Os consellos parroquiais volverán a partir de setembro para seguir fomentando a participación veciñal na xestión municipal
Xoves 31 de agosto do 2023
.jpeg "As xuntanzas dos consellos parroquiais comezarán en Aldemunde")
As xuntanzas dos consellos parroquiais comezarán en Aldemunde
Os consellos parroquiais retomarán a súa actividade no mes de setembro. Dende o Concello de Carballo queremos seguir fomentando a participación veciñal na xestión municipal, e os consellos parroquiais constitúen dende o ano 2017 unha canle fundamental.
Nestes momentos están constituídos 16 consellos parroquiais, nos que participan de xeito directo máis de 300 veciños e veciñas, e moitos máis de xeito indirecto, xa que antes da reunión cos representantes municipais é habitual que a veciñanza celebre xuntanzas abertas para recoller as propostas que despois serán trasladadas aos representantes municipais.
Nos consellos parroquiais participan o alcalde, Evencio Ferrero, e representantes de todos os grupos políticos municipais. Por parte da veciñanza hai participación do movemento asociativo, aínda que as portas están abertas a aquelas persoas que queiran sumarse a título individual. O obxectivo destes órganos de participación veciñal é recoller as propostas da cidadanía para telas en conta á hora de decidir sobre o investimento dos fondos públicos.
Neste curso as sesións celebraranse os xoves ás 20.00 horas entre os meses de setembro e febreiro. O calendario provisional é o seguinte:
- 14 de setembro, Aldemunde
- 21 de setembro, Ardaña
- 26 de outubro, Artes
- 9 de novembro, Cances
- 14 de novembro, Bértoa
- 16 de novembro, Entrecruces
- 23 de novembro, Goiáns
- 30 de novembro, Lema
- 11 de xaneiro, Noicela-Rebordelos
- 18 de xaneiro, Oza
- 25 de xaneiro, Razo
- 1 de febreiro, Rus
- 8 de febreiro, Sísamo
- 15 de febreiro, Sofán
- 22 de febreiro, Verdillo
- 29 de febreiro, Vilela