OBRAS E SERVIZOS

Comezan os traballos para substituír o caucho e os xogos dos parques infantís da capital municipal

Luns 16 de marzo do 2009

A Concellaría de Servizos informa de que os parques estarán pechados ao público mentres duren os labores -que se farán primeiro no parque do Anllóns e logo na Praza do Concello- e pide desculpas polas posibles molestias ocasionadas. O Concello considera que os traballos contarán cunha duración aproximada de dúas semanas, cunha semana para a instalación do novo material en cada un dos dous parques. Estas melloras sufriron un lixeiro atraso por mor dos últimos temporais, pero coa chegada do bo tempo a Concellaría de Obras e Servizos espera que as obras estean rematadas canto antes.

Por outra banda, nestes momentos, e tamén co gallo do bo tempo, estanse realizando labores de mellora de beirarrúas na capital carballesa e de rebacheado en distintas vías do municipio. No primeiro caso, estanse substituíndo as lousas que están máis deterioradas. No segundo caso, o rebacheo xa se ten realizado en varias vías de Bértoa, na zona da avenida de Fisterra ou no barrio da Milagrosa, e forma parte do plan do Concello para o correcto mantemento das pistas e estradas municipais.