OBRAS E SERVIZOS

Unha cuadrilla de Aspaber limpa as marxes do paseo do Anllóns entre a Milagrosa e o cemiterio de Bértoa

Mércores 18 de febreiro do 2009

As melloras principiaron en decembro do ano pasado, pero tiveron que interromperse debido aos fortes temporais que houbo na zona, aínda que se retomaron recentemente. Os labores inclúen o segado da herba e o acondicionamento xeral da zona para o seu uso. O paseo do Anllóns é unha das zonas máis empregadas polos veciños e veciñas como lugar de ocio e esparcemento, e o Concello quere culminar canto antes uns traballos imprescindibles para o mantemento desta zona en bo estado.

O Alcalde de Carballo, Evencio Ferrero, e o Concelleiro de Servizos, Luís Lamas, estiveron esta mañá supervisando o labor dos operarios de Aspaber no Bosque do Añón. Esta actuación está incluída dentro do programa de mantemento de espazos públicos do Concello de Carballo, que tamén inclúe o desenvolvemento doutras actuacións, como a limpeza e desbroce periódico da rede viaria do municipio ou a limpeza dos solares no casco urbano.