DIFUSIÓN DO LIBRO E DA LECTURA

Xurxo Souto, Álvarez Cáccamo e Fernández Paz, protagonistas do segundo trimestre de Literactúa

Luns 14 de abril do 2008

O programa Literactúa estructúrase por trimestres. En cada un deles, propón a lectura de tres libros, un por mes. Neste sentido, o último mércores de cada mes, o autor ou a autora do libro seleccionado acude a Carballo para participar nun acto de conversa cos seus lectores e lectoras nun estabelecemento hostaleiro da localidade.

O protagonista do mes de abril será Xurxo Souto, que presentará o seu libro de relatos ‘Os tres trebóns’, sobre o cal departirá coa audiciencia o día 30 de abril a partir das 21.00 horas no bodegón ‘O Pescador’.

O 28 de maio, á mesma hora, pero no pub ‘A Reserva’, o convidado será Xosé María Álvarez Cáccamo. A súa presenza permitirá falar de poesía, xa que o seu libro recomendado para ese mes é ‘Vento de sal’.

O segundo trimestre de Literactúa pecharase o 18 de xuño, no pub ‘Silfo’, con Agustín Fernández Paz e a súa obra ‘O único que queda é o amor’.

As persoas interesadas en obter máis información sobre as obras e os autores propostos para o segundo trimestre de Literactúa, poden facelo clicando aquí.