CEIP San Luís Romero, en caso de choiva), está unha exposición monográfica de pura raza de american pitbull terrier, II Monográfica APBT, que, segundo o presidente de Expogal, Javier Davila Correa, ten espertado un notable interese. En todo caso, as actividades comezan o sábado ás 17.00 horas cun concurso de mascotas para cans con e sen pedigree e con exhibicións caninas. Entre elas, está prevista unha de Casaga (a asociación de Cans de Salvamento de Galicia) con cans chegados dende Ferrol adestrados en labores de rescate. O domingo 4 será o Concurso Nacional Canino puntuable para o campionato autonómico, para animais de pura raza, a partires das 11.00 horas. Ás 16.30 están previstas as finais. Ademais, as inscricións están abertas ata os mesmos días das competicións, polo que o número de 100 cans podería incrementarse.
OS INGRESOS POR VENDAS CHEGARON AOS 17.000 EUROS
Martes 30 de agosto do 2011
O Concello de Carballo, desde a Concellaría de Cultura, fai unha valoración positiva da Praza dos Libros, que tivo lugar entre o xoves 25 e o domingo 28 de agosto no Xardín Municipal da capital bergantiñá, e na que se mantiveron tanto os niveis de venda como os niveis de participación das edicións de 2009 e 2010 que, pola súa vez, incrementaran o volume de vendas con respecto á edición de 2008. Ao longo dos catro días de feira pasaron pola Praza dos Libros miles de persoas e unhas 1.500 participaron nas case 20 actividades programadas, entre presentacións de libros, actos de sinatura por parte dos/as autores/as, actividades de animación, concertos, monicreques, etc. Con respecto ao nivel de vendas, houbo uns ingresos por adquisición de libros de 17.000 euros. Esta cifra é similar ás das edicións de 2009 e 2010, e supera os 15.000 euros de ingresos da edición de 2008. Deste xeito, a media de ingresos de cada unha das sete librarías participantes foi de case 2.500 euros.
A CITA É O SÁBADO 3 DE SETEMBRO NO CIRCUÍTO DE BÉRTOA
Martes 30 de agosto do 2011
O Circuíto de Bértoa acolle o sábado 3 de setembro a penúltima proba do Campionato Galego de Quadcross e a cuarta proba desta modalidade que se celebra en Carballo. Dende a organización, encabezada por EcoQuad Galicia, informan de que xa hai 28 pilotos que teñen confirmado a súa asistencia, polo que se rexistra como a proba destas características con máis participación de toda España e consolida o Circuíto carballés como un referente nas probas de motor. EcoQuad Galicia confirma a asistencia de Daniel Remuiñán, un piloto local que ten moitas posibilidades de proclamarse campión galego; pero a cita tamén contará coa presenza de Álex Barca e de Adrián Fariña; así mesmo, dende Burgos estará Kike Pardo. A organización quere subliñar que esta proba é unha das mellores de Galicia e agradece a colaboración dos patrocinadores, así como do Concello de Carballo e o Padroado Deportivo Municipal, para facer posible a cita e sacarlle partido "a unhas instalacións que son das mellores de España". No que respecta aos horarios, as verificacións comezan dende primeira hora, mentres que a partires das 12.15 son os adestramentos libres. A partires das 16.00 horas principia a disputa das mangas coa entrega de premios prevista para as 19.00 horas.
XUNTA DE GOBERNO LOCAL
Luns 29 de agosto do 2011
A Xunta de Goberno Local vén de aprobar en sesión ordinaria o contrato administrativo para a dotación dunha rede Ethernet (rede de área local) do edificio Fórum Carballo a Esycsa cun prezo de adxudicación de 23.126 euros. A empresa oferta unha ampliación no prazo de mantemento de 24 a 36 meses e o contrato de subministro está cofinanciado nun 70 por cento mediante fondos FEDER (Fondo Europeo de Desenvolvemento Rexional). Así mesmo, durante a sesión recibiu luz verde o expediente de contratación para o "Subministro e instalación de cabina de lacado e vernizado na nave número 4 do edificio Fórum Carballo". Así, ábrese o procedemento para a adxudicación con tramitación urxente cun orzamento base de licitación de 32.314 euros. Deste xeito continúan os trámites para rematar o equipamento e os subministros do complexo do proxecto Fórum Carballo, situado no barrio da Milagrosa e que está formado por cinco edificios, cohesionados entre si e distribuídos nunha área de 11.000 metros cadrados, cunha superficie edificada de 6.600 metros. Fórum Carballo é un proxecto que busca o fomento do emprego e o desenvolvemento sostible no marco do tecido produtivo de Carballo e a comarca de Bergantiños.
