O MINISTERIO DE FOMENTO ACHEGA 500.000 EUROS PARA O PROXECTO
Venres 22 de xullo do 2011
O primeiro pleno ordinario que celebra a nova corporación carballesa dende as eleccións municipais do mes de maio conta, como principal asunto da orde do día, coa aprobación do Convenio de colaboración entre o Ministerio de Fomento e o Concello de Carballo para o acondicionamento e mellora da accesibilidade na contorna do mercado municipal. Así, en novembro de 2011 deuse a coñecer que o Concello acadara unha partida de 500.000 euros a través do debate da comisión de orzamentos do Congreso para realizar esta mellora. Agora, a administración local xa conta co borrador do convenio, que esixe un acordo plenario para poder sacar adiante a actuación. O proxecto consiste no acondicionamento da Rúa Desiderio Varela dende o cruce coa Rúa Colón ata a Gran Vía, así como da Gran Vía dende o cruce coa Rúa Sol ata a Rúa Cervantes. O Alcalde de Carballo, Evencio Ferrero, que presentou os asuntos do pleno -previsto para o martes 26 de xullo- coa Tenente de Alcalde, Milagros Lantes, informa de que a mellora non implica a transformación destas áreas en zonas peonís, e subliña que se respectarán os espazos de estacionamento na rúa Desiderio Varela, aínda que se situarán na marxe do Xardín Municipal. Tamén, e na medida do posible dada a normativa de accesibilidade, respectaranse os aparcamentos da rúa Gran Vía. O convenio recolle un prazo de 13 meses para a execución da obra dende a sinatura do acordo, aínda que o Goberno calcula que o prazo de execución dos traballos será duns 6 meses.
EL COLUMPIO ASESINO, ME AND THE BEES OU THE COBRAS: NO CARTEL
Xoves 21 de xullo do 2011
O Festival Sereas e Piratas chega á súa sexta edición para encher un ano máis a praia de Razo con surf, boa música e moita xente con gañas de pasalo ben. Este ano a organización quere subliñar a vontade de acondicionar mellor o espazo do festival, cunha carpa e espazos especialmente reservados para acampar e incluíndo actividades novas, como unha sesión vermú coa actuación de Me and The Bees e unha churrascada aberta para todos os veciños e veciñas. José Antonio Deus, presidente da Asociación Cultural Rebeldía, organizadora da cita coa colaboración do Concello de Carballo, subliña que, no musical, o festival segue a mesma liña de anos anteriores, con grupos galegos de moita calidade e esta edición con El columpio asesino como cabeza de cartel, unha banda que había tempo que querían traer ao Sereas e Piratas e que "está sendo un dos grupos do ano, presente en todos os festivais importantes". Vanesa Ínsua, tamén de Rebeldía e editora da revista do festival, fixo tamén un chamamento ao civismo, para que os asistentes coiden a praia e faciliten a convivencia. Por último, este ano para asistir ás actuacións da noite, a partires das 21.00 horas, por primeira vez haberá que pagar, neste caso un "donativo simbólico" de 5 euros. A organización subliña que "non é moito para desfrutar dun cartel como este", que aglutina ata seis bandas punteiras do panorama indie galego e nacional. Máis información do programa na páxina web: <www.sereasepiratas.com.>.
DO 20 AO 22 DE XULLO NO PAZO DA CULTURA DE CARBALLO
Mércores 20 de xullo do 2011
O VII Curso de Verán sobre dinamización lingüística da Universidade da Coruña (UDC), que nesta edición leva como subtítulo "(Re)pensando o discurso", vén de arrincar no Pazo da Cultura co obxecto, segundo Goretti Sanmartín, directora do Servizo de Normalización Lingüística da UDC, de "reforzar os argumentos e obter un panorama dos discursos que existen sobre a lingua". A través de conferencias, obradoiros, e, sobre todo, con espazos de debate, o programa tamén pretende que os participantes "tomen un papel activo" e sigan estendendo o discurso porque "sen iso é ben difícil manter a lingua". No acto de apertura do Curso, Sanmartín estivo acompañada por Nel Vidal, presidente da CTNL (Coordinadora de Traballadores de Normalización da Lingua), que redundou na necesidade de "repensar o discurso para facelo máis eficiente e con máis capacidade de convencemento". O secretario xeral da UDC, Carlos Amoedo, definiu Carballo como "concello talismán", na celebración das xornadas, especialmente por tratarse "dun dos concellos de Galicia onde se fala máis o galego a nivel popular". O Concelleiro de Normalización Lingüística de Carballo, Xosé Regueira, desculpou a ausencia do Alcalde na apertura e agradeceu a confianza da UDC por escoller Carballo como sede da cita. Subliñou a importancia de "artellar mecanismos a prol da lingua galega" e inivitou aos participantes no curso a desfrutar de Carballo "que é estes días a vosa vila e o seguirá sendo sempre que queirades achegarvos aquí".
