'TRABALLANDO EN LINGUA'

Carballo convértese durante tres días nun dos eixos das actividades da Universidade da Coruña

Martes 15 de xullo do 2008

Tamén acudiu o delegado provincial da Consellería de Industria e Innovación, José Luís Barcia, quen foi o encargado de abrir o curso cunha intervención na que resaltou que "a incorporación do galego á sociedade da información é imprescindible" en Galicia, xa que pode influír na creación dunha "imaxe de prestixio" que axude á incorporación do idioma en espazos nos que agora non ten cabida. O delegado subliñou a grande demanda de contidos en galego que existe na Rede e fixo fincapé na importancia de "aumentar o uso da Internet nos colectivos que sofren exclusión dixital".

Á súa vez, Luís Caparrós quixo manifestar a importancia de que a Universidade non se identifique só coa cidade da Coruña, senón cun contorno máis amplo, coa descentralización de actividades como ‘Traballando en lingua’, que supón "un enriquecemento mutuo", tanto para Carballo e o entorno da Costa da Morte como para o contorno académico. O Alcalde de Carballo, Evencio Ferrero, pechou o acto agradecendo a oportunidade de que a vila poida ser a "receptora" desta iniciativa que vincula "as novas tecnoloxías e a normalización lingüística" á comarca e que serve para "impulsar novas estratexias para o galego".