EN HORARIO DE 10.00 A 22.00 HORAS
Martes 23 de agosto do 2011
Un ano máis un grupo de profesionais do automóbil de Carballo únense para organizar a feira de vehículos de ocasión da capital de Bergantiños. Dende o ano 2006 déronse os pasos para reeditar esta cita que cada ano supera as expectativas en canto a número de visitantes e vendas realizadas. Esta nova edición celébrase o sábado 27 e o domingo 28 de agosto en horario de 10.00 a 22.00 horas no Parque de Rego da Balsa do centro carballés nas rúas Ánxel Fole, Enrique Sánchez e Avilés de Taramancos. Vehículos seleccionados de todas as marcas nacionais e de importación terán cabida en Berocasión, que prevé que sexan expostos arredor de 300 coches, entre kilómetro 0, seminovos, furgonetas, turismos, todoterreos e outros, con prezos de entre 3.000 e 50.000 euros. Ademais, este ano os clientes poderán beneficiarse de grandes descontos, como demostra a continua subida na compra de vehículos de ocasións nos últimos tempos, especialmente no ano 2011. Os participantes nesta sexta edición da feira son: Automóviles Dimolk, Gonzacar, Automóviles Vilas Rama, Motor Canedo, Motor Carballo e Talleres J. Lema.
O CONCELLO PIDE O REMATE DO ROTEIRO CICLOTURÍSTICO CARBALLO-RAZO
Sábado 20 de agosto do 2011
A Xunta estudará a posibilidade de que de que a Ruta das Férvedas (homologada como PR-G 142 e que inclúe as fervenzas de Rus e Entrecruces) forme parte dunha rede de centros BTT (Bicicleta Todo Terreo) de Galicia. Así transcendeu nunha xuntanza celebrada o venres 19 de agosto entre a Secretaria Xeral de Turismo, Carmen Pardo; o Alcalde de Carballo, Evencio Ferrero; e o Concelleiro de Promoción Económica, Xosé Manuel García Guillín. O obxectivo desta reunión era o de por en coñecemento da Xunta de Galicia os proxectos e iniciativas do Concello de Carballo en materia de turismo, procurando a colaboración institucional entre as dúas administracións. Entre os asuntos que se abordaron están, ademais da dinamización da Ruta das Férvedas, a creación dun Plan de dinamización turística do espazo natural de Razo-Baldaio; dunha ruta de sendeirismo entre as praias de Razo e Caión; e o remate do último treito do roteiro ciclo-turístico Carballo-Razo. Así mesmo, abordouse a necesidade de mellorar a sinalización turística no municipio, especialmente no que respecta a recursos e espazos de interese turístico, o balneario, os puntos de información, etc. A Xunta está traballando xa neste tema coa elaboración de varios proxectos ou manuais de sinaléctica.