O CONSORCIO ASUMIRÁ PARTE DO CUSTO DA ESCOLA INFANTIL
Mércores 20 de xullo do 2011
O Consorcio Galego de Servizos de Igualdade e Benestar espera poder ter en marcha o Centro de Día de Carballo, situado na Praza de Vigo da capital municipal, no próximo mes de setembro. Así trascendeu na entrevista que mantiveron o Alcalde de Carballo, Evencio Ferrero, e a Concelleira de Igualdade, Benestar e Mocidade, Silvana Castro, co xerente do Consorcio, Roberto Rodríguez. Hai que lembrar que o edificio do Centro de Día de Carballo comezou a contruírse no mes de setembro de 2008 e leva máis de dous anos rematado, á espera de que a Administración Autonómica culmine os trámites necesarios para a súa entrada en funcionamento. Así, a dotación de equipamento para o edificio foi adxudicada en xullo de 2010 por máis de 99.000 euros, e agora o último paso é a adxudicación da xestión do servizo a unha empresa para que este bote a andar. O proxecto construtivo do Centro de Día de Carballo recollía unha capacidade inicial de 40 prazas, custou 763.000 euros e foi executado pola empresa Mouzo & Souto. Durante a xuntanza tamén se falou da Escola Infantil que nestes momentos se está construíndo no polígono 19 do PXOM carballés, na contorna da estrada de Razo. Os representantes municipais lembraron o compromiso adquirido polo Consorcio nun convenio asinado en 2008 polo que a administración autonómica asumiría o 80 por cento do custe dos traballos e a administración local o 20 por cento restante, aínda que finalmente o Consorcio non asumiu o financiamento e os traballos estanse realizando grazas a un convenio coa Deputación provincial.
DO 20 AO 22 DE XULLO NO PAZO DA CULTURA DE CARBALLO
Martes 19 de xullo do 2011
A Universidade da Coruña, en colaboración co Concello de Carballo, a Coordinadora de Traballadores/as de Normalización da Lingua (CTNL) e a Deputación da Coruña, organizan a sétima edición do Curso de verán sobre Dinamización Lingüística, que ten lugar no Pazo da Cultura de Carballo os días 20, 21 e 22 de xullo e que se centra na análise dos discursos para o fomento da lingua galega. Na inauguración, que ten lugar o mércores 20 ás 10.15 horas, participan o presidente da CTNL, Nel Vidal; a directora do Servizo de Normalización Lingüística da UDC, Goretti Sanmartín; o secretario xeral da Universidade da Coruña, Carlos Amoedo, e o concelleiro de Normalización Lingüística de Carballo, Xosé Regueira. Os obxectivos deste curso son reflexionar sobre a incidencia do discurso ou discursos na situación social da lingua, analizar os argumentos a respecto da diversidade lingüística, revisar termos e conceptos sociolingüísticos en transformación e avaliar as ideas forza e os conceptos chave do discurso normalizador sobre o galego, así como a súa actualidade ou necesidade de reformulación. O curso comeza cun relatorio de José María Sánchez Carrión, "Txepetx", sociolingüista vasco, no que presentará propostas de discursos e argumentos integradores para a normalización lingüística.
SUBMINISTRO PARA A NAVE 4 DO FÓRUM CARBALLO
Luns 18 de xullo do 2011
A Xunta de Goberno Local, reunida na súa primeira sesión ordinaria logo da constitución da nova corporación, vén de aprobar tres expedientes de contratación para a mellora de vías e para o equipamento da nave 4 do complexo Fórum Carballo. Así, saíu adiante o relativo á "Mellora de capa de rodadura no lugar de Xoane na parroquia de Goiáns" e o relativo á "Mellora de capa de rodadura no lugar do Añón na parroquia de Berdillo". Ámbalas dúas actuacións están incluídas no Plan Provincial de Cooperación ás Obras e Servizos (POS) de 2011. No primeiro caso o orzamento de contrata é de 113.059,93 euros, mentres que no segundo o prezo base de licitación é de 136.509,81euros. Así mesmo, recibiu luz verde o expediente para o contrato administrativo de "Subministro e instalación de cabina de lacado e barnizado na nave nº 4 do edificio Fórum-Carballo". Neste caso, os criterios de adxudicación son o prezo, a ampliación do prazo de garantía e a ampliación do prazo de mantemento, cun orzamento de execución por contrata de 32.314,30 euros. A sesión supuxo tamén a adxudicación do contrato administrativo de servizos para a "Dirección de obra da Biblioteca de Carballo", cun prezo de 48.380 euros.
