CONSELLERÍA DE MEDIO AMBIENTE

Manuel Vázquez anuncia en Carballo un investimento de 8’5 millóns de euros da súa Consellería no municipio

Xoves 15 de maio do 2008

O Alcalde de Carballo, Evencio Ferrero, o Concelleiro de Medio Ambiente, José Antonio Viña e outros membros da Corporación Local brindáronlle unha recepción oficial a Manuel Vázquez tras a cal o Conselleiro compareceu en rolda de prensa para anunciar os proxectos que o seu departamento ten previsto acometer nos vindeiros meses en Carballo por un importe de 8,5 millóns de euros.

O primeiro en executarse será o saneamento integral de Razo. A obra xa foi adxudicada á empresa ‘Espina Obras Hidráulicas’ e a mesma comezará antes de que principie o verán. Manuel Vázquez tamén avanzou que Medio Ambiente asumirá o custe do saneamento integral de Baldaio e da zona de Ardaño, Rus e Entrecruces. Así mesmo, anunciou que a Xunta financiará os traballos para levar o abastecemento de auga a Baldaio.

Por último, o Conselleiro de Medio Ambiente tamén se compremeteu ante o Goberno Local carballés a que a Xunta de Galicia acometerá a demolición do edificio adquirido polo Concello na Ponte do río Anllóns (no barrio da Milagrosa).

As previsións da Consellería de Medio Ambiente e do Goberno Local son que a totalidade das obras anunciadas sexan licitadas nun prazo de tres a catro meses, unha vez que se superen os trámites previos preceptivos como a elaboración dos respectivos proxectos e que o Concello poida poñer á disposición da Xunta os terreos nos que se executarán os traballos.