DOMINGO 21 DE AGOSTO A PARTIRES DAS 11.00 HORAS
Venres 19 de agosto do 2011
A praia de Razo acolle o domingo 21 de agosto a partires das 11.00 horas o IV Torneo de Volei Praia Concello de Carballo, no que está prevista a participación de xogadores e equipos chegados de todas partes de Galicia ou incluso doutros países como Brasil. Está previsto montar seis campos de volei praia e un para súper mini, sendo as categorías Súper 80 (masculina e feminina), Sénior (masculina e mixta), Xuvenil (masculina e mixta, ata 17 anos), Infantil (mixta) e Súper mini (4x4). Os premios serán trofeos para os dous primeiros de cada categoría e medallas para o súper mini, ademais de que se repartirán 500 augas e refrescos. Conxuntamente co torneo para todo o que se acerque haberá xogos alternativos ao longo de toda a xornada como Tiro da Corda, Lanzamento de Pedra, Frisby Gol. Así mesmo, coa colaboración da tenda de roupa Teiron, regalaranse prendas de roupa, e coa axuda de Artsurfcamp ofreceranse descontos nos cursiños de surf e outros gratis para todos os participantes. Está cita está organizada pola Asociación Deportiva Cultural de Voleipraia Costa da Morte conxuntamente co Concello de Carballo e os patrocinios de Calvo e Alquileres Reneymar. Tamén colaboran Agrobotica, 20 Twenty, John Pub Ross, American Dreams, Cocacola, Restaurante Bergantiños, Pizza Tutto, Puentega Carpinteiros, Estación De Servicio Mingacho e Café Baños Viejos.
DO XOVES 25 AO DOMINGO 28 DE AGOSTO
Xoves 18 de agosto do 2011
O Concello de Carballo, desde a Concellaría de Cultura, organiza un ano máis a Praza dos Libros, que terá lugar desde o xoves 25 ao domingo 28 de agosto no Xardín Municipal da capital bergantiñá. O punto de partida está previsto para o xoves 25 ás 11.00 horas, coa inauguración ás 13.00 horas coa intervención da Concelleira de Cultura, Mar Eirís, do Alcalde de Carballo, Evencio Ferrero, e co pregón da moza escritora carballesa Rosalía Fernández Rial, autora dos poemarios "En clave de sol" e "Átonos". Ao longo dos catro días de feira haberá un intenso programa de actividades de difusión do libro e da lectura para todos os públicos, e serán presentadas dez novidades editoriais e un disco. Na Praza dos Libros haberá oito stands. Un do Concello de Carballo e sete librarías: Brañas e Trasgo (de Carballo), Como unha novela (da Laracha), A Tenda dos Libros (de Ponteceso), Roget (de Vimianzo), Couceiro (da Coruña) e Pedreira (de Santiago de Compostela). O horario de apertura das casetas é de 11.00 a 14.00 horas polas mañás e de 17.30 a 21.30 horas polas tardes. A Praza dos Libros, que se desenvolve a última fin de semana de agosto desde o ano 2006, está organizada polo Concello de Carballo, coa colaboración de Conservas Calvo.
DE 10.00 A 22.00 HORAS
Mércores 17 de agosto do 2011
O Polígono de Bértoa de Carballo acolle o sábado 20 de agosto a celebración do III Circuíto BTT 12 horas de Carballo. A proba disputarase de 10.00 a 22.00 horas por relevos sobre un circuíto duns 10 quilómetros, con saída e chegada no parque empresarial, estimando un tempo medio por volta de 30 minutos e cumprindo as condicións de calquera proba cicloturista. A participación na proba realizarase de forma individual ou por equipos, que poderán estar formados por un, dous, tres ou catro corredores. Está permitido o emprego de equipos de radio ou GPS entre os compoñentes dos equipos, sempre e cando estean homologados. Cada equipo só poderá contar cun corredor dentro do circuíto. A finalidade é a de acumular pases por meta; en caso de empate no número de voltas, gañará o equipo que investise menos tempo. Cada equipo estará identificado cunha pulseira e será portador dela o corredor que estea no circuíto. A organización sinalizará un único lugar onde realizar o cambio de pulseira. A proba contará, así mesmo, cun circuíto de mini-BTT e cunha jimcana para os cativos e cativas, así como unha exhibición de BMX. A cita está organizada polo Club Ciclista Carballo e a Peña Ciclista Media Ducia coa colaboración do Concello de Carballo, ademais da Policía Local, Protección Civil a Brigada de Obras de Carballo, Biclicletas Arán e Union Bike Shop. Os interesados e interesadas en obter máis información sobre a proba, poden consultar o regulamento ao completo na páxina web do Club Ciclista Carballo, premendo aquí.
.jpg)