O ORZAMENTO DE LICITACIÓN É DE 1,2 MILLÓNS DE EUROS
Venres 15 de xullo do 2011
Representantes da empresa Ogmios Proyectos SL e o Alcalde, Evencio Ferrero -acompañados do Concelleiro de Obras e Servizos, Luís Lamas- veñen de asinar o contrato de obra para a construción da nova Biblioteca de Carballo, que estará situada nunha parcela de 1.500 metros cadrados na contorna da Rúa Pontevedra. Ambas partes amosaron o seu interese porque os traballos comecen o antes posible, ademais de comentar algúns detalles técnicos do proxecto, como o movemento de terras. Un total de 42 empresas optaron á execución desta actuación, aínda que a adxudicación recaeu finalmente en Ogmios por un orzamento de licitación de 1.199.588 euros. Os criterios que se seguiron durante o proceso de contratación foron: a valoración do plan de execución de obra, a redución de prazos (que a adxudicataria baixa en 45 días) e a proposta económica. Esta última supuxo unha diminución de máis de 300.000 euros sobre o orzamento de licitación, de 1,5 millóns de euros, mentres que o prazo de execución é de 15,5 meses. O importe necesario para a execución da actuación será achegado na súa totalidade polo Ministerio de Cultura, que ten como prazo límite para o remate do proxecto o 31 de decembro de 2012. A adxudicación deste contrato formalizouse nunha Xunta de Goberno Local de principios do mes de xuño, na que tamén recibiu luz verde o expediente para o contrato de servizos de "Coordinación de seguridade e saúde da obra Biblioteca", que está a piques de ser adxudicado.
O 6 E 21 DE AGOSTO CELÉBRANSE OS TORNEOS DO CONCELLO
Xoves 14 de xullo do 2011
O Concello de Carballo ofrece un ano máis no areal de Razo as Escolas de Véran de Volei Praia. Esta actividade, totalmente gratuíta, desenvólvese na explanada entre o 1 de xullo e o 31 de agosto de 16.00 a 20.00 horas de luns a domingo, sempre e cando o tempo o permita. Para participar, tan só hai que inscribirse nas pistas de volei praia situadas na explanada e seguir as indicacións do persoal responsable. Ademais, este ano, como novidade, cada día desenvólvense as Pequescolas, de 17.00 a 18.30 horas, destinadas a nenos e nenas de ata 9 anos, que deberán contar coa supervisión dalgún adulto. O obxectivo é inicialos na práctica do volei ademais de fomentar a educación medioambiental co coidado da praia, e os xogos con materiais diversos (como paracaídas, indiaca, frisbi, etc.), xogos de pistas, cancións, carreiras de relevos, xogos populares, futbolei ou palas. As actividades teñen lugar nun recinto menor que o dos maiores, especialmente adaptado para esas idades. Ademais, e dentro das iniciativas destinadas a fomentar o Volei Praia, os areais de Baldaio e Razo acollen os días 6 e 21 de agosto, respectivamente, os Torneos do Concello de Carballo. Námbolos dous torneos está previsto que os finalistas reciban como premio trofeos e material deportivo. Para obter máis información ou formalizar as inscricións, os interesados e interesadas poden facelo no teléfono 606 400 858 ou todos os días de 16.00 a 20.00 horas na explanada de Razo. Os sistema de competición pecharase depois da acreditación e segundo o número de inscritos.
REDÚCESE O GASTO NUN 27 POR CENTO RESPECTO DE 2007
Martes 12 de xullo do 2011
A sesión plenaria extraordinaria organizativa celebrada o luns 11 de xullo en Carballo supuxo o visto e prace para a proposta do BNG respecto dos cargos da corporación en réxime de dedicacións exclusivas e retribucións, un acordo que implica unha redución dun 27,05 por cento en salarios por dedicacións respecto ao estipulado no ano 2007. O acordo contou co apoio dos dez concelleiros do BNG e do representante do PSOE, José Antonio Viña, que considera que a proposta é razoable. Así, e á espera de que Xosé Regueira, Concelleiro Delegado de Xestión Municipal, tome unha decisión respecto á súa renuncia á retribución do Concello en favor dunha retribución como Deputado provincial, o Goberno contaría finalmente con cinco dedicacións exclusivas cun gasto bruto anual de 184.405,52 euros, fronte aos 252.785,10 euros de hai catro anos. Estarían distribuídas do seguinte xeito: o Alcalde e a Tenente de Alcalde e Concelleira de Planificación e Desenvolvemento Urbano, Milagros Lantes, percibirían un salario bruto anual de 38.952,76 euros cada un; o Concelleiro de Obras, Servizos e Medio Rural, Luís Lamas; o Concelleiro de Xestión Municipal e Normalización Lingüística, Xosé Regueira; e o Concelleiro de Deporte, Medio Ambiente, Promoción e Emprego, Marcos Trigo, percibirían cada un, un salario bruto anual de 35.500 euros. Se Regueira rexeitase a súa retribución por parte do Concello, non sería substituído, quedando o total de dedicacións en catro. O persoal eventual de confianza reduciríase á contratación dun único secretario persoal da Alcaldía, fronte aos dous cargos acordados en 2007.
