ACTIVIDADES ENTRE O 9 DE NOVEMBRO E O 1 DE DECEMBRO

O rock, a música coral, os cantos de berce, os sons de aquí ou a música clásica conforman o programa do Novembro con música

Mércores 7 de novembro do 2012

Moitas das citas incluídas no Novembro con Música 2012, poden ter lugar grazas ao Convenio Musical que se establece coas agrupacións do municipio e que implica a cesión de locais de ensaio no Pazo da Cultura, especialmente no caso das bandas de pop e rock, para que poidan desenvolver a súa creatividade musical. O festival rock Live in Cances abre a programación cun cartel formado por tres bandas de Carballo -Dude, Versión Imposible e The Killer Cats- e unha de Muros - Minileño-. A cita, organizada pola Asociación Cultural San Campio de Cances coa colaboración do Concello, é o venres 9 de novembro a partires das 22.00 horas no Local Social de Cances. Tamén grazas á colaboración entre o Concello e as agrupacións de música tradicional do municipio xorde o concerto Sons de aquí, que ten lugar o sábado 10 ás 21.00 horas no Pazo da Cultura. Un total de oito agrupacións, acompañadas pola Banda de Gaitas Municipal expoñen o mellor do seu repertorio: Cantareiras de San Campio de Cances, Asociación Lembranzas de Bergantiños de Bértoa, Grupo de Gaiteiros de San Cristovo, Cantareiras Xoldreira da AC Nemeth, Banda de Gaitas de Bergantiños de Bértoa, Cantareiras e Cantareiros de AC Arume, Escola de Gaitas da AC Arume, Cantareiras Névedas de AX Arume.

O programa da primeira fin de semana do NCM péchase o mesmo sábado 10, pero ás 19.00 horas cun Magosto en Razo que conta coa presenza de varias agrupacións folclóricas, co Grupo Samba, o Grupo de Teatro Vagalume e unha sesión de dj's. O programa do NCM nunca se esquece dos máis cativos e cativas, que teñen o seu espazo no ciclo En Familia, nesta edición con dúas citas. A primeira, o domingo 11, está patrocinada por Primera Persona e trátase dun cantacuentos musical a cargo de Susa Herrera e baseado no libro "Animales encantadores", no que os nenos e neas poden pasar unha tarde coñecendo a 10 animaliños moi especiais. A segunda, o domingo 25, é unha "Danza dos Instrumentos" a cargo do grupo de animación musical Os Tres Tenedores. Esta cita conta coa colaboración da Deputación. As dúas actuacións son ás 18.00 horas. A música coral ten dobre representación no programa, primeiro o sábado 17 de novembro co Festival de Corais -co Coro Aires de Bergantiños e a Coral Polifónica de Bergantiños- e tamén o sábado 24 co concerto na honra de Santa Cecilia, que neste caso trae como invitadas agrupacións da Coruña e Ordes. A música clásica ten como principal expoñente as actuacións programadas polo Conservatorio Profesional de Música. O venres 30 de novembro cun concerto con alumnado do centro e agrupacións musicais do Conservatorio, como o cuarteto de corda ou a masa coral, ademais dos solistas; e o sábado 1 de decembro coa Banda Municipal de Carballo -con Manuel Bello e Alexandro Montes- que pecha o programa do Novembro con Música.

Obradoiro de nanas e tres exposicións