PRAIAS

Realizados en Baldaio os traballos de derrubo do bar situado na zona das Saíñas

Luns 21 de xullo do 2008

O edificio está emprazado preto da caseta dos socorristas do areal, e está sendo derrubado despois de varias conversacións dos donos con representantes do Goberno local. Con esta actuación, o Concello espera que mellore o entorno da praia de Baldaio, ademais de que cesen algúns actos vandálicos que se estaban producindo no entorno a causa desta construción, como a rotura de cristais e outras actuacións que prexudican aos usuarios da praia.

O Concelleiro de Praias, Benedito Viña, resalta que despois da eliminación deste edificio recupérase un novo espazo para os areais do municipio, dentro da política de actuacións que está desenvolvendo o Concello para manter en boas condicións as zonas de baño e areais de Carballo. Entre elas destacan a creación de novos aparcadoiros ou a dotación de novos servizos que contribúan a mellorar a seguridade das praias de Razo, Baldaio e Pedra do Sal.