O CONCURSO CONGREGOU A 64 COLEXIOS DE TODA GALICIA
Martes 12 de xullo do 2011
O Alcalde de Carballo, Evencio Ferrero, e a Concelleira de Educación e Cultura, Mar Eirís, veñen de recibir na Casa do Concello aos alumnos e alumnas que conforman o equipo gañador da primeira edición do programa "Xiz", de V Televisión, disputado entre escolares de entre 9 e 12 anos de 64 centros de ensino de toda Galicia. Pablo Carballo Pacoret e Irene Varela Santiago, titulares do equipo, ademais de Leticia García Varela e Juan José Antúnes Marín, os suplentes, estiveron acompañados polos seus familiares, ademais de por parte do equipo directivo do CEIP Fogar. Recibiron un lote de libros, contaron parte da súa experiencia e asinaron, con bastante timidez, no Libro de Honra, onde quixeron expresar os seus agradecementos por todo o apoio recibido, subliñar a grande experiencia que viviron ou agradecer non só aos compañeiros do centro e ao equipo do programa, senón tamén ás cociñeiras do colexio que lles daban chocolate. O Alcalde, Evencio Ferrero, quixo transmitirlles os seus parabéns polo "brillantísimo" papel realizado durante o concurso, ademais de desexarlles "moitísimos éxitos" para o futuro. Para proclamarse vencedores de "Xiz", os concursantes do CEIP Fogar tiveron que derrotar na final, e despois de sete programas, ao CEIP Bandeira de Silleda, a quen gañaron batendo o récord do programa con 465 puntos.
O PROXECTO ESTÁ SENDO AVALIADO POR TÉCNICOS DE EDUCACIÓN
Luns 11 de xullo do 2011
A Xefa Territorial de Educación, María Teresa Villaverde Pais, informa de que o proxecto de ampliación do CEIP Bergantiños da capital municipal estará listo para o curso 2012-2013. Así transcendeu nunha entrevista mantida co Alcalde de Carballo, Evencio Ferrero e a Concelleira de Educación e Cultura, Mar Eirís, que durante aproximadamente unha hora falaron coa Xefa Territorial sobre esta actuación, especialmente necesaria e urxente polos problemas de escolarización dos centros de ensino do casco urbano previstos para os próximos cursos. Así, xa para o curso 2011-2012 será preciso incluír nas aulas a arredor de 300 nenos e nenas nacidos en 2008, unha cifra moi elevada. Nestes momentos, o proxecto está entregado e en proceso de revisión, polo que, tan pronto remate o exame por parte dos técnicos, os traballos estarán en disposición de ser licitados. Nunha anterior xuntanza con Villaverde Pais en novembro de 2010, Educación adiantaba que a contratación se produciría no segundo trimestre deste ano, aínda que finalmente haberá un lixeiro atraso. Outro dos asuntos abordados durante a xuntanza refírese á zonificación dos centros escolares do municipio. Educación comprométese a revisar a comezos deste curso a adscrición de cada centro dentro do rueiro do municipio. Así mesmo, Villaverde Pais confirmou o peche da Escola Unitaria de Entrecruces.
A COMPAÑÍA REPRESENTARÁ O SEU ESPECTÁCULO "MUU!"
Luns 11 de xullo do 2011
A vindeira edición do Festival Internacional Outono de Teatro de Carballo, que terá lugar o próximo mes de outubro, celebrará o vinte aniversario dun dos eventos culturais máis relevantes de Bergantiños e a Costa da Morte e dun dos festivais de artes escénicas máis importantes de Galicia. A Asociación Cultural Telón e Aparte e o Concello de Carballo, organizadores da cita, están preparando un programa especial de aniversario no que xa está confirmada a participación dunha das compañías máis exitosas na traxectoria do Festival e máis queridas polo seu público, os madrileños de Yllana, que tamén celebran este ano o seu vinte aniversario. Para esta celebración, Yllana retoma o seu primeiro espectáculo, "¡Muu!", unha das poucas propostas da compañía que non se puideron disfrutar en Carballo no seu momento. "¡Muu! 2", que a compañía madrileña estrea este mes, conserva aproximadamente o 20 por cento do espectáculo orixinal, incorporando numerosos elementos de actualidade pero conservando a súa esencia: unha intensa sátira ao mundo da tauromaquia cun estilo directo, espírito transgresor, actitudes moi gamberras e moita comedia. A organización do FIOT segue traballando na configuración da XX edición do festival na que espera ofrecer máis sorpresas.
.jpg)